Maria Magdalena ewó ehiɛ nɔ eekwɛ atatu lɛ ni eetsumɔ ehiɛ yaafonui. E-Nuŋtsɔ ni esumɔɔ esane waa lɛ tsotsoro tso nɔ. No mli lɛ, atswa aaafee shwane ŋmɛlɛ nyɔŋma kɛ enyɔ, ‘shi duŋ ewo yɛ shikpɔŋ lɛ nɔ fɛɛ’! (Luka 23:44, 45) Ekɛ emama lɛ ha ekɔŋ nɔ ni etsi ebɛŋkɛ yei krokomɛi ni damɔ jɛmɛ lɛ. Jeee nyɔŋtsere lɛ ni haa hulu hiɛ hiŋmɛitswai fioo lɛ ni kɛ duŋ ni he ŋmɛlɛtswai etɛ nɛɛ ba. Ekolɛ, Maria kɛ mɛi krokomɛi ni damɔ Yesu masɛi lɛ nu kooloi komɛi ni bolɔɔ gbɛkɛ ni amɛfɔɔɔ bolɔmɔ shwane lɛ ahe. Mɛi krokomɛi ni damɔ jɛmɛ lɛ ‘she gbeyei waa, ni amɛkɛɛ: “Lɛɛlɛŋ, Nyɔŋmɔ Bi nɛ.”’ (Mateo 27:54) Eeenyɛ efee akɛ, Yesu sɛɛnyiɛlɔi lɛ kɛ mɛi krokomɛi ni yɔɔ jɛmɛ lɛ susu akɛ Yehowa hã duŋ lɛ wo koni ekɛtsɔɔ akɛ niseniianii ni afee e-Bi lɛ egba enaa ni edɔ lɛ waa.

Maria Magdalena nyɛɛɛ akwɛ piŋmɔ ni Yesu tsɔɔ mli lɛ, ni enyɛɛɛ eshi jɛmɛ hu. (Yohane 19:25, 26) Ekã shi faŋŋ akɛ, no mli lɛ, Yesu miipiŋ waa diɛŋtsɛ. Esa akɛ aye abua Yesu mami hu ni ashɛje emii.

Akɛni Yesu efee nibii pii ehã Maria hewɔ lɛ, lɛ hu eesumɔ ni efee nɔ fɛɛ nɔ ni ebaanyɛ kɛye ebua Yesu. Be ko ni eho lɛ, Maria ji yoo ni bɛ nɔ ko mli, shi Yesu hã eshihilɛ tsake kwraa. Yesu hã ehiɛ ba nyam ni ená hiɛnɔkamɔ. Ebatsɔ yoo ni hemɔkɛyeli mli wa waa. Mɛni hã eba lɛ nakai? Mɛni wɔbaanyɛ wɔkase kɛjɛ ehemɔkɛyeli lɛ mli ŋmɛnɛ?

Maria Magdalena he sane ni yɔɔ Biblia lɛ mli lɛ jeɔ shishi kɛ heyeli ni Yesu hã ená lɛ. Yesu hã eye ehe kɛje nɔ ko ni baanyɛ aye lɛ awui waa lɛ mli. Nakai beiaŋ lɛ, daimonioi naa mɛi anɔ hewalɛ waa, amɛtutua mɛi ni amɛbote mɛi komɛi po amli ni amɛkudɔ amɛ. Wɔleee bɔ ni daimonioi lɛ ye Maria Magdalena awui ehã; nɔ ni wɔle ji daimonioi kpawo ni yɔɔ basabasa ni piŋɔ mɔ ná enɔ hewalɛ. Shi dromɔ naa lɛ Yesu Kristo famɔ daimonioi nɛɛ fɛɛ kɛje emli!​—Luka 8:2.

Maria ye ehe kwraa kɛje daimonioi nɛɛ adɛŋ, ni ená miishɛɛ waa yɛ shihilɛ mli. Mɛni ebaafee kɛtsɔɔ akɛ ehiɛ esɔ nɔ ni Yesu efee ehã lɛ lɛ? Ebatsɔ Yesu sɛɛnyiɛlɔ anɔkwafo. Be ni ena akɛ nɔ ko he miihia Yesu kɛ ebɔfoi lɛ eye ebua amɛ. Ehã amɛ niyenii, atadei, kɛ wɔɔhe. Amɛjeee niiatsɛmɛi, ni agbɛnɛ hu, nakai beiaŋ lɛ, amɛtsuuu heloonaa nitsumɔ ko. Bɔ ni afee ni amɛnyɛ amɛkɛ amɛjwɛŋmɔ amã shiɛmɔ kɛ nitsɔɔmɔ lɛ nɔ lɛ, ehe bahia ni aye abua amɛ kɛ heloonaa nibii.

