BIBLIA ŊMALƐI NI AGBALA MLI
Yeremia 29:11—“Mile Jwɛŋmɔi Ní Mijwɛŋɔ Yɛ Nyɛhe”
“‘Mile jwɛŋmɔi ni mijwɛŋɔ yɛ nyɛhe lɛ jogbaŋŋ,’ Yehowa a kɛɛ, ‘toiŋjɔlɛ jwɛŋmɔi ni, shi jeee sane fɔŋ, koni ahi ahã nyɛ wɔsɛɛ ni nyɛná hiɛnɔkamɔ.’”—Yeremia 29:11, Jeŋ Hee Shishitsɔɔmɔ.
“‘Mile jwɛŋmɔi ní mijwɛŋɔ yɛ nyɛhe, Yehowa kɛɛ: hejɔlɛ jwɛŋmɔi ni, shi jeee efɔŋ nɔ ni, koni mikɛ naagbee ní nyɛhiɛ kã nɔ lɛ ahã nyɛ.’”—Yeremia 29:11, Ga Biblia Momo.
Nɔ Ni Yeremia 29:11 Lɛ Tsɔɔ
Yehowa Nyɔŋmɔ wo mɛi ni jáa lɛ lɛ ashi akɛ, wɔsɛɛ lɛ ebaahã amɛhi shi yɛ toiŋjɔlɛ mli. Eyɛ mli akɛ aŋma sane nɛɛ ahã mɛi ni hi shi yɛ blema lɛ moŋ, shi nakai nɔŋŋ ji bɔ ni Yehowa susuɔ yɛ etsuji ahe ŋmɛnɛ. Eji “Nyɔŋmɔ ni kɛ hiɛnɔkamɔ hãa.” (Romabii 15:13) Anɔkwa, ehã aŋmala shiwoi nɛɛ yɛ Biblia lɛ mli koni “wɔná hiɛnɔkamɔ” akɛ wɔsɛɛ lɛ, wɔbaaná shihilɛ kpakpa.—Romabii 15:4.
Saji Ni Kɔɔ Yeremia 29:11 Lɛ He
Lɛta ni aŋma kɛyahã Israelbii ni aŋɔ amɛ nom kɛjɛ Yerusalem b kɛtee Babilon lɛ mli wiemɔi lɛ eko nɛ. (Yeremia 29:1) Nyɔŋmɔ kɛɛ mɛi ni aŋɔ amɛ nom lɛ akɛ, amɛbaahi nomŋɔɔ lɛ mli be kpalaŋŋ no hewɔ lɛ, amɛmamɔ tsũi, amɛfee abɔi, ni amɛfɔ bii. (Yeremia 29:4-9) Shi, Nyɔŋmɔ kɛfata he akɛ: “Kɛ́ afii 70 shɛ yɛ Babilon lɛ, magbala mijwɛŋmɔ kɛba nyɛnɔ, ni mahã shi ni miwo akɛ mikɛ nyɛ baaku sɛɛ kɛba [Yerusalem] lɛ aba mli.” (Yeremia 29:10) No hewɔ lɛ, Nyɔŋmɔ ma nɔ mi ehã amɛ akɛ ehiɛ kpaŋ amɛnɔ, ni hiɛnɔkamɔ ni amɛyɔɔ akɛ amɛbaaku amɛsɛɛ kɛba Yerusalem ekoŋŋ lɛ baaba mli.—Yeremia 31:16, 17.
Nyɔŋmɔ ye shi ni ewo Israelbii lɛ nɔ. Taakɛ egba efɔ̃ shi lɛ, Persia Maŋtsɛ Koresh ye Babilon nɔ kunim. (Yesaia 45:1, 2; Yeremia 51:30-32) No sɛɛ lɛ, Koresh ŋmɛ Yudafoi lɛ gbɛ ni amɛku amɛsɛɛ kɛtee amɛshikpɔŋ lɛ nɔ. Be ni amɛhi nomŋɔɔ mli afii 70 sɛɛ lɛ, amɛku amɛsɛɛ kɛtee Yerusalem.—2 Kronika 36:20-23; Ezra 3:1.
Akɛni Nyɔŋmɔ ye shi ni ewo ni aŋma yɛ Yeremia 29:11 lɛ nɔ hewɔ lɛ, mɛi ni kɛ amɛhiɛ fɔ̃ɔ eshiwoi anɔ ŋmɛnɛ lɛ yɛ hiɛnɔkamɔ akɛ eshiwoi lɛ baaba mli. Shiwoi nɛɛ eko ji, Nyɔŋmɔ Maŋtsɛyeli ni Kristo Yesu ji enɔ maŋtsɛ lɛ baahã toiŋjɔlɛ aba shikpɔŋ lɛ nɔ fɛɛ.—Lala 37:10, 11, 29; Yesaia 55:11; Mateo 6:10.
