““Mikɛɛ nyɛ nibii nɛɛ koni nyɛtsɔ minɔ nyɛná toiŋjɔlɛ. Nyɛbaana amanehulu yɛ je lɛ mli, shi nyɛnáa ekãa! Miye je lɛ nɔ kunim.”​—Yohane 16:33, Jeŋ Hee Shishitsɔɔmɔ.

 “Miikɛɛ nyɛ nii nɛɛ, koni nyɛwo nyɛtsui yɛ mimli. Je lɛŋ lɛ, hejaramɔ nyɛnaa, shi kɛlɛ nyɛtsui anyɔa nyɛmli: miye je lɛ nɔ kunim.”​—Yohane 16:33, Ga Biblia momo. a

 Yesu jɛ mlihilɛ mli ekɛ wiemɔi nɛɛ wo ekaselɔi lɛ hewalɛ koni amɛná nɔmimaa akɛ, ekɔɔɔ he eko kai loo shiteekɛwoo ni amɛkɛbaakpe lɛ, amɛ hu amɛbaanyɛ amɛsa Nyɔŋmɔ hiɛ.

 “Mikɛɛ nyɛ nibii nɛɛ koni nyɛtsɔ minɔ nyɛná toiŋjɔlɛ.” Ŋmalɛ nɛɛ mli saji ni eshwɛ lɛ hãa wɔnaa akɛ, kɛ́ mɔ ko ná toiŋjɔlɛ ni awieɔ he nɛɛ, no etsɔɔɔ akɛ ebɛ naagba ko. Moŋ lɛ, eji toiŋjɔlɛ ni anáa yɛ tsui kɛ jwɛŋmɔ mli. Abaanyɛ aná mligbɛ toiŋjɔlɛ nɛɛ kɛtsɔ Yesu, mɔ ni wo shi akɛ ebaatsu mumɔ krɔŋkrɔŋ lɛ kɛba lɛ nɔ. “Yelikɛbualɔ” ni yɔɔ hewalɛ nɛɛ baahã Yesu kaselɔi lɛ aná nyɛmɔ kɛ ekãa kɛkpee shihilɛ ni mli wawai anaa.​—Yohane 14:16, 26, 27.

 “Nyɛbaana amanehulu yɛ je lɛ mli, shi nyɛnáa ekãa!” Yesu kɛ anɔkwayeli kɛɛ ekaselɔi lɛ akɛ, amɛkɛ kai baakpe; ekomɛi ji abaaye amɛ sane ni ejaaa, ni abaawa amɛyi hu. (Mateo 24:9; 2 Timoteo 3:12) Shi fɛɛ sɛɛ lɛ, amɛyɛ yiŋtoo hewɔ ni esa akɛ ‘amɛná ekãa’ loo ‘amɛwo amɛtsui yɛ emli’ lɛ.​—Yohane 16:33, Ga Biblia momo.

 “Miye je lɛ nɔ kunim.” Wiemɔ ni ji, “je lɛ” ni akɛtsu nii yɛ ŋmalɛ nɛɛ mli lɛ kɔɔ adesai ni etsi amɛhe kɛje Nyɔŋmɔ he lɛ ahe. b Awie yɛ 1 Yohane 5:19 lɛ akɛ: “Jeŋ muu lɛ fɛɛ kã mɔ fɔŋ lɛ [loo Satan] hewalɛ mli.” Gbɔmɛi ni yɔɔ “jeŋ ni awieɔ he nɛɛ mli lɛ anifeemɔi kɛ amɛsusumɔi esaaa Nyɔŋmɔ hiɛ.​—1 Yohane 2:15-17.

 Satan kɛ eje lɛ bɔ mɔdɛŋ koni amɛtsĩ Yesu naa ni ekafee Nyɔŋmɔ suɔmɔnaa nii; Nyɔŋmɔ suɔmɔnaa nii nɛɛ ekomɛi ji, ni ebaatsɔɔ mɛi krokomɛi Nyɔŋmɔ he nii, ni ekɛ ewala ni eye emuu lɛ ahã akɛ kpɔmɔnɔ. (Mateo 20:28; Luka 4:13; Yohane 18:37) Shi Yesu hãaa je lɛ aná esusumɔ nɔ hewalɛ ni etsi ehe kɛje Nyɔŋmɔ he. Etee nɔ eye anɔkwa kɛtee gbele mli. Enɛ hewɔ lɛ, Yesu nyɛ ekɛɛ akɛ, eye je lɛ nɔ kunim, ni Satan ni ji ‘je lɛ nɔyelɔ lɛ, bɛ hewalɛ ko yɛ enɔ.’​—Yohane 14:30.

 Yesu kɛ lɛ diɛŋtsɛ enɔkwɛmɔnɔ lɛ tsɔɔ esɛɛnyiɛlɔi lɛ akɛ, amɛ hu amɛbaanyɛ amɛya nɔ amɛye Nyɔŋmɔ anɔkwa kɛ́ Satan kɛ eje lɛ ka akɛ amɛbaahã amɛŋmɛɛɛ amɛnɔkwayeli lɛ he po. Yɛ gbɛ ko nɔ lɛ, Yesu miikɛɛ akɛ: “Kɛ́ minyɛ miye je lɛ nɔ kunim lɛ, nyɛ hu nyɛbaanyɛ nyɛfee nakai.”

 Yesu wie wiemɔi nɛɛ gbɛkɛ dani egbo lɛ. Akɛni ele akɛ etsɛŋ ni ebaagbo hewɔ lɛ, eŋɔ hegbɛ lɛ ni ekɛ ebɔfoi anɔkwafoi lɛ ye shɛɛ kɛwo amɛ hewalɛ. Yɛ ekɛ amɛ sanegbaa lɛ mli lɛ, ewie saji komɛi ni esa kɛ amɛsusu he jogbaŋŋ lɛ ahe, nomɛi ji: Amɛnaŋ lɛ dɔŋŋ, abaawa amɛyi, loo abaagbe amɛ po. (Yohane 15:20; 16:2,10) Akɛni Yesu le akɛ enɛ baanyɛ ahã ebɔfoi lɛ ashe gbeyei hewɔ lɛ, ekɛ wiemɔi ni yɔɔ Yohane 16:33 lɛ mu esane lɛ naa kɛwo amɛ hewalɛ koni amɛkashe gbeyei.

 Yesu wiemɔi kɛ enɔkwɛmɔnɔ nɛɛ baanyɛ awo esɛɛnyiɛlɔi ni yɔɔ ŋmɛnɛ lɛ hewalɛ. Kristofoi fɛɛ baanyɛ aya nɔ aye Nyɔŋmɔ anɔkwa yɛ amanehului ni amɛkɛkpeɔ lɛ fɛɛ sɛɛ.