Maria kɛ yei krokomɛi lɛ ye amɛbua amɛ. Yei lɛ kɛ “amɛnibii sɔmɔɔ amɛ.” (Luka 8:1, 3) Eeenyɛ efee akɛ, yei nɛɛ ateŋ mɛi komɛi yɛ nii. Biblia lɛ etsɔɔɔ akɛ amɛhoo nii, amɛfɔ nibii ahe, loo amɛto wɔɔhe he gbɛjianɔ amɛhã amɛ yɛ akrowa fɛɛ akrowa mli. Shi amɛjɛ amɛtsuiŋ amɛtsu nitsumɔ kɛye amɛbua kuu nɛɛ ni ekolɛ amɛyifalɛ ji 20 ni fã gbɛ amɛyashiɛ yɛ heihei lɛ. Ekã shi faŋŋ akɛ yei nɛɛ amɔdɛŋbɔɔ lɛ ye ebua Yesu kɛ ebɔfoi lɛ ni amɛnyɛ amɛkɛ amɛjwɛŋmɔ fɛɛ mã shiɛmɔ nitsumɔ lɛ nɔ. Eji anɔkwale akɛ, Maria le akɛ nɔ ko kwraa bɛ ni ebaanyɛ efee kɛto Yesu najiaŋ​—shi emii shɛ ehe waa akɛ eefee nɔ ni ebaanyɛ kɛmiiye eebua lɛ!

Ŋmɛnɛ lɛ, mɛi ebuuu mɛi ni tsuɔ nitsumɔi ni tamɔ nɔ ni yei nɛɛ tsu amɛhã Yesu kɛ ebɔfoi lɛ. She jeee nakai kwraa Nyɔŋmɔ naa amɛ. Feemɔ bɔ ni ebaaná miishɛɛ ehã be ni ena Maria ni ekɛ ehewalɛ fɛɛ tsuɔ nii kɛyeɔ ebuaa Yesu kɛ ebɔfoi lɛ he mfoniri okwɛ! Ŋmɛnɛ hu lɛ, Kristofoi anɔkwafoi babaoo kɛ miishɛɛ tsuɔ nitsumɔi ni baa shi kɛsɔmɔɔ mɛi krokomɛi. Bei komɛi lɛ, nɔ ko ni obaafee kɛwa mɔ ko loo mlijɔlɛ wiemɔ ko po ni obaawie lɛ baanyɛ awo yibii kpakpai. Yehowa hiɛ sɔɔ nitsumɔi nɛɛ waa.​—Abɛi 19:17; Hebribii 13:16.

Maria Magdalena fata yei babaoo ni kɛ Yesu tee Yerusalem kɛhã afi 33 Ŋ.B. Hehoo lɛ yeli lɛ ahe. (Mateo 27:55, 56) Ekã shi faŋŋ akɛ be ni enu akɛ amɔ Yesu ni aye esane yɛ nyɔɔŋ lɛ mli lɛ, etsui kumɔ waa. Enu adafitswaa kroko ni ehiii kwraa. No ji, Amralo Ponto Pilato ŋmɛ gbɛ ni Yudafoi lɛ ajamɔŋ hiɛnyiɛlɔi lɛ kɛ asafo babaoo ni yɔɔ amɛshishi lɛ ná enɔ hewalɛ ni ekojo akɛ akɛ Yesu aya ni ayapiŋ lɛ yɛ tso nɔ ni egbo. Ekolɛ Maria na e-Nuŋtsɔ lɛ ni lá ewu ehe kpɔtɔɔ, ni etɔ lɛ bliboo ni etere tso kakadaŋŋ ni akɛbaasɛŋ lɛ lɛ kɛmiididãa kɛnyiɛ gbɛjegbɛi lɛ anɔ.​—Yohane 19:6, 12, 15-17.