Susumɔ Ni Ejaaa Ni Ahiɛ Yɛ Yeremia 29:11 Lɛ He
Susumɔ ni ejaaa: Nyɔŋmɔ eto “gbɛjianɔ” pɔtɛɛ ko kɛhã adesa fɛɛ adesa.
Anɔkwa sane: Nyɔŋmɔ ŋmɛɔ mɔ fɛɛ mɔ gbɛ koni ehala bɔ ni ebaasumɔ ni ehi shi ehã. Be ni ewie sane ni yɔɔ Yeremia 29:11 lɛ, no mli lɛ ekɛ Israelbii ni yɔɔ Babilon lɛ miiwie akɛ kuu, ni eyɛ nɔ ko yɛ ejwɛŋmɔ mli ni eesumɔ ni efee ehã nakai kuu lɛ—no ji ni amɛná toiŋjɔlɛ wɔsɛɛ. (Yeremia 29:4) Shi Nyɔŋmɔ ŋmɛ amɛteŋ mɔ fɛɛ mɔ gbɛ koni ehala kɛji ebaasumɔ ni ená eshiwoo lɛ he sɛɛ loo esumɔŋ. (5 Mose 30:19, 20; Yeremia 29:32) Mɛi ni hala akɛ amɛbaatao Nyɔŋmɔ sɛɛ gbɛ lɛ fee nakai kɛtsɔ amɛtsui muu fɛɛ mli ni amɛjɛ amɛsɔle amɛhã lɛ lɛ nɔ.—Yeremia 29:12, 13.
Kanemɔ Yeremia yitso 29 lɛ, eshishigbɛ niŋmaa ni kɔɔ he lɛ, kɛ ŋmalɛi ni atsɛ yisɛɛ ni kɔɔ he lɛ.
a Yehowa ji Nyɔŋmɔ gbɛ́i diɛŋtsɛ.—Lala 83:18.
b Wolo ni ji The Expositor’s Bible Commentary lɛ wie yɛ Yeremia 29:11 lɛ he akɛ: “Enɛ ji shiwoi ni nɔ bɛ kwraa ni wɔnaa yɛ Biblia lɛ mli lɛ ateŋ ekome; ehãa anaa bɔ ni Yahweh [Yehowa] musuŋtsɔ lɛ yɛ mɛi ni aŋɔ amɛ nom lɛ ahe, ni yɛ naagbee mli lɛ, ehã amɛná yiŋtoo kpakpa ni amɛbaanyɛ amɛdamɔ nɔ kɛná hiɛnɔkamɔ.”—Volume 7, baafa 360.
Ekolɛ Obaasumɔ Enɛ Hu
ESSENTIAL BIBLE TEACHINGS
Mɛni Ji Nyɔŋmɔ Maŋtsɛyeli Lɛ?
Yɛ Yesu sɔɔmɔ nitsumɔ lɛ mli fɛɛ lɛ, ewie Nyɔŋmɔ Maŋtsɛyeli lɛ he fe nibii krokomɛi fɛɛ. Afii ohai abɔ nɛ ní esɛɛnyiɛlɔi esɔle koni nakai Maŋtsɛyeli lɛ aba.
BIBLIA MLI ŊMALƐI NI AGBALA MLI
Romabii 15:13 Mligbalamɔ—“Nɔhiɛkamɔ Nyɔŋmɔ Lɛ Kɛ Miishɛɛ Kɛ Hejɔlɛ Fɛɛ Awo Nyɛ Obɔ̃bɔ̃ɔbɔ̃”
Mɛɛ gbɛ nɔ miishɛɛ kɛ toiŋjɔlɛ, hiɛnɔkamɔ kɛ mumɔ krɔŋkrɔŋ lɛ yɔɔ tsakpãa?
SANEBIMƆI NI BIBLIA LƐ EHÃ HETOO
Obaanyɛ Oná Saji Yɛ Biblia Lɛ Mli Ni Baashɛje Omii
Biblia mli ŋmalɛi eshɛje mɛi ni miitsɔ shihilɛi ni mli wawai amli lɛ ateŋ mɛi babaoo amii.
BIBLIA TSƆƆMƆI
Nibii Kɛhã Biblia Kasemɔ
Okɛ nibii ni afee kɛhã Biblia kasemɔ ni baahã otsui anyɔ omli beni okaseɔ nii, ni baawo bo hewalɛ hu lɛ atsu nii kɛkase Biblia lɛ.
BIBLIA TSƆƆMƆI
Kaa Wɔ-Biblia Kasemɔ Lɛ Okwɛ
Biblia kasemɔ ni baafee sanegbaa ni mɔ ko baawa bo; aheee shika.
