“Shi mɛi ni kɛ amɛhiɛ fɔ̃ɔ Yehowa nɔ lɛ baaná hewalɛ ekoŋŋ. Amɛbaafiliki kɛya ŋwɛi shɔŋŋ oookɛɛ amɛyɛ okropɔŋ fiji. Amɛbaajo foi ni amɛgbɔjɔɔɔ; amɛbaanyiɛ ni etɔɔɔ amɛ.”​—Yesaia 40:31, Jeŋ Hee Shishitsɔɔmɔ.

 “Shi mɛi ni hiɛ kã Yehowa nɔ lɛ náa hewalɛ hee, amɛholeɔ amɛfiji anɔ tamɔ okropɔŋi, amɛjoɔ foi, ni etɔɔɔ amɛ, amɛnyiɛɔ hu, ni amɛgbɔjɔɔɔ.”​—Yesaia 40:31, Ga Biblia.

 Yehowa a Nyɔŋmɔ ewo mɛi ni jáa lɛ lɛ ashi akɛ ebaahã amɛ hewalɛ ní baahã amɛnyɛ amɛye naagbai ni amɛkɛkpeɔ lɛ anɔ, loo amɛnyɛ amɛkpee naa.

 “Mɛi ni kɛ amɛhiɛ fɔ̃ɔ Yehowa nɔ lɛ baaná hewalɛ ekoŋŋ.” Mɛi ni yɔɔ hekɛnɔfɔ̃ɔ akɛ Nyɔŋmɔ baanyɛ eye ebua ewebii lɛ, ni eesumɔ ni efee nakai lɛ baanyɛ aná nɔmimaa akɛ ebaaye ebua amɛ. (Abɛi 3:5, 6) Gbɛ kome ni Nyɔŋmɔ baanyɛ etsɔ nɔ ehã mɛi ni jáa lɛ lɛ hewalɛ ji, kɛtsɔ emumɔ krɔŋkrɔŋ lɛ loo ehewalɛ ni miitsu nii lɛ ni ekɛhãa amɛ lɛ nɔ.​—Luka 11:13.

 “Amɛbaafiliki kɛya ŋwɛi shɔŋŋ oookɛɛ amɛyɛ okropɔŋ fiji.” Mfonirifeemɔŋ wiemɔ nɛɛ hãa wɔnaa bɔ ni Nyɔŋmɔ hewalɛ lɛ baanyɛ ená mɔ ko nɔ hewalɛ ehã. Kɛ́ okropɔŋ ná kɔɔyɔɔ ni mli edɔ fioo lɛ, ebaanyɛ efiliki kɛya ŋwɛi shɔŋŋ. Kɛ́ ená eshɛ he ko ni kɔɔyɔɔ lɛ mli edɔ fioo yɛ lɛ, egbɛɔ efiji amli ni ebɔleɔ ehe yɛ jɛmɛ, ni no hãa enyɛɔ efilikiɔ kɛyaa ŋwɛi shɔŋŋ. Kɛ́ etee ŋwɛi kɛshɛ he ko lɛ, efilikiɔ kɛyaa he kroko hu ni kɔɔyɔɔ ni mli edɔ yɔɔ, ni enyɛɔ efilikiɔ ŋmɛlɛtswai abɔ ni etɔɔɔ lɛ.

 “Amɛbaajo foi ni amɛgbɔjɔɔɔ.” Shihilɛ mli naagbai baanyɛ ahã wɔgbɔjɔ yɛ gbɔmɔtsoŋ kɛ henumɔŋ fɛɛ, shi hewalɛ ni Nyɔŋmɔ kɛhãa lɛ baanyɛ ahã wɔkpee naa. Ebaanyɛ ewaje wɔ ni wɔfee nɔ ni ja, ekɔɔɔ he eko shihilɛi ni mli wawai ni wɔkɛkpeɔ. Bɔfo Paulo ni nyɛ efi shi yɛ kai ni mli wawai amli lɛ ŋma akɛ: “Yɛ nɔ fɛɛ nɔ mli lɛ, mitsɔɔ mɔ ni wajeɔ mi lɛ nɔ mináa hewalɛ.”​—Filipibii 4:13.

 Nyɔŋmɔ kɛ emumɔ lɛ tsirɛ gbalɔ Yesaia ni eŋma sane nɛɛ aaafee afii 2,700 ni eho nɛ. Eyɛ mli akɛ ŋmalɛ nɛɛ kɔɔ Nyɔŋmɔ tsuji anɔkwafoi fɛɛ ahe moŋ nɛ, shi ekolɛ ekɛwo Yudafoi ni no mli lɛ aaba abaŋɔ amɛ nom kɛya Babilon ni amɛyaye afii 70 yɛ jɛmɛ lɛ hewalɛ. Beni Yudafoi lɛ jɛ nomŋɔɔ mli kɛba amɛshikpɔŋ lɛ nɔ lɛ, amɛna akɛ Nyɔŋmɔ wiemɔi nɛɛ eba mli. (Yesaia 40:1-3) Nyɔŋmɔ hã amɛ hewalɛ ni amɛnyɛ amɛkɛfã gbɛ b kakadaŋŋ ni bɛ mlɛo kɛjɛ Babilon kɛba Yerusalem yɛ afi 537 D.Ŋ.B.​—Yesaia 40:29.