Maria Magdalena kɛ yei krokomɛi lɛ “damɔ Yesu piŋmɔ tso lɛ he” be ni asɛŋ lɛ kɛ be ni duŋ lɛ wo shwane lɛ sɛɛ fɛɛ. (Yohane 19:25) Akɛni Maria yɛ jɛmɛ kɛjɛ shishijee kɛyashi naagbee hewɔ lɛ, be ni Yesu tuɔ emami ewoɔ ekaselɔ ni esumɔɔ esane waa lɛ dɛŋ koni ekwɛ lɛ lɛ ena ni enu. Be ni Yesu piŋɔ ni ebolɔɔ etsɛɔ e-Tsɛ lɛ enu. Ni enu enaagbee kunimyeli wiemɔi ni ewie etsɛɛɛ nɔŋŋ ni egbo lɛ hu, no ji “Agbe naa.” Maria he jara lɛ waa. Fɛɛ sɛɛ lɛ, ekã shi faŋŋ akɛ etee nɔ ehi jɛmɛ be ni Yesu egbo sɛɛ. Sɛɛ mli lɛ, etee nɔ ehi gbonyobu hee ni nuu niiatsɛ ni atsɛɔ lɛ Yosef ni jɛ Arimatia lɛ kɛ Yesu gbonyo lɛ bafɔ̃ mli lɛ naa.​—Yohane 19:30; Mateo 27:45, 46, 57-61.

Maria nɔkwɛmɔnɔ nɛɛ yeɔ ebuaa wɔ ni wɔnaa nɔ ni esa akɛ wɔfee kɛ́ wɔnyɛmi Kristofonyo ko kɛ shihilɛ ni mli wa ko miikpe. Wɔnyɛŋ wɔtsĩ amanehulu lɛ naa loo wɔfo amɛpiŋmɔ lɛ sɛɛ. Kɛ̃lɛ, wɔbaanyɛ wɔjie mlihilɛ kpo ni wɔfee ekãa hu. Kɛ́ mɔ ko kɛ shihilɛ ni mli wa ko miikpe lɛ, emasɛi ni enaanyo kpaakpa ko baahi lɛ po baanyɛ aye abua lɛ waa. Kɛ́ wɔhi wɔnyɛmi ko ni kɛ shihilɛ ni jaraa ko miikpe lɛ masɛi lɛ, emii baashɛ ehe waa, ni etsɔɔ akɛ wɔhemɔkɛyeli mli wa waa.​—Abɛi 17:17.

Be ni akɛ Yesu gbonyo lɛ yafɔ̃ gbonyobu lɛ mli lɛ sɛɛ lɛ, Maria fata yei ni yahé tsofai ni jeɔ ŋma koni sɛɛ mli lɛ amɛkɛbakpa gbonyo lɛ ahe. (Marko 16:1, 2; Luka 23:54-56) Be ni aye Hejɔɔmɔ Gbi lɛ agbe naa lɛ, ete shi leebi maŋkpa. Feemɔ lɛ ni efata yei krokomɛi ahe kɛnyiɛ duŋ mli yɛ gbɛjegbɛi lɛ anɔ kɛmiiya Yesu gbonyobu lɛ he lɛ he mfoniri okwɛ. Be ni amɛnyiɛ gbɛ kɛyaa lɛ, ekolɛ amɛbaabi amɛhe akɛ, “te wɔbaafee tɛŋŋ wɔkoklo tɛ agbo ni akɛtsi gbonyobu lɛ naa lɛ?” (Mateo 28:1; Marko 16:1-3) Fɛɛ sɛɛ lɛ, amɛkuuu amɛsɛɛ. Amɛhemɔkɛyeli lɛ tsirɛ amɛ ni amɛfee nɔ ni amɛbaanyɛ, ni amɛshi nɔ ni eshwɛ lɛ amɛhã Yehowa.

Eeenyɛ efee akɛ Maria klɛŋklɛŋ yashɛ gbonyobu lɛ he. Nɔ ni ena lɛ hã enaa kpɛ ehe waa. Akoklo tɛ lɛ kɛjɛ gbonyobu lɛ naa ni nɔ ko nɔ ko bɛ mli! Akɛni Maria sumɔɔ ni efee nibii oya hewɔ lɛ, amrɔ nɔŋŋ lɛ, ejo foi kɛba Petro kɛ Yohane ŋɔɔ ebabɔ amɛ nɔ ni ena lɛ he amaniɛ. Feemɔ ehe mfoniri ni etsui miisu ni eewie akɛ: “Amɛjie Nuŋtsɔ lɛ kɛje gbonyobu lɛ mli, ni wɔleee he ni amɛkɛ lɛ eyafɔ̃”! Petro kɛ Yohane wo foi kɛtee gbonyobu lɛ naa, be ni amɛna akɛ akoklo tɛ lɛ yɛ naa lɛ, amɛku amɛsɛɛ kɛtee amɛshĩai. *​—Yohane 20:1-10.

