Is minic a thugann an Bíobla “Mac Dé” ar Íosa. (Eoin 1:49) Tugann an leagan cainte “Mac Dé” le tuiscint gurbh é Dia Cruthaitheoir an uile dhúil bheo, Íosa san áireamh. (Salm 36:10, [36:9 i mBíoblaí eile]; Apacailipsis 4:11) Ní mhúineann an Bíobla gur shíolraigh Dia páistí ar an gcaoi chéanna a shíolraíonn an duine daonna páistí.

 Tugann an Bíobla “clann Dé” ar na haingil freisin. (Iób 1:6) Agus deir an Bíobla gur ‘mac le Dia’ a bhí sa gcéad fhear, Ádhamh. (Lúcás 3:38) Ach, de bhrí gurbh é Íosa an chéad neach a chruthaigh Iehova as a stuaim féin, déanann an Bíobla cur síos ar Íosa mar chéadghin mhic Iehova.

•  Ar mhair Íosa ar neamh sular rugadh ar an talamh é?

•  Céard a rinne Íosa sular tháinig sé chun na talún?

 Mhair. Ba phearsa spioraid ar neamh é Íosa sular tháinig sé chun na talún mar dhuine. Dúirt Íosa é féin: “Óir tháinig mé anuas ó neamh.”—Eoin 6:38; 8:23.

 Chruthaigh Dia Íosa sular chruthaigh sé aon ní eile. Deir an Bíobla faoi Íosa:

•   ‘Is é . . . an chéadghin de gach dúil cruthaithe é.’—Colosaigh 1:15.

•   Is “céadtús de chruthúnas Dé” é.—Apacailipsis 3:14.

 Chomhlíon Íosa an tairngreacht faoin “té a dtéann a shinsearacht na cianta siar go dtí an t-am fadó.”—Míocá 5:1 (5:2 i mBíoblaí eile); Matha 2:4-6.

 Bhí ról tábhachtach aige ar neamh. Rinne Íosa tagairt don ról seo nuair a deir sé ina ghuí: “A Athar, tabhair-se glóir domsa . . . leis an nglóir chéanna a bhí agam i do láthair sula raibh an domhan ann.”—Eoin 17:5.

 Chabhraigh sé lena Athair le gach ní eile a chruthú. Bhí Íosa ag obair in éineacht le Dia mar ‘cheardaí oilte’. (Seanfhocail 8:30) Ag cur síos ar Íosa deir an Bíobla: “Mar is trídsean a cruthaíodh a bhfuil ar neamh agus ar talamh.”—Colosaigh 1:16.

 D’oibrigh Dia trí Íosa chun gach rud eile a chruthú. Bhí na haingil san áireamh sa gcruthú seo, chomh maith leis an gcruinne fhisiceach. (Apacailipsis 5:11) Bhí an bealach ar oibrigh Dia agus Íosa as lámh a chéile cosúil leis an mbealach a n-oibríonn ailtire agus tógálaí. Cruthaíonn an t-ailtire an dearadh, agus tugann an tógálaí an togra chun críche.

 Ba é an Briathar é. Nuair a dhéanann an Bíobla cur síos ar shaol Íosa sular tháinig sé chun na talún mar dhuine, tugann sé “an Briathar” air. (Eoin 1:1) Léiríonn sé seo gur úsáid Dia a Mhac le heolas agus le treoracha a thabhairt do na haingil.

 Is cosúil freisin gur úsáid Dia Íosa chun cumarsáid a dhéanamh le daoine ar an talamh. Labhair Dia trí Íosa, an Briathar agus é ag tabhairt treoracha d’Ádhamh agus d’Éabha i ngairdín Éidin. (Geineasas 2:16, 17) D’fhéadfadh sé gurbh é Íosa a threoraigh na hIosraeilítigh tríd an bhfásach agus gurbh é an t-aingeal céanna é a raibh ar na hIosraeilítigh géilleadh go hiomlán dó.—Eaxodus 23:20-23. a