“Yehowa ajɔɔ bo ni ebu ohe. Yehowa ahã ehiɛ akpɛ yɛ onɔ, ní edro bo. Yehowa awó ehiɛ nɔ etsɔɔ bo ni ehã oná toiŋjɔlɛ.”​—4 Mose 6:24-26, Jeŋ Hee Shishitsɔɔmɔ.

 “Nuŋtsɔ lɛ ajɔo ni ebu ohe! Nuŋtsɔ lɛ ahã ehiɛ akpɛ́ yɛ onɔ, ni eduroo! Nuŋtsɔ lɛ awó ehiɛ nɔ yɛ onɔ, ni ehao hejɔlɛ.”​—4 Mose 6:24-26, New King James Version.

 Ale wiemɔi nɛɛ akɛ wiemɔi ni osɔfo lɛ loo Aaron kɛjɔɔ mɛi​—Aaron ji klɛŋklɛŋ osɔfo nukpa ni awo yɛ Israel. (2 Mose 28:1) Jɔɔmɔi nɛɛ jɛ Nyɔŋmɔ diɛŋtsɛ ŋɔɔ. (4 Mose 6:22, 23) Ekɛɛ Mose akɛ: “Kɛɛmɔ Aaron kɛ ebihii lɛ akɛ, ‘Nɛkɛ ji bɔ ni nyɛjɔɔ Israelbii lɛ.’” No sɛɛ ni Nyɔŋmɔ tsĩ wiemɔi ni yɔɔ 4 Mose 6:24-26 lɛ atã. Osɔfoi ni yeɔ anɔkwa lɛ bo famɔ ni Nyɔŋmɔ kɛhã lɛ toi. Amɛwo Nyɔŋmɔ gbɛ́i Yehowa lɛ hu hiɛnyam. a Kuku 27 lɛ kaneɔ akɛ: “Ni [osɔfoi lɛ] kɛ migbɛ́i lɛ afɔ̃ Israelbii lɛ anɔ, koni majɔɔ amɛ.”

 “Yehowa ajɔɔ bo ni ebu ohe.” Yehowa jɔɔ ewebii lɛ kɛtsɔ amɛhe ni ebuɔ, gbɛ ni etsɔɔ amɛ kɛ miishɛɛ ni ehãa amɛnáa yɛ amɛshihilɛ mli lɛ nɔ. (Abɛi 10:22) Yɛ 4 Mose 6:24-26 lɛ, he fɛɛ he ni wiemɔ ni ji “bo” lɛ je kpo yɛ lɛ, akɛtsu nii kɛhã mɔ kome. Enɛ haa wɔnaa akɛ jeee maŋ muu lɛ fɛɛ kɛkɛ Yehowa miisumɔ ni ejɔɔ, shi eesumɔ ni ejɔɔ aŋkroaŋkroi ni ji Israelbii hu.

 “Yehowa ahã ehiɛ akpɛ yɛ onɔ, ní edro bo.” Yɛ Israelbii lɛ abeaŋ lɛ, kɛ́ mɔ ko bi ni Nyɔŋmɔ “ahã ehiɛ akpɛ yɛ” enɔ lɛ, nɔ ni etsɔɔ ji akɛ eebi ni Nyɔŋmɔ adro lɛ ni ekpɛlɛ enɔ. b Abaanyɛ atsɔɔ sane nɛɛ shishi hu akɛ: “Yehowa atse ehiɛ ehã o.” (4 Mose 6:25, Ga Biblia hee) Yehowa droɔ ewebii kɛtsɔ bɔ ni ekɛ amɛ yeɔ yɛ mlihilɛ mli, emusuŋ tsɔɔ lɛ yɛ amɛhe, ni enaa amɛ mɔbɔ lɛ nɔ.​—Yesaia 30:18.