Maria kome too ku esɛɛ kɛba gbonyobu lɛ naa ebaanyiɛ jɛmɛ. Akɛni no mli lɛ, je tsɛreko tsɔ ni jɛmɛ fɛɛ ejɔ ni gbonyobu lɛ hu kã efolo hewɔ lɛ, Maria ye awerɛho waa ni ejwa yaafo. Edɔ emli ekwɛ gbonyobu lɛ mli, loloolo lɛ eheee eyeee akɛ Nuŋtsɔ lɛ bɛ mli, ni ena nɔ ko ni hã enaa kpɛ ehe waa. Ŋwɛibɔfoi enyɔ ni wo atadei yɛji tara shi yɛ mli! Amɛbi lɛ akɛ “Mɛni hewɔ ofóɔ?” Akɛni enaa ekpɛ ehe waa hewɔ lɛ, etĩ nɔ ni ekɛɛ Petro kɛ Yohane lɛ mli ehã amɛ, akɛ: “Amɛjie mi-Nuŋtsɔ lɛ kɛtee, ni mileee he ni amɛkɛ lɛ eyafɔ̃.”​—Yohane 20:11-13.

Etsɔ ehe ni ena nuu ko damɔ esɛɛ. Eyooo mɔ ni ji, no hewɔ lɛ, esusu akɛ abɔɔ nɔkwɛlɔ lɛ ni. Nuu lɛ jɛ mlihilɛ mli ebi lɛ akɛ: “Yoo, mɛni hewɔ ofóɔ? Namɔ otaoɔ?” Maria jie lɛ naa akɛ: “Onukpa, kɛ́ bo owó lɛ kɛtee lɛ, kɛɛmɔ mi he ni okɛ lɛ eyafɔ̃, ni mayawó lɛ kɛya.” (Yohane 20:14, 15) Bo lɛ susumɔ nɔ ni ewie lɛ he okwɛ. Ani yoo nɛɛ kome baanyɛ awo Yesu Kristo, ni eji nuu ni yɔɔ hewalɛ, ni ekwɔ ni eti lɛ gbonyo lɛ kɛya? Maria susuuu nibii nɛɛ ahe. Nɔ ni nɔŋŋ ni kã etsui nɔ ji ni efee nɔ ni sa akɛ efee.

Mɛɛ gbɛ nɔ wɔbaanyɛ wɔkase Maria Magdalena hemɔkɛyeli lɛ kɛ́ wɔmiiye awerɛho, loo wɔkɛ naagba wulu ko ni etamɔ nɔ ni wɔnyɛŋ naa wɔdamɔ lɛ kpe? Kɛ́ wɔkɛ wɔjwɛŋmɔ ma wɔgbɔjɔmɔi kɛ nɔ ni wɔnyɛŋ wɔfee lɛ pɛ anɔ lɛ, ekolɛ wɔbaashe gbeyei ni wɔnyɛŋ nɔ ko kwraa wɔfee. Shi kɛ́ wɔmia wɔhiɛ wɔfee nɔ ni wɔbaanyɛ ni wɔshi nɔ ni baashwɛ lɛ wɔhã Nyɔŋmɔ lɛ, ekolɛ wɔbaafee nibii babaoo ni wɔkpaaa gbɛ po. (2 Korintobii 12:10; Filipibii 4:13) Nɔ ni fe fɛɛ lɛ, Yehowa baaná wɔhe miishɛɛ. Ekã shi faŋŋ akɛ Maria fee nakai, ni Yehowa jwere lɛ yɛ gbɛ ni yɔɔ srɔto kwraa nɔ.

