BIBLIA MLI ŊMALƐI NI AGBALA MLI
Kolosebii 3:23—“Nɔ Fɛɛ Nɔ Ni Nyɛfeɔ Lɛ, Nyɛkɛ Nyɛtsui Muu Fɛɛ Atsua”
“Nɔ fɛɛ nɔ ni nyɛfeɔ lɛ, nyɛkɛ nyɛsusuma muu fɛɛ atsua tamɔ Yehowa nyɛtsuɔ nyɛhãa, shi jeee gbɔmɛi.”—Kolosebii 3:23, Jeŋ Hee Shishitsɔɔmɔ.
“Nɔ fɛɛ nɔ ni nyɛfeɔ lɛ, nyɛkɛ nyɛtsui muu fɛɛ atsua taakɛ Yehowa nyɛtsuɔ nyɛhãa, shi jeee gbɔmɛi.”—Kolosebii 3:23, Ga Biblia momo.
Nɔ Ni Kolosebii 3:23 Lɛ Tsɔɔ
Esa akɛ Kristofonyo abɔ mɔdɛŋ ni efee ehe mɔ ni tsuɔ nii waa, ejaakɛ bɔ ni enaa nitsumɔ ehãa lɛ kɛ jamɔ ni ekɛhãa Yehowa Nyɔŋmɔ lɛ yɛ tsakpãa.
“Nɔ fɛɛ nɔ ni nyɛfeɔ lɛ.” Mɛi fɛɛ ni miisumɔ ni amɛjá Yehowa lɛ bɔɔ mɔdɛŋ ni amɛkɛ nɔ ni Biblia lɛ kɛɔ lɛ atsu nii yɛ nɔ fɛɛ nɔ ni amɛfeɔ lɛ mli. Amɛbɔɔ mɔdɛŋ amɛtsuɔ nii waa, amɛyeɔ anɔkwa, ni anyɛɔ amuɔ afɔ̃ɔ amɛnɔ hu yɛ nɔ fɛɛ nɔ ni amɛfeɔ yɛ shĩa, yɛ nitsumɔhe, kɛ skul lɛ mli.—Abɛi 11:13; Romabii 12:11; Hebribii 13:18.
“Nyɛkɛ nyɛtsui muu fɛɛ atsua.” Atsɔɔ wiemɔ ni ji, “nyɛkɛ nyɛtsui muu fɛɛ atsua” lɛ shishi kɛjɛ Greek wiemɔ ko ni tsɔɔ “bɔ ni mɔ ko tswaa efai shi akɛ, ekɛ enyɛmɔ fɛɛ baatsu nɔ ni Nyɔŋmɔ biɔ yɛ edɛŋ lɛ mli.”
No hewɔ lɛ, mɔ ko ni tamɔ nɛkɛ lɛ bɔɔ mɔdɛŋ ekɛ ehewalɛ fɛɛ kɛ ejwɛŋmɔ fɛɛ tsuɔ nitsumɔ ni akɛwo edɛŋ lɛ jogbaŋŋ.
“Tamɔ Yehowa nyɛtsuɔ nyɛhãa, shi jeee gbɔmɛi.” Nɔ fɛɛ nɔ ni Kristofoi feɔ loo amɛtsuɔ lɛ, amɛkɛ hiɛdɔɔ tsuɔ, ejaakɛ amɛle akɛ bɔ ni amɛtsuɔ lɛ amɛhãa lɛ saa naanyobɔɔ ni yɔɔ amɛ kɛ Nyɔŋmɔ teŋ lɛ he. Mɔ titri ni amɛsumɔɔ akɛ amɛsa ehiɛ ji Nyɔŋmɔ, jeee nitsumɔtsɛ ko loo gbɔmɔ ko. Kɛ́ Kristofonyo ko tsuɔ nii waa ni ejieɔ sui kpakpai hu akpo lɛ, jeee lɛ pɛ eyi mɛi jieɔ, amɛjieɔ Nyɔŋmɔ ni ejáa lɛ hu yi. Nɛkɛ gbɛ nɔ Kristofonyo tsɔɔ ekwɛɔ “koni mɔ ko akawie Nyɔŋmɔ gbɛ́i lɛ . . . he efɔŋ ko kwraa.”—1 Timoteo 6:1; Kolosebii 3:22.
Saji Ni Kɔɔ Kolosebii 3:23 Lɛ He
Bɔfo Paulo ŋma Biblia mli wolo ni ji Kolosebii lɛ eyahã Kristofoi ni hi shi yɛ blema maŋtiase ni ji Kolose lɛ. a Eeenyɛ efee akɛ eŋma wolo nɛɛ be ni awo lɛ tsuŋ klɛŋklɛŋ yɛ Roma, be ni eshwɛ fioo ni abaajie lɛ lɛ, aafee afi 60-61 Ŋ.B.
Kolosebii awolo lɛ mli eyi obɔ kɛ ŋaawoi ni baanyɛ aye abua Kristofoi fɛɛ ni jɛ shihilɛi srɔtoi amli koni amɛnyɛ amɛfee ekome kɛjá Nyɔŋmɔ. (Kolosebii 3:11) Ewoɔ amɛ hewalɛ koni amɛkase Nyɔŋmɔ sui, tamɔ suɔmɔ, mlihilɛ, kɛ mɔbɔnalɛ, ni amɛjie sui nɛɛ akpo yɛ amɛshihilɛ mli. (Kolosebii 3:12-14) Agbɛnɛ hu, ehãa anaa bɔ ni jamɔ ni mɔ ko kɛhãa Nyɔŋmɔ lɛ saa eshihilɛ mli nɔ fɛɛ nɔ he ehãa.—Kolosebii 3:18–4:1.
Kwɛmɔ Kolosebii awolo lɛ hiɛkpamɔ vidio kuku nɛɛ.
a Aná kɛjɛ wolo ni ji Exegetical Dictionary of the New Testament, 1993, Volume 3, baafa 502 lɛ mli.
Eyɛ he ni ŋmɛnɛ beiaŋ maŋ ni ji Turkey yɔɔ lɛ.
Ekolɛ Obaasumɔ Enɛ Hu
BUU-MƆƆ
Obaanyɛ Onya Nitsumɔ ni Wa He
Susumɔ gbɛi komɛi ni Biblia lɛ tsɔɔ akɛ obaanyɛ otsɔ nɔ oná onitsumɔ he miishɛɛ lɛ he.
BIBLIA MLI ŊMALƐI NI AGBALA MLI
Filipibii 4:6, 7 Mligbalamɔ—“Nyɛkahaoa Yɛ Nɔ Ko Nɔ Ko He”
Mɛɛ sɔlemɔ henɔi baanyɛ aye abua mɛi ni jáa Nyɔŋmɔ lɛ koni amɛkaye amɛtsui ni amɛná toiŋjɔlɛ?
BIBLIA TSƆƆMƆI
Nibii Kɛhã Biblia Kasemɔ
Okɛ nibii ni afee kɛhã Biblia kasemɔ ni baahã otsui anyɔ omli beni okaseɔ nii, ni baawo bo hewalɛ hu lɛ atsu nii kɛkase Biblia lɛ.
BIBLIA TSƆƆMƆI
Kaa Wɔ-Biblia Kasemɔ Lɛ Okwɛ
Biblia kasemɔ ni baafee sanegbaa ni mɔ ko baawa bo; aheee shika.