 “Yehowa c awó ehiɛ nɔ etsɔɔ bo ni ehã oná toiŋjɔlɛ.” Yehowa ‘wóɔ ehiɛ nɔ’ etsɔɔ mɛi ni jáa lɛ lɛ kɛtsɔ suɔmɔ mli ni ejɛɔ eyɔseɔ amɛ kɛ toiŋjɔlɛ ni ehãa amɛ lɛ nɔ. Wolo ko tsɔɔ mli akɛ, “Hebri wiemɔ kɛhã toiŋjɔlɛ (shalom) lɛ etsɔɔɔ akɛ naagba ko bɛ mɔ lɛ kɛ mɛi ateŋ kɛkɛ, shi enuɔ he hu akɛ eyɛ jogbaŋŋ yɛ gbɔmɔtsoŋ ni ekɛ Nyɔŋmɔ teŋ hu yɛ jogbaŋŋ.”

 Ehe bahia ni Israelbii lɛ afee mɛi ni boɔ Yehowa toi dani amɛbaaná jɔɔmɔi ni yɔɔ kukuji nɛɛ amli lɛ ahe sɛɛ. (3 Mose 26:3-6, 9) Kɛ́ amɛbo lɛ toi lɛ, eyeɔ shi ni ewo amɛ lɛ nɔ. Nakai ji bɔ ni eba lɛ yɛ amɛmaŋtsɛmɛi lɛ ekomɛi abeiaŋ, tamɔ Solomon kɛ Hezekia beiaŋ nɛkɛ.​—1 Maŋtsɛmɛi 4:20, 25; 2 Kronika 31:9, 10.

 Eyɛ mli akɛ akpaaa gbɛ akɛ Kristofoi akɛɛ jɔɔmɔi nɛɛ moŋ, shi amɛbaanyɛ amɛtsĩ susumɔi tamɔ nakai atã amɛtsɔɔ Nyɔŋmɔ kɛ́ amɛmiisɔle amɛmiihã mɛi krokomɛi, loo amɛmiiwo amɛnyɛmimɛi Kristofoi hewalɛ. (1 Tesalonikabii 5:11, 25) Yehowa tsakeee. Be fɛɛ be lɛ, esumɔɔ ni ejɔɔ etsuji ni yeɔ lɛ anɔkwa lɛ, ni ebu amɛhe. No hewɔ lɛ, anɔkwa Kristofoi baanyɛ aná toiŋjɔlɛ, ejaakɛ, amɛle akɛ Yehowa “hiɛ” miikpɛ yɛ amɛnɔ.

 Saji ni yɔɔ 4 Mose lɛ klɛŋklɛŋ yitsei nyɔŋma lɛ mli lɛ kɔɔ gbɛtsɔɔmɔi ni Nyɔŋmɔ kɛhã Israelbii lɛ be ni amɛyaa Shiwoo Shikpɔŋ lɛ nɔ ni amɛyabɔ nsara yɛ Sinai Gɔŋ lɛ he lɛ he. Yɛ nsara ni amɛyabɔ ni ye aaafee afi lɛ mli lɛ, Yehowa to ewebii lɛ ahe gbɛjianɔ efee amɛ maŋ, ni ehã amɛ mlai ni abale lɛ akɛ Mla kpaŋmɔ lɛ.

 Kɛfata he lɛ, Yehowa tsɔɔ Mose bɔ ni Aaron kɛ ebihii lɛ, ni no mli lɛ amɛji osɔfoi ni ahala lɛ, ajɔɔ Israelbii lɛ amɛhã. (4 Mose 6:22, 23) No sɛɛ lɛ, Aaron kɛ eseshibii lɛ kɛ wiemɔi ni yɔɔ 4 Mose 6:24-26 lɛ jɔɔ maŋbii lɛ. Be ni be shwie mli lɛ, ebatsɔ kusum akɛ kɛ́ osɔfoi yashã afɔlei ni amɛshãa daa gbi yɛ sɔlemɔ shĩa lɛ amɛgbe naa lɛ, amɛkɛɔ jɔɔmɔi nɛɛ.

 Kwɛmɔ 4 Mose lɛ hiɛkpamɔ vidio kuku nɛɛ.