Nuu ni Maria na lɛ jeee abɔɔ nɔkwɛlɔ lɛ. Be ko ni eho lɛ, eji kapintafonyo, sɛɛ mli lɛ ebatsɔ tsɔɔlɔ, ni no sɛɛ hu lɛ ebatsɔ Maria Nuŋtsɔ ni Maria sumɔɔ esane waa. Shi Maria yooo lɛ, ni etsɔ ehe koni eya. Ebaaa Maria jwɛŋmɔŋ bibioo po akɛ Yesu ni: Atee Yesu shi akɛ mumɔŋ bɔɔ nɔ ni he wa waa. Yesu jie ehe kpo etsɔɔ Maria akɛ adesa shi jeee kɛ gbɔmɔtso ni ekɛshã afɔle lɛ. Yɛ eshitee lɛ sɛɛ lɛ, ejie ehe kpo yɛ be kɛ beiaŋ etsɔɔ mɛi ni le lɛ jogbaŋŋ lɛ po shi amɛyooo lɛ.​—Luka 24:13-16; Yohane 21:4.

Te fee tɛŋŋ ni Yesu jie ehe shi etsɔɔ Maria lɛ? Yɛ bɔ ni etsɛ wiemɔ kome ko lɛ hewɔ: “Maria!” Ená miishɛɛ waa ni ebɔi bolɔmɔ, eeenyɛ efee akɛ ekɛ Hebri wiemɔ ni ekɛfɔɔ Yesu tsɛmɔ lɛ tsɛ lɛ​—“Rabuni!” Ena e-Tsɔɔlɔ ni esumɔɔ esane waa lɛ! Ená miishɛɛ waa. Emɔ emli ni esumɔɔɔ akɛ eŋmɛɔ ehe.​—Yohane 20:16.

Yesu le nɔ ni yɔɔ Maria jwɛŋmɔŋ. No hewɔ lɛ, ekɛɛ lɛ akɛ: “Kpa mimli mɔmɔ.” Bo lɛ feemɔ ehe mfoniri ni ekɛ Maria miiwie yɛ mlihilɛ mli, ekolɛ efee ehiɛ ŋmɔlɔŋmɔlɔ be ni ejieɔ ehe kɛjeɔ Maria dɛŋ blɛoo ni ekɛɔ lɛ akɛ: “Mináko makwɔ kɛya Tsɛ lɛ ŋɔɔ” lɛ. No mli lɛ be ni ekɛbaaya ŋwɛi lɛ shɛko. Eyɛ nitsumɔ lolo ni ebaatsu yɛ shikpɔŋ lɛ nɔ, ni eesumɔ ni Maria aye abua lɛ. Ekã shi faŋŋ akɛ, Maria miibo nɔ fɛɛ nɔ ni Yesu wieɔ lɛ toi jogbaŋŋ. Yesu kɛɛ lɛ akɛ, “Yaa minyɛmimɛi lɛ aŋɔɔ ni oyakɛɛ amɛ akɛ, ‘Miikwɔ kɛmiiya mi-Tsɛ kɛ nyɛ hu nyɛ-Tsɛ, kɛ mi-Nyɔŋmɔ kɛ nyɛ hu nyɛ-Nyɔŋmɔ lɛ ŋɔɔ.’”​—Yohane 20:17.

Mɛɛ nitsumɔ ni yɔɔ nyam e-Nuŋtsɔ lɛ kɛwo edɛŋ nɛɛ! Be ni atee Yesu shi lɛ, Maria ji klɛŋklɛŋ kaselɔ ni na lɛ, ni amrɔ nɛɛ ehã lɛ hegbɛ ni nɔ bɛ akɛ egba mɛi sane kpakpa nɛɛ. Feemɔ bɔ ni ekɛ miishɛɛ kɛ oyaiyeli baayatao kaselɔi lɛ he mfoniri okwɛ. Feemɔ ehe mfoniri ekoŋŋ ni etsui miisu ni eegba kaselɔi lɛ sane ni ehiɛ kpaŋ nɔ ni amɛ hu amɛhiɛ kpaŋ nɔ lɛ, akɛ: “Mina Nuŋtsɔ lɛ!” Egba amɛ nɔ ni Yesu kɛɛ lɛ lɛ fɛɛ, akɛni emii eshɛ ehe waa hewɔ lɛ ewie oyayaayai. (Yohane 20:18) Sane ni Maria yagba lɛ hã sane ni yei krokomɛi ni tee Yesu gbonyobu ni kã efolo lɛ naa lɛ gba kaselɔi lɛ ye emuu.​—Luka 24:1-3, 10.

