“Hemɔkɛyeli ji nɔmimaa ni akɛkwɛɔ nii ni hiɛ kã nɔ lɛ gbɛ, eji nii ni anaaa lɛ ahe odaseyeli ni yɔɔ faŋŋ.”​—Hebribii 11:1, Jeŋ Hee Shishitsɔɔmɔ.

 “Shi hemɔkɛyeli ji nii ni mɛi ahiɛ kã nɔ lɛ anɔ hewalɛnamɔ kɛ nii ni anaaa lɛ anɔmimaa.”​—Hebribii 11:1, Ga Biblia momo.

 Ŋmalɛ nɛɛ kɛ wiemɔ kuku tsɔɔ hemɔkɛyeli mli, ni efeɔ lɛ faŋŋ akɛ hemɔkɛyeli yaa shɔŋŋ fe ni abaahe nɔ ko aye kɛkɛ.

 “Hemɔkɛyeli ji nɔmimaa ni akɛkwɛɔ nii ni hiɛ kã nɔ lɛ gbɛ.” Greek wiemɔ ni akɛtsu nii yɛ Hebribii 11:1 lɛ, ni atsɔɔ shishi akɛ hemɔkɛyeli lɛ tsɔɔ ekãa, hekɛnɔfɔ̃ɔ, loo yiŋtsɔmɔ ni yɔɔ shiŋŋ. Nakai hemɔkɛyeli lɛ damɔɔɔ nii ni wɔmiitao ni eba mli lɛ nɔ; eji nɔmimaa ni akɛkwɛɔ nii ni hiɛ kã nɔ lɛ gbɛ.” Abaanyɛ atsɔɔ Greek wiemɔ ni atsɔɔ shishi akɛ “nɔmimaa ni akɛkwɛɔ” a nɔ ko gbɛ lɛ hu shishi akɛ wolo ni yeɔ odase akɛ nɔ ko ji mɔ ko nɔ.

 “Hemɔkɛyeli ji . . . nii ni anaaa lɛ ahe odaseyeli ni yɔɔ faŋŋ [loo, “odaseyeli ni hãa mɔ yiŋ tsɔɔ,” shishigbɛ niŋmaa].” Hemɔkɛyeli damɔ odaseyeli ni yɔɔ faŋŋ nɔ. Nakai odaseyeli lɛ mli wa aahu akɛ enyɛɔ etsɔɔ mɔ lɛ yiŋ akɛ, eyɛ mli akɛ enaaa nɔ ko moŋ nɛ, shi nakai nii lɛ yɛ.

 Paulo ŋma Biblia wolo ni ji Hebribii lɛ kɛyahã klɛŋklɛŋ afii oha lɛ mli Kristofoi, ni hi Yerusalem kɛ ehewɔŋ maji lɛ amli lɛ. Yɛ yitso nɛɛ mli lɛ, Paulo wie nɔ hewɔ ni hemɔkɛyeli he hiaa lɛ he. Akɛ nɔkwɛmɔnɔ lɛ, eŋma akɛ: “Kɛ́ hemɔkɛyeli bɛ lɛ, anyɛŋ asa Nyɔŋmɔ hiɛ jogbaŋŋ, ejaakɛ mɔ fɛɛ mɔ ni bɛŋkɛɔ Nyɔŋmɔ lɛ, esa akɛ ehe eye akɛ eyɛ, ni eji mɛi ni kɛ hiɛdɔɔ taoɔ esɛɛ gbɛ lɛ ajwerelɔ.” (Hebribii 11:6) Be ni Paulo tsɔɔ nɔ ni hemɔkɛyeli ji lɛ mli yɛ Hebribii 11:1 lɛ, etsĩ hii kɛ yei komɛi ni awie amɛhe yɛ Biblia lɛ mli ni amɛkɛ amɛnifeemɔi tsɔɔ akɛ amɛyɛ hemɔkɛyeli lɛ atã. Etsɔɔ bɔ amɛhã amɛnifeemɔi kɛ Nyɔŋmɔ suɔmɔnaa nii kpã gbee kɛtsɔɔ akɛ amɛyɛ hemɔkɛyeli.​—Hebribii 11:4-38.