Shiaŋloo lɛ hiɔ nu mli, eyɛ ŋoŋo tamɔ waa, ni enyanyɔŋ hu wa waa. Nɔ ko ni Blɔfo tsɛɔ lɛ goethite ni yɔɔ fɛtɛfɛtɛ ni wa waa ji nɔ ni feɔ nyanyɔŋ nɛɛ, aje gbɛ ato eko ashwie eko nɔ babaoo, ni ehɔ nɔ ko ni yɔɔ bɔdɔɔ mli.

Susumɔ he okwɛ: Shiaŋloo lɛ naabu tamɔ lilɛi, ni nyanyɔji babaoo ni ato naa ni edrɔ hɔlɔ mli, nyanyɔji nɛɛ eko fɛɛ eko shɛɛɛ milimita kome (3/64 in.) po, ni ekɛtsuɔ nii tamɔ faili. Esa akɛ nyanyɔji lɛ ateŋ eko fɛɛ eko awa waa bɔ ni afee ni enyɛ ekɛŋmala mpɔde yɛ tɛi ahe eye.

Niiamlitaolɔi kɛ shwɛde ko ni naa wa waa tsu nii kɛkwɛ hewalɛ ni shiaŋloo nyanyɔŋ lɛ yɔɔ, no ji hewalɛ ni enyanyɔŋ lɛ baanyɛ edamɔ naa dani eku. Amɛyɔse akɛ, shiaŋloo lɛ nyanyɔŋ lɛ wa fe nɔ fɛɛ nɔ ni amɛpɛi mli amɛkwɛ​—ewa kwraa po fe anaanu ntaŋ. Mɔ ni nyiɛ hiɛ kɛfee niiamlitaomɔ lɛ wie akɛ: “Esa akɛ wɔbɔ mɔdɛŋ wɔkwɛ bɔ ni afee shiaŋloo nyanyɔŋ ahã lɛ nɔ wɔfee nibii.”

Niiamlitaolɔi lɛ heɔ amɛyeɔ akɛ abaanyɛ akwɛ bɔ ni shiaŋloo nyanyɔŋ yɔɔ hã lɛ nɔ afee nibii ni abaanyɛ akɛfee lɔlei, lɛji, kɛ ɛroplane, ni abaanyɛ akwɛ nɔ akɛfee nyanyɔŋ po.

Te osusuɔ tɛŋŋ? Ani bɔ ni shiaŋloo lɛ nyanyɔŋ wa waa hã lɛ ba kɛtsɔ sutsakemɔ nɔ? Aloo mɔ ko ni fee?