“Ejaakɛ Nyɔŋmɔ sumɔɔ je lɛ aahu akɛ ekɛ e-Bi koome lɛ hã, koni mɔ fɛɛ mɔ ni heɔ enɔ eyeɔ lɛ hiɛ akakpãtã shi moŋ ená naanɔ wala.”​—Yohane 3:16, Jeŋ Hee Shishitsɔɔmɔ.

 “Ejaakɛ nɛkɛ Nyɔŋmɔ sumɔ je lɛ, akɛ eŋɔ ebi koome lɛ ehã, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.”​—Yohane 3:16, Ga Biblia Momo.

 Nyɔŋmɔ sumɔɔ wɔ, ni eesumɔ ni wɔhi shi kɛya naanɔ. No hewɔ ni etsu e-Bi Yesu Kristo kɛba shikpɔŋ nɛɛ nɔ lɛ. Be ni Yesu yɔɔ shikpɔŋ lɛ nɔ lɛ, etsu nitsumɔi ni he hiaa waa. Eko ji, etsɔɔ ekaselɔi lɛ e-Nyɔŋmɔ kɛ e-Tsɛ lɛ he nii. (1 Petro 1:3) Agbɛnɛ hu ekɛ ewala fɔ̃ shi ehã adesai. Kɛ́ wɔbaaná naanɔ wala lɛ, esa akɛ wɔhe Yesu nɔ wɔye.

 Wiemɔ ni ji, “ekɛ e-Bi koome a lɛ hã” lɛ, hãa wɔnaa bɔ ni Nyɔŋmɔ sumɔɔ wɔ waa ehãa. Yesu ji Nyɔŋmɔ Bi ni yɔɔ srɔto kwraa. Yɛ mɛɛ gbɛ nɔ? Yesu pɛ ji mɔ ni Nyɔŋmɔ bɔ lɛ tɛ̃ɛ. (Kolosebii 1:17) Lɛ ji “bɔɔ nii fɛɛ ateŋ kromɔbi lɛ.” (Kolosebii 1:15) Bɔɔ nii krokomɛi fɛɛ ni ŋwɛibɔfoi krokomɛi lɛ fata he lɛ ba shihilɛ mli kɛtsɔ Yesu nɔ. Fɛɛ sɛɛ lɛ, Yehowa b Nyɔŋmɔ jɛ esuɔmɔ mli etsu e-Bi ni eshwɛɛɛ ehe kwraa lɛ ni ‘ebasɔmɔ koni ekɛ ewala ahã akɛ kpɔmɔnɔ kɛkpɔ̃ mɛi babaoo.’ (Mateo 20:28) Yesu na nɔ, ni egbo kɛkpɔ̃ wɔ kɛje esha kɛ gbele ni wɔná kɛjɛ klɛŋklɛŋ gbɔmɔ ni ji, Adam lɛ ŋɔɔ lɛ mli.​—Romabii 5:8, 12.

 Hemɔkɛyeli ni wɔbaaná yɛ Yesu mli lɛ biɔ ni wɔfee babaoo fe ni wɔbaahe enɔ wɔye loo wɔbaakpɛlɛ nɔ akɛ ebagbo kɛkpɔ̃ wɔ. Kɛ́ wɔboɔ Nyɔŋmɔ Bi lɛ toi ni wɔkaseɔ lɛ lɛ, wɔkɛ no tsɔɔ akɛ wɔyɛ hemɔkɛyeli yɛ emli. (Mateo 7:24-27; 1 Petro 2:21) Biblia lɛ kɛɔ akɛ: “Mɔ ni heɔ Bi lɛ nɔ eyeɔ lɛ yɛ naanɔ wala; mɔ ni gboɔ Bi lɛ nɔ toi lɛ, enáŋ wala.”​—Yohane 3:36.

 Yesu wie nakai wiemɔi lɛ be ni ekɛ Yuda jamɔ lɛ mli hiɛnyiɛlɔ ko ni atsɛɔ lɛ Nikodemo lɛ wieɔ lɛ. (Yohane 3:1, 2) Yɛ nakai sanegbaa lɛ mli lɛ, Yesu wie nibii babaoo ni kɔɔ Nyɔŋmɔ Maŋtsɛyeli lɛ c kɛ fɔmɔ ni ‘abaafɔ mɔ ko ekoŋŋ’ lɛ he. (Yohane 3:3) Egba gbɛ nɔ ni ebaatsɔ egbo lɛ hu efɔ̃ shi. Ewie akɛ “Esa akɛ awó gbɔmɔ Bi lɛ nɔ [asɛŋ lɛ yɛ tso nɔ], koni mɔ fɛɛ mɔ ni heɔ enɔ yeɔ lɛ, aná naanɔ wala.” (Yohane 3:14, 15) No sɛɛ lɛ, ema nɔ mi akɛ, suɔmɔ kpele ni Nyɔŋmɔ yɔɔ kɛhã adesai lɛ hewɔ ni ehã adesai hegbɛ koni amɛhi shi kɛya naanɔ lɛ. Be ni Yesu muɔ esane lɛ naa lɛ, etsɔɔ mli akɛ, dani wɔbaaná wala lɛ, esa akɛ wɔtsɔɔ akɛ wɔheɔ enɔ wɔyeɔ, ni wɔfee nibii hu ni saa Nyɔŋmɔ hiɛ.​—Yohane 3:17-21.