“Nyɛkayea nyɛtsui yɛ wɔ́ he kɔkɔɔkɔ, ejaakɛ wɔ́ hu kɛ lɛ diɛŋtsɛ etsuiyelii baaba. Gbi fɛɛ gbi kɛ emli naagbai.”​—Mateo 6:34, Jeŋ Hee Shishitsɔɔmɔ.

 “Nyɛkahaoa nyɛhe nyɛtoa wɔ́; ejaakɛ wɔ́ diɛŋtsɛ aaahao yɛ enii ahe. Gbi fɛɛ gbi nɔ efɔŋ lɛ fá hã lɛ.”​—Mateo 6:34, Ga Biblia Momo.

 Yesu, ni ji mɔ ni wie wiemɔi nɛɛ fee lɛ faŋŋ ehã etoibolɔi lɛ akɛ, ehe ehiaaa akɛ amɛhaoɔ amɛhe fe nine loo amɛyeɔ amɛtsui tsɔ yɛ wɔsɛɛ naagbai ahe. Moŋ lɛ, kɛ́ amɛtsu gbi fɛɛ gbi kɛ emli naagbai ahe nii, ni amɛhaooo amɛhe fe nine yɛ wɔ́ he lɛ, no baaye ebua amɛ.

 Nɔ ni Yesu wie lɛ etsɔɔɔ akɛ wɔkajwɛŋ wɔ́ he kɔkɔɔkɔ loo wɔkato gbɛjianɔ kɛhã wɔ́ sɛɛ. (Abɛi 21:5) Moŋ lɛ, eeye eebua wɔ ni wɔkahao wɔhe fe nine, loo wɔkaye wɔtsui tsɔ yɛ nɔ ni ekolɛ wɔsusuɔ akɛ ebaaba wɔ́ sɛɛ lɛ he. Kɛ́ wɔhao wɔhe fe nine yɛ wɔ́ he lɛ, ebaanyɛ ehã wɔmiishɛɛ atã ni wɔnyɛŋ wɔkɛ wɔjwɛŋmɔ ama nibii ni esa akɛ wɔfee lɛ nɔ. Wɔnyɛŋ wɔhao wɔhe ŋmɛnɛ kɛtsu naagbai ni nako aba lɛ ahe nii. Ni bei pii lɛ, nɔ ni wɔhaoɔ wɔhe yɛ he lɛ baaa mli, loo bei komɛi po lɛ, efeee naagba wulu tamɔ bɔ ni wɔsusu lɛ.

 Yesu wiemɔi nɛɛ fata e-Gɔŋ Nɔ Shiɛmɔ ni ehé gbɛ́i waa ni abɔ he amaniɛ yɛ Mateo yitso 5-7 lɛ he. Be ni Yesu hãa wiemɔ nɛɛ, egbala mli akɛ kɛ́ wɔye wɔtsui lɛ no hãaa wɔshihilɛ ahi loo wɔwala sɛɛ atsɛ. (Mateo 6:27) Ehã wɔle hu akɛ, kɛ́ wɔkɛ Nyɔŋmɔ ye klɛŋklɛŋ gbɛhe yɛ wɔshihilɛ mli lɛ, ehe ebahiaŋ ni wɔhao wɔhe fe nine yɛ wɔ́ he. Akɛni Nyɔŋmɔ kwɛɔ tsei kɛ kooloi lɛ hewɔ lɛ, ebaakwɛ etsuji fɛɛ ni sɔmɔɔ lɛ lɛ.​—Mateo 6:25, 26, 28-33.