Te hii lɛ fee amɛ nii yɛ sane ni ababɔ amɛ lɛ he amɛhã tɛŋŋ? Shishijee lɛ amɛheee amɛyeee. Biblia lɛ kɛɔ akɛ: “Wiemɔi nɛɛ fee tamɔ wiemɔi foji kɛhã amɛ, ni amɛheee yei lɛ amɛyeee.” (Luka 24:11) Hii ni ehiɛɛɛ jwɛŋmɔ gbonyo nɛɛ dara yɛ akutsei ni aheee yei ayeee amli; Rabifoi lɛ amla ko tsɔɔ akɛ yoo nyɛɛɛ aye odase yɛ saneyelihe. Ekolɛ bɔfoi lɛ hã amɛkusumii lɛ ná amɛnɔ hewalɛ ni amɛyɔseee. Shi Yesu kɛ e-Tsɛ lɛ efeee nakai, amɛkwɛɛɛ hiɛiaŋ. Mɛɛ hegbɛ kpele po amɛhã yoo anɔkwafo nɛɛ nɛkɛ!

Ekã shi faŋŋ Maria hãaa bɔ ni hii lɛ fee amɛnii amɛhã lɛ agba enaa. Ele akɛ e-Nuŋtsɔ lɛ heɔ lɛ eyeɔ, ni no pɛ kɛkɛ fa hã lɛ. Akɛ sane ko ni tamɔ nɛkɛ ewo mɛi fɛɛ ni nyiɛɔ Yesu sɛɛ lɛ adɛŋ akɛ amɛgba mɛi. Biblia lɛ tsɛɔ nakai sane lɛ akɛ “Nyɔŋmɔ Maŋtsɛyeli lɛ he sane kpakpa lɛ.” (Luka 8:1) Yesu wooo ekaselɔi lɛ shi akɛ mɔ fɛɛ mɔ baahe amɛ aye loo mɔ fɛɛ mɔ baaná amɛnitsumɔ lɛ he miishɛɛ. Moŋ lɛ ekɛɛ amɛ akɛ abaawa amɛ yi. (Yohane 15:20, 21) No hewɔ lɛ, ehe miihia waa ni Kristofoi akai Maria Magdalena. Eyɛ mli akɛ kaselɔi lɛ ekomɛi heee lɛ amɛyeee amrɔ nɔŋŋ moŋ, shi ehãaa no afite miishɛɛ ni esa akɛ ekɛgba mɛi Yesu shitee lɛ he sane kpakpa lɛ!

Sɛɛ mli lɛ, Yesu jie ehe kpo etsɔɔ ebɔfoi lɛ, no sɛɛ lɛ ejie ehe kpo etsɔɔ ekaselɔi krokomɛi hu. Be ko po lɛ, ejie ehe kpo etsɔɔ mɛi ni fa fe 500 yɛ be kome mli! (1 Korintobii 15:3-8) Ekã shi faŋŋ akɛ be fɛɛ be ni Yesu baajie ehe kpo etsɔɔ mɛi lɛ, Maria yɛ jɛmɛ jio, ebɛ jɛmɛ jio lɛ, kɛ́ enu he po kɛkɛ lɛ, ehemɔkɛyeli lɛ mli waa. Eeenyɛ efee akɛ Maria Magdalena fata yei ni atsĩ amɛtã akɛ amɛmiifee kpee yɛ Yerusalem yɛ Pentekoste gbi lɛ nɔ be ni afɔse mumɔ krɔŋkrɔŋ lɛ ashwie Yesu kaselɔi ni ebua amɛhe naa lɛ anɔ lɛ ahe.​—Bɔfoi 1:14, 15; 2:1-4.

Wɔbaanyɛ wɔwie kɛ nɔmimaa akɛ Maria Magdalena hiɛ ehemɔkɛyeli lɛ mli kpɛŋŋ aahu kɛyashi egbo. Eba akɛ wɔteŋ mɔ fɛɛ mɔ hu baafee nakai nɔŋŋ! Kɛ́ wɔfee nibii kɛtsɔɔ akɛ wɔhiɛ sɔɔ nibii fɛɛ ni Yesu efee ehã wɔ lɛ, ni wɔjɛ heshibaa mli wɔhã Yehowa ye ebua wɔ ni wɔsɔmɔ mɛi krokomɛi lɛ ebaatsɔɔ akɛ wɔmiikase Maria Magdalena hemɔkɛyeli lɛ.