“Omii ashɛ ohe waa yɛ Yehowa hewɔ, ni ebaahã bo nibii ni otsui taoɔ lɛ.”​—Lala 37:4, Jeŋ Hee Shishitsɔɔmɔ.

 “Omii ashɛ ohe yɛ NUŊTSƆ lɛ hewɔ, ni ebaahã bo nibii ni otsui taoɔ lɛ.”​—Lala 37:4, English Standard Version.

 Lalatsɛ lɛ wo Nyɔŋmɔ jálɔi hewalɛ koni amɛkɛ Nyɔŋmɔ abɔ naanyo kpaakpa, ni no ahã amɛmii ashɛ amɛhe. Mɛi fɛɛ ni kɛ Yehowa a Nyɔŋmɔ bɔɔ naanyo kpaakpa lɛ baanyɛ aná nɔmimaa akɛ, ebaahã amɛ nibii ni sa ni amɛtao lɛ.

 “Omii ashɛ ohe waa yɛ Yehowa hewɔ.” Abaanyɛ atsɔɔ wiemɔ nɛɛ shishi hu akɛ “hã Yehowa ahã omii ashɛ ohe waa,” “omii ashɛ ohe yɛ NUŊTSƆ lɛ ni osɔmɔɔ lɛ hewɔ,” loo “omii ashɛ ohe yɛ nɔ ni NUŊTSƆ lɛ ewo shi akɛ ebaahã bo lɛ hewɔ.” Yɛ kukufoo mli lɛ, kɛ́ wɔjáa anɔkwa Nyɔŋmɔ lɛ, ‘ebaahã wɔmii ashɛ wɔhe waa.’ (Lala 37:4, shishigbɛ niŋmaa) Mɛni hewɔ wɔkɛɔ nakai?

 Mɛi ni jáa Yehowa lɛ susuɔ nii ahe bɔ ni Yehowa susuɔ nii ahe lɛ nɔŋŋ, tamɔ wɔnaa yɛ Biblia lɛ mli lɛ. Amɛle Nyɔŋmɔ, shi jeee no pɛ kɛkɛ, amɛle hu akɛ nilee yɛ mli akɛ amɛbaabo lɛ toi. Ni no hãa amɛnáa henilee kpakpa ni amɛyeɔ amɛhe kɛjeɔ tɔ̃mɔi kɛ yiŋ gbohii ni akpɛɔ lɛ ahe. (Abɛi 3:5, 6) Akɛ nɔkwɛmɔnɔ lɛ, kɛ́ efee tamɔ hiɛkɔ̃lɔi loo mɛi ni yeee anɔkwa lɛ miiye omanye yɛ shihilɛ mli lɛ, Nyɔŋmɔ webii lɛ hãaa no agba amɛnaa, amɛmli afu loo amɛhiɛ akɔ̃ mɛi lɛ anɔ, koni no afite miishɛɛ ni amɛyɔɔ lɛ. (Lala 37:1, 7-9) Nyɔŋmɔ webii lɛ yɛ miishɛɛ, ejaakɛ amɛle akɛ etsɛŋ Nyɔŋmɔ baafo jalɛsane ni ayeee lɛ fɛɛ sɛɛ ni ebaajuro anɔkwafoi lɛ yɛ amɛjeŋba kpakpa lɛ hewɔ. (Lala 37:34) Agbɛnɛ hu, amɛmii shɛɔ amɛhe waa ejaakɛ, amɛle akɛ amɛŋwɛi Tsɛ lɛ yɛ amɛhe miishɛɛ.​—Lala 5:12; Abɛi 27:11.

 “Ebaahã bo nibii ni otsui taoɔ lɛ.” Abaanyɛ atsɔɔ wiemɔi nɛɛ shishi hu akɛ, “ebaahã osɔlemɔi lɛ ahetoo” loo “ebaahã bo nɔ ni otsui shweɔ waa lɛ.” Anɔkwa sane ji akɛ, jeee nɔ fɛɛ nɔ kɛkɛ ni wɔbiɔ lɛ Yehowa baahã wɔ. Bɔ ni fɔlɔ kpakpa le nɔ ni hi fe fɛɛ kɛhã ebii lɛ, nakai nɔŋŋ Yehowa hu le nɔ ni hi fe fɛɛ kɛhã wɔ. Agbɛnɛ hu, esa akɛ wɔnibimɔi lɛ kɛ bɔ ni wɔhiɔ shi wɔhãa lɛ kɛ egbɛtsɔɔmɔi kɛ esuɔmɔ naa nii akpã gbee. (Abɛi 28:9; Yakobo 4:3; 1 Yohane 5:14) Kɛ́ wɔfee nakai lɛ, wɔbaanyɛ wɔbɛŋkɛ “sɔlemɔ Toibolɔ” lɛ kɛ hekɛnɔfɔɔ akɛ ebaabo wɔ toi.​—Lala 65:2; Mateo 21:22.

 Maŋtsɛ David ni hi shi yɛ blema Israel lɛ ji mɔ ni fo Lala 37 lɛ. Eto lala nɛɛ naa tamɔ bɔ ni atoɔ alfabɛtai anaa lɛ. b

 Akɛ David yeee jogbaŋŋ yɛ shihilɛi babao amli. Maŋtsɛ Saul kɛ mɛi krokomɛi ni miitao lɛ agbe lɛ, gbɔbi lɛ tamɔ agbɔbiɔ kooloo lɛ. (2 Samuel 22:1) Fɛɛ sɛɛ lɛ, David tee nɔ ekɛ ehiɛ fɔ̃ Yehowa nɔ kwraa. David le akɛ bɔ fɛɛ bɔ ni fee lɛ, wɔsɛɛ ko lɛ, Yehowa baagbala mɛi fɔji atoi. (Lala 37:10, 11) Kɛ́ efee tamɔ nɔ ni amɛye omanye loo amɛfee frɔ̃frɔ “tamɔ jwɛi fɔ” po lɛ, naagbee mli aahu lɛ amɛbaaŋala.​—Lala 37:2, 20, 35, 36.

 Lala 37 lɛ kɛ nɔ ni baaba mɛi ni kɛ Nyɔŋmɔ mlai lɛ tsuɔ nii lɛ anɔ lɛ toɔ nɔ ni baaba mɛi ni kɛ Nyɔŋmɔ mlai lɛ tsuuu nii lɛ anɔ lɛ he. (Lala 37:16, 17, 21, 22, 27, 28) No hewɔ lɛ, lala lɛ yeɔ ebuaa wɔ ni wɔhiɛ akã shi ni wɔhi shi akɛ mɛi ni Nyɔŋmɔ náa amɛhe miishɛɛ.

 Kwɛmɔ Lalai awolo lɛ hiɛkpamɔ vidio kuku nɛɛ.