“Be ni ato lɛ eshɛ, ni Nyɔŋmɔ Maŋtsɛyeli lɛ eshɛ shi etã. Nyɛtsakea nyɛtsui, ni nyɛnáa hemɔkɛyeli yɛ sane kpakpa lɛ mli.”​—Marko 1:15, Jeŋ Hee Shishitsɔɔmɔ.

 “Be lɛ eshɛ, ni Nyɔŋmɔ maŋtsɛyeli lɛ enina nyɛ: nyɛtsakea nyɛtsuiiaŋ, ni nyɛhea sanekpakpa lɛ nyɛyea!”​—Marko 1:15, Ga Biblia Momo.

 Yesu Kristo kɛɛ mɛi ni boɔ lɛ toi lɛ akɛ Nyɔŋmɔ Maŋtsɛyeli a lɛ “ebɛŋkɛ” loo “eshɛ shi etã” ejaakɛ no mli lɛ, lɛ mɔ ni baafee nakai Maŋtsɛyeli lɛ nɔ maŋtsɛ lɛ fata amɛhe yɛ jɛmɛ.

 Nɔ ni Yesu wie lɛ etsɔɔɔ akɛ no mli lɛ, Nyɔŋmɔ Maŋtsɛyeli lɛ ebɔi nɔyeli. Anɔkwa, sɛɛ mli lɛ ehã ekaselɔi lɛ le akɛ, Nyɔŋmɔ Maŋtsɛyeli lɛ baaba wɔsɛɛ. (Bɔfoi 1:6, 7) Kɛ̃lɛ, Yesu eba yɛ be naa yɛ afi tuuntu ni Biblia lɛ gba akɛ ebaapue akɛ mɔ ni baaye maŋtsɛ wɔsɛɛ lɛ nɔ. b Enɛ hewɔ lɛ, Yesu nyɛ ewie akɛ: “Be ni ato lɛ eshɛ”​—ni ji be ni ekɛ baabɔi esɔɔmɔ nitsumɔ lɛ, ni kɔɔ maŋtsɛyeli lɛ he sane kpakpa lɛ shiɛmɔ lɛ he lɛ eshɛ.​—Luka 4:16-21, 43.

 Dani mɛi ni boɔ Yesu toi lɛ baaná Maŋtsɛyeli lɛ he sane kpakpa lɛ he sɛɛ lɛ, esa akɛ amɛtsake amɛtsui, ni tsɔɔ akɛ amɛshwa amɛhe yɛ amɛtsutsu eshai lɛ ahe, ni amɛhi shi yɛ Nyɔŋmɔ shishitoo mlai lɛ anaa. Mɛi ni tsake amɛtsui lɛ kɛ amɛnifeemɔ tsɔɔ akɛ, amɛyɛ hemɔkɛyeli yɛ sane kpakpa ni kɔɔ nakai Maŋtsɛyeli ni baaba wɔsɛɛ lɛ he lɛ mli.

 Yesu wie sane nɛɛ yɛ Galilea be ni eje esɔɔmɔ nitsumɔ lɛ shishi lɛ. Be ni Mateo 4:17 lɛ bɔɔ nakai sane kome too lɛ nɔŋŋ he amaniɛ lɛ, ewie akɛ, “kɛjɛ nakai be lɛ nɔ kɛyaa lɛ,” Yesu bɔi Nyɔŋmɔ Maŋtseyeli lɛ he sane lɛ shiɛmɔ. Maŋtsɛyeli lɛ ji sane titri ni Yesu wie he yɛ esɔɔmɔ nitsumɔ lɛ mli. Anɔkwa, atsĩ Maŋtsɛyeli lɛ tã nɔ ni fe shii oha yɛ Sane Kpakpai c ejwɛ lɛ amli, ni babaoo lɛ Yesu ji mɔ ni tsĩ tã. Kɛ́ okwɛ Biblia lɛ mli fɛɛ lɛ, onaa akɛ Yesu wie Nyɔŋmɔ Maŋtsɛyeli lɛ he babaoo fe bɔ ni ewie nibii krokomɛi ahe.