“Agbɛnɛ, mɔ ni yɛ ehewalɛ ni tsuɔ nii yɛ wɔmli lɛ naa lɛ, ebaanyɛ efee babaoo kɛteke nɔ, ni esaa eteke nɔ babaoo kwraa fe nibii ni wɔbiɔ loo ebaa wɔyiŋ lɛ.”​—Efesobii 3:20, 21, Jeŋ Hee Shishitsɔɔmɔ.

 “Shi mɔ ni nyɛɔ efeɔ kɛteke nɔ babaoo fe nii fɛɛ ni wɔkpaa he fai loo wɔjwɛŋɔ, yɛ ehewalɛ ni tsuɔ nii yɛ wɔmli lɛ naa lɛ, lɛ aŋɔ anunyam aha.”​—Efesobii 3:20, 21, Ga Biblia momo.

 Bɔfo Paulo wie wiemɔi nɛɛ kɛtsɔɔ akɛ eyɛ nɔmimaa akɛ Nyɔŋmɔ baanyɛ ehã etsuji lɛ asɔlemɔi ahetoo ni etsu nibii ni amɛkpaa gbɛ lɛ ahe nii ehã amɛ yɛ gbɛi ni ekolɛ amɛsusuko he dã po nɔ. Ebaanyɛ efee babaoo fe bɔ ni amɛkpaa gbɛ lɛ po ehã amɛ.

 “Agbɛnɛ, mɔ ni yɛ ehewalɛ ni tsuɔ nii yɛ wɔmli lɛ naa lɛ.” Kuku 21 lɛ hãa wɔleɔ akɛ “mɔ ni” lɛ ni akɛtsu nii yɛ kuku 20 lɛ mli lɛ ji Yehowa Nyɔŋmɔ. a Paulo ŋma yɛ jɛmɛ akɛ: “Lɛ atsɔ asafo lɛ kɛ agbɛnɛ hu Kristo Yesu nɔ akɛ anunyam lɛ ahã.” (Yohane 20:31) Kɛfata he lɛ, Nyɔŋmɔ baanyɛ ahã wɔ hewalɛ loo nyɛmɔ ni he hiaa wɔ lɛ koni wɔnyɛ wɔfee esuɔmɔnaa nii.​—Filipibii 4:13.

 Yɛ kuku 20 lɛ mli lɛ, bɔfo Paulo wie nɔ ko krɛdɛɛ yɛ nyɛmɔ ni Yehowa yɔɔ ni ebaanyɛ ekɛye ebua etsuji lɛ he. Wolo ko ni wieɔ Biblia lɛ he lɛ wie wiemɔ ni atsɔɔ shishi akɛ ‘mɔ ni baanyɛ’ lɛ he akɛ: “Kuku nɛɛ etsɔɔɔ kɛkɛ akɛ Nyɔŋmɔ baanyɛ afee nɔ ko, loo ekolɛ ebaafee, shi moŋ etsɔɔ akɛ eyɛ hewalɛ ni ekɛbaafee nakai nii lɛ.” Wɔnaanyo adesa ko ni sumɔɔ wɔsane lɛ baasumɔ ni eye ebua wɔ, shi jeee be fɛɛ be ebaanyɛ efee nakai; shi Yehowa lɛ lɛ, ebaanyɛ efee nɔ fɛɛ nɔ ni he hiaa kɛkwɛ etsuji ni ehã amɛsɔlemɔi lɛ ahetoo be fɛɛ be. Lɛ pɛ ehewalɛ kɛ enyɛmɔ etãaa.​—Yesaia 40:26.

 “[Nyɔŋmɔ] baanyɛ efee babaoo kɛteke nɔ, ni esaa eteke nɔ babaoo kwraa fe nibii ni wɔbiɔ loo ebaa wɔyiŋ lɛ.” Yehowa baanyɛ “efee babaoo kɛteke nɔ” ehã etsuji. Ebaanyɛ eye ebua amɛ yɛ gbɛi ni amɛjwɛŋmɔ shɛɛɛ he kwraa nɔ, loo ebaanyɛ eye ebua amɛ kwraa fe bɔ ni ekolɛ amɛkpaa gbɛ akɛ ebaafee amɛ ejurɔ.

 Wiemɔ ni ji “kwraa fe nibii ni wɔbiɔ loo ebaa wɔyiŋ lɛ” tsɔɔ wɔ nɔ kroko hu yɛ ŋmalɛ nɛɛ he. Wiemɔ ni bɔfo Paulo wie akɛ “kwraa fe nibii ni wɔbiɔ loo ebaa wɔyiŋ lɛ” tsɔɔ akɛ, eetao ni Kristofoi fɛɛ anu shishi akɛ Nyɔŋmɔ baanyɛ eye ebua amɛ yɛ gbɛi babaoo nɔ fe bɔ ni amɛkpaa gbɛ po. Biblia ni ji New International Version lɛ tsɔɔ kuku 20 lɛ klɛŋklɛŋ fã lɛ shishi akɛ: “Agbɛnɛ, mɔ ni nyɛɔ efeɔ babaoo ni anyɛŋ akane kwraa fe nibii fɛɛ ni wɔbiɔ loo ebaa wɔjwɛŋmɔ mli lɛ.” Bei komɛi lɛ, Kristofoi komɛi baanyɛ anu he akɛ amɛnaagbai lɛ dara tsɔ loo efa tsɔ bɔ ni anyɛŋ atsu he nii. Ekolɛ amɛleee nɔ ni amɛbaasɔle amɛbi po. Shi Yehowa yɛ nyɛmɔ ni husu bɛ he ni ebaanyɛ ekɛnu amɛshihilɛ lɛ shishi ni eye ebua amɛ. Ebaanyɛ etsu naagba fɛɛ naagba he nii yɛ ebe ni sa mli​—ni efeɔ nakai yɛ gbɛi ni amɛjwɛŋmɔ shɛɛɛ he loo ebako amɛjwɛŋmɔ mli dã po nɔ. (Hiob 42:2; Yeremia 32:17) Shi dani nakai be lɛ baashɛ lɛ, ehãa amɛ nyɛmɔ lɛ koni amɛnyɛ amɛfĩ shi kɛ miishɛɛ!​—Yakobo 1:2, 3.

 Efesobii Awolo lɛ ji wolo ni bɔfo Paulo ŋma kɛyahã Kristofoi ni hi shi yɛ Efeso maŋ lɛ ni yɔɔ Asia Bibioo lɛ; eyɛ ŋmɛnɛŋmɛnɛ beiaŋ Turkey maŋ lɛ mli. Yɛ wolo ni Paulo ŋma lɛ mli lɛ, ehã amɛle sɔlemɔ ni esɔleɔ ehãa amɛ lɛ. (Efesobii 3:14-21) Esɔle bɔ ni afee ni amɛ, kɛ yɛ gbɛ ko nɔ lɛ Kristofoi fɛɛ, abɔ mɔdɛŋ ni amɛkase bɔ ni Yesu kɛ suɔmɔ susuɔ nii ahe kɛ bɔ ni efeɔ enii ehãa lɛ koni amɛtsɔ no nɔ amɛle Kristo suɔmɔ lɛ. Be ni Paulo kɛ esɔlemɔ lɛ baa naagbee lɛ, ejie Nyɔŋmɔ yi ni ewie wiemɔi ni yɔɔ Efesobii 3:20, 21 lɛ kɛmu naa.

 Kwɛmɔ Efesobii awolo lɛ hiɛkpamɔ vidio kuku nɛɛ.