“Mɔ ko bɛ suɔmɔ ni da fe enɛ, akɛ mɔ kɛ ewala baafɔ̃ shi ehã enanemɛi.”​—Yohane 15:13, Jeŋ Hee Shishitsɔɔmɔ.

 “Mɔ ko bɛ suɔmɔ ni da fe enɛ, akɛ mɔ aaaŋɔ ewala eŋmɛ shi eha eshieŋtsɛmɛi.”​—Yohane 15:13, Ga Biblia momo.

 No mli lɛ, Yesu miiye eebua esɛɛnyiɛlɔi lɛ ni amɛnu shishi akɛ, esa akɛ amɛhã amɛsuɔmɔ lɛ mli awa aahu akɛ amɛbaasumɔ ni amɛgbo amɛhã amɛnyɛmimɛi.

 Dani Yesu baawie sane nɛɛ lɛ, no mli lɛ, etsɔ hiɛ ekɛɛ ebɔfoi lɛ akɛ: “Enɛ ji mikitã lɛ, akɛ nyɛsumɔsumɔa nyɛhe tamɔ bɔ ni misumɔɔ nyɛ lɛ.” (Yohane 15:12) Mɛɛ suɔmɔ nɛkɛ no mli lɛ Yesu yɔɔ kɛhã amɛ lɛ? Eji suɔmɔ ni ŋkomeŋfa bɛ mli, hekɛafɔleshaa suɔmɔ. Be ni Yesu yɔɔ shikpɔŋ nɛɛ nɔ ni etsuɔ esɔɔmɔ nitsumɔ lɛ, ekɛ ekaselɔi lɛ ahiamɔ nii kɛ amɛhilɛkɛhamɔ kɛ mɛi krokomɛi anɔ ye lɛ diɛŋtsɛ enɔ hiɛ. Etsa helatsɛmɛi, ni etsɔɔ amɛ Nyɔŋmɔ Maŋtsɛyeli lɛ a he nii. Etsu nitsumɔi ni baa shi po kɛye ebua mɛi krokomɛi. (Mateo 9:35; Luka 22:27; Yohane 13:3-5) Shi nifeemɔ ni tsɔɔ suɔmɔ ni Yesu tsĩ tã yɛ JYohane 15:13 lɛ, yaa shɔŋŋ kwraa fe nakai. Anɔkwa, be ni ewie sane nɛɛ, ŋmɛlɛtswai fioo komɛi asɛɛ lɛ, ejie nakai suɔmɔ kpele lɛ kpo be ni ejɛ esuɔmɔ mli ‘ekɛ ewala hã akɛ kpɔmɔnɔ kɛkpɔ̃ mɛi babaoo lɛ.’ (Mateo 20:28; 22:39) Etsɔ nɔ ni efee lɛ nɔ etsɔɔ akɛ, esumɔɔ mɛi krokomɛi fe bɔ ni esumɔɔ lɛ diɛŋtsɛ ehe.

 Yesu sumɔɔ gbɔmɛi. Shi mɛi ni esumɔɔ waa titri ji, mɛi ni boɔ etsɔɔmɔi lɛ toi ni amɛkɛtsuɔ nii yɛ amɛshihilɛ mli lɛ. Yesu na ekaselɔi lɛ akɛ enanemɛi kpaakpa, ejaakɛ amɛbo nibii ni etsɔɔ amɛ lɛ toi, amɛhi shi yɛ naa, ni amɛkɛ lɛ hi shi yɛ ekai lɛ amli hu. (Luka 22:28; Yohane 15:14, 15) No hewɔ lɛ, ená yiŋtoo kpakpa ko edamɔ nɔ ekɛ ewala shã afɔle ehã amɛ.

 Klɛŋklɛŋ afii oha lɛ mli Kristofoi lɛ hã Yesu sane nɛɛ kã amɛtsui nɔ waa, ni amɛkɛtsu nii yɛ amɛshihilɛ mli, hewɔ lɛ amɛsumɔ ni amɛgboi po amɛhã amɛnyɛmimɛi lɛ. (1 Yohane 3:16) Anɔkwa, suɔmɔ ni ŋkomeŋfa bɛ mli, ni ji suɔmɔ ni Yesu jie lɛ kpo lɛ titri ji nɔ ni sɛɛ mli lɛ akɛyɔse anɔkwa Kristofoi lɛ.​—Yohane 13:34, 35.

 Saji ni yɔɔ yitso 13 kɛyashi yitso 17 lɛ kɔɔ shɛɛ ni Yesu kɛ ebɔfoi 11 lɛ ye kɛwo amɛ ŋaa, kɛ naagbee sɔlemɔ ni esɔle ehã amɛ lɛ he. No sɛɛ ŋmɛlɛtswai fioo sɛɛ lɛ, egbo. Yɛ yitso 15 lɛ mli lɛ, bɔ ni afee ni Yesu anyɛ aye abua ekaselɔi lɛ ni amɛle nɔ hewɔ ni esa akɛ amɛkɛ lɛ afee ekome kɛtsɔɔ akɛ esɛɛnyiɛlɔi diɛŋtsɛ ji amɛ lɛ, ekɛ amɛ to wain yibii ni ewo yɛ wain tso nɔ lɛ he. Ewo amɛ hewalɛ ni ‘amɛya nɔ amɛwo yibii babaoo.’ (Yohane 15:1-5, 8) Gbɛ kome ni amɛyaa nɔ amɛwoɔ yibii ji hekɛafɔleshãa suɔmɔ ni amɛjieɔ lɛ kpo lɛ; ni “Nyɔŋmɔ Maŋtsɛyeli lɛ he sane kpakpa lɛ” ni Yesu shiɛ ni amɛ hu amɛshiɛɔ lɛ fata suɔmɔ ni amɛjieɔ lɛ kpo nɛɛ he.​—Luka 4:43; Yohane 15:10, 17.

 Kwɛmɔ Yohane wolo lɛ hiɛkpamɔ vidio kuku nɛɛ.