“Yɛ nɔ fɛɛ nɔ mli lɛ, mitsɔɔ mɔ ni wajeɔ mi lɛ nɔ mináa hewalɛ.”​—Filipibii 4:13, Jeŋ Hee Shishitsɔɔmɔ.

 “Minyɛɔ nii fɛɛ mifeɔ yɛ mɔ ni wajeɔ mi ni ji Kristo lɛ mli.”​—Filipibii 4:13, Ga Biblia momo.

 Wiemɔi nɛɛ ni bɔfo Paulo ŋma lɛ, hã mɛi ni jáa Nyɔŋmɔ lɛ ná nɔmimaa akɛ, Nyɔŋmɔ baahã amɛ hewalɛ koni amɛfee Nyɔŋmɔ suɔmɔnaa nii.

 Biblia shishitsɔɔmɔi komɛi kɛɛ Kristo ji mɔ ni hã Paulo hewalɛ lɛ. Shi wiemɔ ni ji “Kristo” lɛ ejeee kpo yɛ ŋmalɛ nɛɛ mli yɛ Greek wolokpoi ni etsɛ fe fɛɛ lɛ amli. No hewɔ lɛ, ŋmɛnɛŋmɛnɛ beiaŋ shishitsɔɔmɔi babaoo kɛ wiemɔi tamɔ “mináa hewalɛ” (Jeŋ Hee Shishitsɔɔmɔ), “mɔ ni wajeɔ mi” (Ga Biblia momo), kɛ “mɔ ni ji mihewalɛ jɛɛhe lɛ” (New American Bible) tsu nii. No hewɔ lɛ, no mli lɛ namɔ he Paulo wieɔ lɛ?

 Saji ni Paulo ŋma kɛtsɔ hiɛ yɛ nakai wolo ni eŋma lɛ nɔŋŋ mli lɛ tsɔɔ akɛ, no mli lɛ, Nyɔŋmɔ he ewieɔ lɛ. (Filipibii 4:6, 7, 10) Yɛ yitsei ni tsɔ hiɛ yɛ wolo ni Paulo ŋma kɛyahã Filipibii lɛ mli lɛ, eŋma akɛ: “Nyɔŋmɔ ji mɔ ni kanyaa nyɛ . . . ni ehãa nyɛnáa hewalɛ ni nyɛkɛaafee hu.” (Filipibii 2:13) Ni yɛ 2 Korintobii 4:7 lɛ eŋma akɛ, Nyɔŋmɔ ji mɔ ni hã lɛ hewalɛ ni ekɛtsu esɔɔmɔ nitsumɔ lɛ. (Okɛto 2 Timoteo 1:8 lɛ he.) Enɛ hewɔ lɛ, wɔyɛ yiŋtoi kpakpai ahewɔ ni wɔbaanyɛ wɔmu sane naa akɛ Nyɔŋmɔ ji mɔ ni hãa Paulo ‘náa hewalɛ’ lɛ.

 Mɛni Paulo tsɔɔ be ni eŋma akɛ abaawaje lɛ “yɛ nɔ fɛɛ nɔ mli” lɛ? Eeenyɛ efee akɛ, nibii ni Paulo wie he lɛ ji shihilɛi srɔtoi ni ekɛkpe be ni efeɔ Nyɔŋmɔ suɔmɔnaa nii lɛ. Heloonaa nibii ni eyɔɔ lɛ fa jio, efaaa jio, ekɛ ehiɛ fɔ̃ Nyɔŋmɔ nɔ akɛ ebaakwɛ lɛ. Paulo kase akɛ, ekɔɔɔ he eko shihilɛ mli ni ebaayaje lɛ, esa akɛ ehã ehiɛ asɔ nii.​—2 Korintobii 11:23-27; Filipibii 4:11.

 Paulo wiemɔi lɛ baanyɛ awo Nyɔŋmɔ jálɔi ni yɔɔ ŋmɛnɛ lɛ hewalɛ. Nyɔŋmɔ baahã amɛ hewalɛ ni he hiaa amɛ lɛ koni amɛná ekãa kɛkpee kai anaa ni amɛfee esuɔmɔnaa nii. Nyɔŋmɔ baatsɔ emumɔ krɔŋkrɔŋ lɛ, loo ehewalɛ ni miitsu nii lɛ, etsuji krokomɛi, kɛ e-Wiemɔ ni ji Biblia lɛ nɔ ewo wɔ hewalɛ.​—Luka 11:13; Bɔfoi 14:21, 22; Hebribii 4:12.

 Wiemɔi nɛɛ fata naagbee wolo ni Paulo ŋma kɛyahã Kristofoi ni yɔɔ Filipi lɛ he. Eŋma wolo nɛɛ aaafee afi 60 kɛmiimɔ afi 61 Ŋ.B., be ni awo lɛ tsuŋ klɛŋklɛŋ kwraa yɛ Roma lɛ. Be ko bashɛ ni Kristofoi ni yɔɔ Filipi lɛ nyɛɛɛ amɛkɛ heloonaa nibii aye abua Paulo. Shi sɛɛ mli lɛ, amɛkɛ heloonaa nibii ni he baahia Paulo lɛ bɔi lɛ majemɔ akɛ nikeenii.​—Filipibii 4:10, 14.

 Paulo jie Kristofoi ni yɔɔ Filipi lɛ ayi yɛ ejurɔ ni amɛfee lɛ he, ni ema nɔ mi ehã amɛ akɛ ená nɔ fɛɛ nɔ ni he hiaa lɛ. (Filipibii 4:18) Agbɛnɛ hu, eŋɔ hegbɛ lɛ ni ekɛtsɔɔ amɛ anɔkwale ko ni kɔɔ bɔ ni esa akɛ Kristofoi ahi shi ahã lɛ he: No ji, Kristofoi fɛɛ, ohiafoi jio, shikatsɛmɛi jio, amii baanyɛ ashɛ nii ni amɛyɔɔ lɛ he kɛ́ amɛkɛ amɛhiɛ fɔ̃ Nyɔŋmɔ nɔ.​—Filipibii 4:12.