“Gbɔmɔ, ekɛɛ bo nɔ ni hi. Ni mɛni Yehowa taoɔ yɛ odɛŋ? No kɛkɛ ji akɛ, oye jalɛ sane, osumɔ anɔkwayeli, ní okɛ o-Nyɔŋmɔ lɛ anyiɛ yɛ heshibaa mli!”​—Mika 6:8, Jeŋ Hee Shishitsɔɔmɔ.

 “Gbɔmɔ, ajaje nɔ ni hi kɛ nɔ ni Yehowa biɔ yɛ odɛŋ atsɔɔo: no ji akɛ ofee nɔ ni ja gbɛ, ní osumɔ ejurɔfeemɔ, ní okɛ o-Nyɔŋmɔ lɛ anyiɛ yɛ heshibaa mli.”​—Mika 6:8, Ga Biblia momo.

 Gbalɔ Mika tsɔɔ mli akɛ, ewaaa tsɔ akɛ gbɔmɛi baasa Yehowa a Nyɔŋmɔ hiɛ. (1 Yohane 5:3) Amu nɔ ni Nyɔŋmɔ kpaa gbɛ yɛ wɔdɛŋ lɛ naa kuku yɛ saji etɛ ni akɛtsu nii yɛ Ŋmalɛ nɛɛ mli lɛ mli. Klɛŋklɛŋ saji enyɔ lɛ kɔɔ bɔ ni adesai kɛ amɛhe yeɔ ehãa lɛ he, nɔ ni ji etɛ lɛ kɔɔ adesa kɛ Nyɔŋmɔ teŋ naanyobɔɔ lɛ he.

 “Oye jalɛ sane.” Nyɔŋmɔ biɔ ni mɛi ni jáa lɛ lɛ aye jalɛ sane ni amɛkakwɛ hiɛiaŋ. Enɛ tsɔɔ akɛ esa akɛ wɔsusumɔi kɛ wɔnifeemɔi kɛ Nyɔŋmɔ gbɛtsɔɔmɔi yɛ nɔ ni ja kɛ nɔ ni ejaaa he lɛ akpã gbee. (5 Mose 32:4) Akɛ nɔkwɛmɔnɔ lɛ, mɛi ni kɛ Nyɔŋmɔ shishitoo mlai tsuɔ nii lɛ bɔɔ mɔdɛŋ amɛyeɔ mɛi fɛɛ anɔkwa ni amɛkwɛɛɛ hiɛiaŋ, ekɔɔɔ he eko shihilɛ mli ni amɛjɛ, maŋ nɔ ni amɛjɛ, loo bɔ ni ale amɛ ahã.​—3 Mose 19:15; Yesaia 1:17; Hebribii 13:18.

 “Osumɔ anɔkwayeli.” Abaanyɛ atsɔɔ sane nɛɛ shishi hu akɛ ‘suɔmɔ suɔmɔ ni tsakeee.’ (Mika 6:8, shishigbɛ niŋmaa) Yɛ Hebri wiemɔ mli lɛ, wiemɔ ni akɛtsu nii ahã “anɔkwayeli” lɛ yaa shɔŋŋ fe ni abaaye mɔ ko anɔkwa kɛkɛ, ebiɔ ni ajie mlihilɛ kɛ mɔbɔnalɛ kpo atsɔɔ mɔ ko fe bɔ ni mlai biɔ lɛ po. Nyɔŋmɔ biɔ ni mɛi ni miisumɔ ni amɛsa ehiɛ lɛ ajie mlihilɛ kɛ mɔbɔnalɛ kpo ni amɛsumɔ sui nɛɛ hu. Enɛ tsɔɔ akɛ, esa akɛ mɛi ni miijá Nyɔŋmɔ lɛ aná he miishɛɛ akɛ amɛbaaye amɛbua mɛi krokomɛi titri lɛ mɛi ni efi amɛ lɛ. Kɛ́ wɔfee mɛi ejurɔ lɛ, wɔnáa miishɛɛ.​—Bɔfoi 20:35.

 “Okɛ o-Nyɔŋmɔ lɛ anyiɛ yɛ heshibaa mli!” Yɛ Biblia lɛ mli lɛ, kɛ́ akɛ wiemɔ “anyiɛ” lɛ tsu nii lɛ, ebaanyɛ etsɔɔ akɛ “aja nifeemɔ ko sɛɛ mo.” Kɛ́ mɔ ko hiɔ shi yɛ gbɛ ni sa Nyɔŋmɔ hiɛ lɛ nɔ lɛ belɛ, ekɛ Nyɔŋmɔ miinyiɛ. Noa fee enɛ he nɔkwɛmɔnɔ. Ekɛ anɔkwa Nyɔŋmɔ lɛ nyiɛ ejaakɛ ehi shi akɛ mɔ ni sane ko bɛ ehe yɛ eyinɔ bii lɛ ateŋ.” (1 Mose 6:9) Ŋmɛnɛ lɛ, wɔkɛ Nyɔŋmɔ nyiɛɔ kɛ́ wɔhi shi yɛ etsɔɔmɔi ni yɔɔ Biblia lɛ mli lɛ anaa. Enɛ biɔ ni wɔkɛ heshibaa akpɛlɛ nɔ akɛ wɔnyɛmɔi yawaa he ko, ni esa akɛ wɔkɛ wɔhiɛ afɔ̃ Nyɔŋmɔ nɔ be fɛɛ be yɛ nɔ fɛɛ nɔ mli.​—Yohane 17:3; Bɔfoi 17:28; Kpojiemɔ 4:11.

 Mika sɔmɔ akɛ gbalɔ yɛ blema Israel kɛjɛ afi 777 kɛyashi afi 717 D.Ŋ.B. afii lɛ amli. No mli lɛ, shikpɔŋ lɛ nɔ eyi obɔ kɛ wɔŋjamɔ, ojotswaa, kɛ yiwaa. (Mika 1:7; 3:1-3, 9-11; 6:10-12) Israelbii lɛ pii ku amɛhiɛ amɛshwie Nyɔŋmɔ taomɔ nii ni akɛhã amɛ yɛ mla ni akɛhã Mose lɛ mli lɛ nɔ, atsɛ mla nɛɛ akɛ Mose Mla lɛ. Yɛ nakai beiaŋ nɔŋŋ lɛ, mɛi babaoo yaná susumɔ ni ejaaa akɛ kɛ́ amɛkɛ amɛhe wo jamɔ nifeemɔi amli kɛkɛ ni amɛshã shãa afɔlei lɛ Nyɔŋmɔ baakpɛlɛ amɛnɔ.​—Abɛi 21:3; Hosea 6:6; Mika 6:6, 7.

 Mika gbele sɛɛ afii ohai komɛi lɛ, Yesu tĩ nakai sane lɛ mli ekoŋŋ, ekɛɛ mɛi ni jieɔ suɔmɔ kpo, amɛyeɔ jalɛ sane, ni amɛnaa mɔbɔ lɛ ji mɛi ni e-Tsɛ lɛ náa amɛhe miishɛɛ, shi enáaa mɛi ni jáa lɛ hiɛiaŋhiɛiaŋ lɛ ahe miishɛɛ. (Mateo 9:13; 22:37-39; 23:23) Yesu wiemɔi lɛ yeɔ ebuaa wɔ ni wɔnaa nɔ ni etaoɔ yɛ mɛi ni jáa lɛ ŋmɛnɛ lɛ adɛŋ.

 Kwɛmɔ Mika wolo lɛ hiɛkpamɔ vidio lɛ.