“Ani jeee mi mifã bo? Feemɔ ekãa, ni owaje ohe. Otsui akafã, ni kaashe gbeyei hu, ejaakɛ he fɛɛ he ni oyaa lɛ, Yehowa, o-Nyɔŋmɔ lɛ, kɛ bo yɛ.”​—Yoshua 1:9 Jeŋ Hee Shishitsɔɔmɔ.

 “Ani jeee mi mifão? Wajemɔ ohe ni ofee ekãa. Kaahã ŋmiŋmi miimɔo, ni asaŋ otsui akafã; ejaakɛ Yehowa, o-Nyɔŋmɔ lɛ, fĩ osɛɛ yɛ he fɛɛ he ni oyaa.”​—Yoshua 1:9, Ga Biblia Momo.

 Yehowa a Nyɔŋmɔ tsɔ wiemɔi nɛɛ anɔ ewo etsulɔ Yoshua hewalɛ akɛ eyɛ mli akɛ ekɛ shihilɛi ni mli wawai kɛ gbɛtsiinii ni ebaafee tamɔ enyɛŋ nɔ eye baakpe moŋ nɛ, shi esa akɛ ‘ewaje ehe ni efee ekãa.’ Kɛ́ Yoshua ye Nyɔŋmɔ famɔi lɛ anɔ kome too lɛ, ehe ebahiaŋ ni eshe wɔsɛɛ gbeyei, ejaakɛ ebaafee tamɔ Yehowa yɛ emasɛi yɛ jɛmɛ ni eeye eebua lɛ koni eye omanye. Nyɔŋmɔ kɛ Yoshua yɛ, ejaakɛ ehã lɛ gbɛtsɔɔmɔi ni eye ebua lɛ ní eye ehenyɛlɔi lɛ anɔ kunim.

 Te Yoshua baafee tɛŋŋ ‘ewaje ehe ni efee ekãa lɛ’? Wiemɔi ni Yehowa hã ajɛ emumɔ lɛ mli aŋma yɛ nakai beiaŋ lɛ baawaje Yoshua ni efee ekãa. Wiemɔi nɛɛ eko ji “Mla muu lɛ fɛɛ ni [Yehowa tsulɔ] Mose wo [Yoshua] lɛ.” b (Yoshua 1:7) Yehowa kɛɛ Yoshua akɛ “kanemɔ ni ojwɛŋ nɔ.” (Yoshua 1:8) Mla wolo lɛ kanemɔ kɛ enɔjwɛŋmɔ lɛ ye ebua Yoshua ni etswa efai shi akɛ ebaafee Nyɔŋmɔ suɔmɔnaa nii. Ehe bahia ni Yoshua kɛ nɔ ni ekase yɛ Nyɔŋmɔ wiemɔ lɛ mli lɛ atsu nii, bɔ ni afee ni ‘eye nɔ fɛɛ nɔ ni aŋma yɛ mli lɛ nɔ jogbaŋŋ.’ Kɛ́ efee nakai lɛ, no baahã efee enii yɛ hiɛshikamɔ mli ni eye omanye. Ni nakai pɛpɛɛpɛ ji bɔ ni eba lɛ. Yoshua kɛ naagbai kpe moŋ nɛ, shi etsui nyɔ emli ni etee nɔ ekɛ anɔkwayeli sɔmɔ Yehowa.​—Yoshua 23:14; 24:15.

 Wiemɔi ni Yehowa wie kɛwo Yoshua hewalɛ lɛ woɔ wɔ hu hewalɛ ŋmɛnɛ. Enɛ hãa wɔnaa bɔ ni Yehowa susuɔ mɛi ni jáa lɛ lɛ ahe, titri lɛ be mli ni amɛkɛ naagbai miikpe lɛ. Eesumɔ ni amɛye omanye tamɔ Yoshua ye omanye lɛ! Ni tamɔ Yoshua fee lɛ, kɛ́ amɛkane Nyɔŋmɔ Wiemɔ, ni ji Biblia lɛ, amɛjwɛŋ nɔ, ni amɛhi shi yɛ nibii ni aŋma yɛ mli lɛ anaa lɛ, amɛ hu amɛbaanyɛ ‘amɛfee ekãa ni amɛwaje amɛhe.’

 Yɛ Mose gbele sɛɛ lɛ, Yehowa hala Yoshua koni enyiɛ Israel maŋ lɛ hiɛ. (Yoshua 1:1, 2) Nakai beiaŋ lɛ, Israelbii lɛ miisaa amɛhe koni amɛyaŋɔ Shiwoo Shikpɔŋ lɛ, ni ji Kanaan shikpɔŋ lɛ. Shi ehe bahia ni amɛkɛ henyɛlɔi ni he wala anɔ. Akɛ nɔkwɛmɔnɔ lɛ, ehe bahia ni Yoshua kɛ Kanaanbii ni yitseiaŋ wala waa lɛ anɔ. (5 Mose 9:5; 20:17, 18) Agbɛnɛ hu, Kanaanbii lɛ ayi fa ni amɛyɛ tawuu nibii pii fe Israelbii lɛ. (Yoshua 9:1, 2; 17:18) Shi Yoshua fee ekãa ni ekɛ Yehowa gbɛtsɔɔmɔi tsu nii. Ni Nyɔŋmɔ hã efee faŋŋ akɛ ekɛ lɛ yɛ, ejaakɛ yɛ afii ekpaa pɛ mli lɛ, Israelbii lɛ ye amɛhenyɛlɔi lɛ babaoo anɔ kunim.​—Yoshua 21:43, 44.