“Okɛ nɔ fɛɛ nɔ ni ofeɔ lɛ awo Yehowa dɛŋ, ni ogbɛjianɔtoi baaye omanye.”​—Abɛi 16:3, Jeŋ Hee Shishitsɔɔmɔ.

 “Tuu nɔ fɛɛ nɔ ni ofeɔ lɛ owo NUŊTSƆ lɛ dɛŋ, ni ogbɛjianɔtoi lɛ baadamɔ shi shiŋŋ.”​—Abɛi 16:3, New International Version.

 Abɛ nɛɛ hãa mɛi ni jáa anɔkwa Nyɔŋmɔ lɛ náa hiɛnɔkamɔ akɛ, kɛ́ amɛkɛ amɛhiɛ fɔ̃ enɔ, ni amɛnyiɛ egbɛtsɔɔmɔi lɛ asɛɛ lɛ, amɛgbɛjianɔtoi baaye omanye.

 “Okɛ nɔ fɛɛ nɔ ni ofeɔ lɛ awo Yehowa dɛŋ.” Dani mɛi ni jáa Yehowa lɛ baakpɛ yiŋ ko lɛ, amɛjɛɔ heshibaa mli amɛbiɔ edɛŋ jɔɔmɔ. (Yakobo 1:5) Mɛni hewɔ? Yiŋtoo kome ji akɛ, bei pii lɛ gbɔmɛi nyɛɛɛ nibii ni baa amɛnɔ lɛ ahe nɔ ko amɛfee, ni kɛ́ amɛbɔ mɔdɛŋ aahu po lɛ, eshɛɛɛ he ko. (Jajelɔ 9:11; Yakobo 4:13-15) Kɛfata he lɛ, bei komɛi lɛ, amɛbɛ hiɛshikamɔ ni amɛkɛbaatsu amɛyiŋtoi nɛɛ ahe nii. Yiŋtoi nɛɛ ahewɔ lɛ, mɛi babaoo jɛɔ nilee mli amɛtuɔ nɔ fɛɛ nɔ ni amɛfeɔ lɛ amɛwoɔ Nyɔŋmɔ dɛŋ. Gbɛ kome ni amɛtsɔɔ nɔ amɛfeɔ enɛ ji, amɛsɔleɔ kɛbiɔ edɛŋ gbɛtsɔɔmɔ, ni amɛhiɔ shi yɛ esuɔmɔnaa nii ni eŋmala yɛ e-Wiemɔ ni ji Biblia lɛ mli lɛ anaa.​—Abɛi 3:5, 6; 2 Timoteo 3:16, 17.

 Wiemɔ ni ji, “tuu nɔ fɛɛ nɔ ni ofeɔ lɛ owo NUŊTSƆ lɛ dɛŋ” lɛ shishitsɔɔmɔ ŋmiiŋmi ji, “kokolomɔ onitsumɔi lɛ ofɔ̃ NUŊTSƆ lɛ nɔ.” Wolo ko tsɔɔ mli akɛ, wiemɔ nɛɛ feɔ “nuu ko ni kpɛ jatsu ko ni tsii waa yɛ esɛɛ, ni eejie jatsu lɛ eehã mɔ ko ni he wa fe lɛ ni baanyɛ akpɛ nakai jatsu lɛ jogbaŋŋ lɛ he mfoniri.” Mɛi ni jɛɔ heshibaa mli amɛkɛ amɛhiɛ fɔ̃ɔ Nyɔŋmɔ nɔ lɛ baanyɛ aná nɔmimaa akɛ, ebaaye ebua amɛ ni ewaje amɛ.​—Lala 37:5; 55:22.

