“Kaa ko bako nyɛnɔ ni jeee gbɔmɛi ahe nɔ. Shi anɔkwafo ji Nyɔŋmɔ, ni ehãŋ aka nyɛ fe bɔ ni nyɛbaanyɛ naa nyɛdamɔ, shi moŋ yɛ kaa lɛ mli lɛ, ebaaje gbɛ ni nyɛkɛaaje mli hu ehã nyɛ koni nyɛnyɛ naa nyɛdamɔ.”​—1 Korintobii 10:13, Jeŋ Hee Shishitsɔɔmɔ.

 “Kaa ko bako nyɛnɔ ni jeee gbɔmɔ he nɔ̃; shi anɔkwafo ji Nyɔŋmɔ, mɔ ni haŋ aka nyɛ fe bɔ ni nyɛaanyɛ, shi moŋ ekɛ kaa lɛ nɔŋŋ aaaje gbɛ aha nyɛ ní nyɛje mli hu, koni nyɛnyɛ mli nyɛmɔ.”​—1 Korintobii 10:13, Ga Biblia momo.

 Ŋmalɛ nɛɛ tsɔɔ wɔ Nyɔŋmɔ su ko ni hãa wɔsumɔɔ lɛ, no ji, enɔkwayeli lɛ. Mɛi ni kɛ anɔkwayeli jáa Nyɔŋmɔ lɛ baanyɛ amɛná hekɛnɔfɔɔ akɛ ebaaye ebua amɛ, titri lɛ, kɛ́ amɛkɛ kaa miikpe.

 “Kaa ko bako nyɛnɔ ni jeee gbɔmɛi ahe nɔ.” Shihilɛi komɛi baanyɛ aka Nyɔŋmɔ jálɔi ni amɛfee nɔ ko ni Nyɔŋmɔ sumɔɔɔ. Eyɛ mli akɛ kaai ni tamɔ nɛkɛ lɛ anaa wala moŋ, shi amɛjeee nɔ ko srɔto ko, ejaakɛ mɛi babaoo kɛkpe pɛŋ. a No hewɔ lɛ, Nyɔŋmɔ jálɔi baanyɛ amɛná nɔmimaa akɛ amɛ hu amɛbaanyɛ amɛdamɔ naa.

 “Anɔkwafo ji Nyɔŋmɔ.” Yehowa b ji mɔ ko ni obaanyɛ okɛ ohe afɔ̃ enɔ, ni onine enyɛŋ shi kɔkɔɔkɔ. Yehowa ewo shi akɛ, ekwaŋ mɛi ni sumɔɔ lɛ, ni amɛyaa nɔ amɛyeɔ lɛ anɔkwa, ni amɛboɔ lɛ toi lɛ kɔkɔɔkɔ, ni etee nɔ eye shiwoo nɛɛ nɔ be fɛɛ be. (5 Mose 7:9; Lala 9:10; 37:28) No hewɔ lɛ, mɛi ni jáa lɛ lɛ baanyɛ aná hekɛnɔfɔɔ akɛ ebaaye shiwoi enyɔ ni woɔ mɔ hewalɛ ni nyiɛ kuku nɛɛ sɛɛ lɛ anɔ.

 “Ehãŋ aka nyɛ fe bɔ ni nyɛbaanyɛ naa nyɛdamɔ.” Nyɔŋmɔ tsɔɔ akɛ eyeɔ anɔkwa kɛtsɔ gbɛ ni eŋmɛɛɛ ni kaai anaa awa aahu bɔ ni mɔ ko nyɛŋ naa adamɔ lɛ nɔ. Ele nɔ ni ejálɔi lɛ ateŋ mɔ fɛɛ mɔ baanyɛ efee kɛ nɔ ni enyɛŋ efee.​—Lala 94:14.

 “Yɛ kaa lɛ mli lɛ, ebaaje gbɛ ni nyɛkɛaaje mli hu ehã nyɛ koni nyɛnyɛ naa nyɛdamɔ.” Nyɔŋmɔ baanyɛ ejie kaa ko kɛje ejálɔi lɛ anɔ aloo ebaahã amɛ nɔ ni he hiaa koni amɛnyɛ amɛkpee kaa ko naa. Akɛ nɔkwɛmɔnɔ lɛ, ebaanyɛ etsɔɔ amɛ gbɛ kɛtsɔ̃ emumɔ krɔŋkrɔŋ lɛ nɔ, eshɛje amɛmii kɛtsɔ Biblia lɛ nɔ, loo eye ebua amɛ kɛtsɔ̃ nibii ni nyɛmimɛi Kristofoi feɔ lɛ anɔ.​—Yohane 14:26; 2 Korintobii 1:3, 4; Kolosebii 4:11.

 Ŋmalɛ nɛɛ jeɔ kpo yɛ wolo ko ni bɔfo Paulo ŋma eyahã Kristofoi asafo ni yɔɔ Korinto lɛ mli. Yɛ ewolo lɛ fã nɛɛ mli lɛ, Paulo tsɔ̃ blema Israelbii lɛ ayinɔsane nɔ ebɔ Korintobii lɛ kɔkɔ. (1 Korintobii 10:11) Paulo tsĩ kaai komɛi ni Israelbii lɛ kɛkpe lɛ atã, ekomɛi ji wɔŋjamɔ kɛ bɔlɛnamɔ jeŋba shara. (1 Korintobii 10:6-10) Amɛteŋ mɛi komɛi ŋmɛɛ amɛhe amɛhã kaai nɛɛ. Amɛnɔkwɛmɔnɔ lɛ hewɔ lɛ, Paulo kai Kristofoi akɛ amɛkahe amɛhe amɛye fe nine, ni amɛsusu akɛ kaa nyɛŋ aye amɛnɔ kunim kɔkɔɔkɔ. (1 Korintobii 10:12) Kɛ̃lɛ, etee nɔ ekɛ wiemɔi ni yɔɔ 1 Korintobii 10:13 lɛ shɛje amɛmii. Nyɔŋmɔ anɔkwa jálɔi baanyɛ afĩ shi yɛ kaai ni amɛkɛbaakpe lɛ fɛɛ amli.

 Kwɛmɔ 1 Korintobii awolo lɛ hiɛkpamɔ vidio kuku nɛɛ.