 Wiemɔ ni ji, “nɔ fɛɛ nɔ ni ofeɔ lɛ,” etsɔɔɔ akɛ Nyɔŋmɔ baakpɛlɛ nɔ fɛɛ nɔ kɛkɛ ni mɛi kpɛɔ amɛyiŋ akɛ amɛbaafee lɛ nɔ loo akɛ ebaajɔɔ nɔ. Kɛ́ amɛbaaná Yehowa jɔɔmɔ lɛ, ja amɛgbɛjianɔtoi loo nibii ni amɛsumɔɔ akɛ amɛfee lɛ kɛ Yehowa shishitoo mlai kɛ esuɔmɔnaa nii kpãa gbee. (Lala 127:1; 1 Yohane 5:14) Nyɔŋmɔ ejɔɔɔ toigbele nɔ. Anɔkwa, “etswaa mɛi fɔji ayiŋtoi efɔ̃ɔ” loo etsɔɔ hiɛ ebuɔ shi. (Lala 146:9) Nakai beiaŋ nɔŋŋ lɛ, eyeɔ ebuaa mɛi ni hiɔ shi yɛ eshishitoo mlai ni yɔɔ Biblia lɛ mli lɛ anaa kɛtsɔɔ akɛ amɛbaa amɛhe shi amɛhãa lɛ lɛ.​—Lala 37:23.

 “Ni ogbɛjianɔtoi baaye omanye.” Wiemɔ shishitsɔɔlɔi komɛi tsɔɔ sane nɛɛ shishi akɛ “ni ogbɛjianɔtoi lɛ baadamɔ shi shiŋŋ.” Yɛ Hebri Ŋmalɛi lɛ, loo nɔ ni mɛi fɔɔ lɛ tsɛmɔ akɛ Kpaŋmɔ Momo lɛ mli lɛ, wiemɔ ni atsɔɔ shishi kɛba Ga mli akɛ “baadamɔ shi shiŋŋ” lɛ hiɛ shishinumɔ lɛ akɛ, aatswa faneshi ko, ni bei pii lɛ, ekɔɔ nibii ni Nyɔŋmɔ ebɔ ni ma shi shiŋŋ lɛ ahe. (Abɛi 3:19; Yeremia 10:12) Nakai nɔŋŋ ni Nyɔŋmɔ baahã mɛi ni feɔ nibii ni ja yɛ ehiɛ loo esuɔmɔnaa nii lɛ ayiŋtoi ama shi shiŋŋ, ni ebaahã amɛná shihilɛi ni yɔɔ shweshweeshwe ni yɔɔ miishɛɛ, ni ma shi shiŋŋ.​—Lala 20:4; Abɛi 12:3.

 Maŋtsɛ Solomon ji mɔ ni ŋma Abɛ nɛɛ, lɛ ji mɔ ni ŋma Abɛi awolo lɛ mli saji lɛ tsiimɔ. Enyɛ ebu abɛi akpei abɔ yɛ hiɛshikamɔ ni Nyɔŋmɔ kɛhã lɛ lɛ hewɔ.​—1 Maŋtsɛmɛi 4:29, 32; 10:23, 24.

 Yɛ yitso 16 lɛ mli lɛ, Solomon bɔi Nyɔŋmɔ hiɛshikamɔ lɛ yijiemɔ, ni etsɔɔ bɔ ni esumɔɔɔ henɔwolɔi kwraa. (Abɛi 16:1-5) No sɛɛ lɛ, yitso lɛ yeɔ ebuaa mɔ ni kaneɔ lɛ ni enuɔ anɔkwa sane ko ni jeɔ kpo shii abɔ yɛ Abɛi awolo lɛ mli lɛ shishi, no ji akɛ: Ja adesai eba amɛhe shi, ni amɛŋmɛ gbɛ ni Nyɔŋmɔ ekudɔ amɛnaji faamɔi dani amɛhiɛ baakã shi jogbaŋŋ ni amɛbaaye omanye. (Abɛi 16:3, 6-8, 18-23) Awie anɔkwa sane nɛɛ he shii abɔ yɛ Biblia lɛ mli.​—Lala 1:1-3; Yesaia 26:3; Yeremia 17:7, 8; 1 Yohane 3:22.

 Kwɛmɔ Abɛi awolo lɛ hiɛkpamɔ vidio kuku nɛɛ.