OBLAHII KƐ OBLAYEI BIƆ AKƐ
Adebɔɔ Aloo Sutsakemɔ?—Fã 2: Mɛni Hewɔ Esa akɛ Ote Shi Owo Sutsakemɔ Tsɔɔmɔ Lɛ?
Alex yiŋ efutu lɛ. Eheɔ Nyɔŋmɔ kɛ adebɔɔ eyeɔ kɛjɛ egbekɛbiiashi tɔŋŋ. Shi amrɔ nɛɛ eskul tsɔɔlɔ lɛ miima nɔ mi doo akɛ adesai jɛ sutsakemɔ mli kɛba, ni no ji nɔ ni jeŋshikpalɔi tsɔɔ. Alex sumɔɔɔ ni anaa lɛ akɛ eyɛ srɔto. Eshwie eyiŋ akɛ, ‘Kɛ́ jeŋshikpalɔi ewie akɛ adesai jɛ sutsakemɔ mli kɛba lɛ, namɔ ji mi ni mate shi mawo amɛ?’
Ani sane nɛɛ kɔɔ bo hu ohe? Ekolɛ, kɛjɛ ogbekɛbiiashi tɔŋŋ lɛ, oheɔ nɔ ni Biblia kɛɔ akɛ: “Nyɔŋmɔ bɔ ŋwɛi kɛ shikpɔŋ” lɛ oyeɔ. (1 Mose 1:1) Shi nyɛsɛɛ nɛɛ, mɛi miibɔ mɔdɛŋ ni amɛkɔne oyiŋ ni okpɛlɛ nɔ akɛ, adesai tsɔ sutsakemɔ nɔ kɛba, shi jeee bɔ abɔ amɛ. Ani obaahe amɛ oye? Mɛni hewɔ esa akɛ ote shi owo sutsakemɔ tsɔɔmɔ lɛ?
Yiŋtoi enyɔ ahewɔ ni esa akɛ ote shi owo sutsakemɔ tsɔɔmɔ lɛ
Jeŋshikpalɔi kɛ amɛhe kpãaa gbee yɛ sutsakemɔ tsɔɔmɔ lɛ he. Afii nyɔŋmai abɔ ni jeŋshikpalɔi kɛtao nii amli lɛ fɛɛ sɛɛ lɛ, amɛnyɛko amɛba gbeekpamɔ yɛ sutsakemɔ tsɔɔmɔ lɛ mligbalamɔ he.
Kɛhã hesusumɔ: Kɛ́ jeŋshikpalɔi, ni ji mɛi ni esa akɛ amɛnu sutsakemɔ tsɔɔmɔ lɛ shishi jogbaŋŋ lɛ kɛ amɛhe kpãaa gbee lɛ, ani eji tɔmɔ akɛ obaate shi owo?—Lala 10:4.
Nɔ ni oheɔ oyeɔ lɛ he miihia. Oblanuu ko ni atsɛɔ lɛ Zachary lɛ wie akɛ, kɛ́ wala ba kɛkɛ lɛ, no lɛ, sɛɛnamɔ bɛ wɔ kɛ nibii fɛɛ ni yɔɔ je lɛŋ lɛ ahe. Esane ja. Ejaakɛ, kɛ́ adesai jɛ sutsakemɔ mli kɛba lɛ, no lɛ, anyɛŋ ana nɔ hewɔ ni abɔ adesai. (1 Korintobii 15:32) Nɔ ni tamɔɔɔ nakai lɛ, kɛ́ abɔ adesai lɛ, no lɛ wɔbaanyɛ wɔná hetoi wɔhã sanebimɔi tamɔ: Mɛni hewɔ abɔ adesai kɛ mɛɛ hiɛnɔkamɔ yɔɔ kɛhã adesai.—Yeremia 29:11.
Kɛhã hesusumɔ: Kɛ́ ole anɔkwale ni kɔɔ sutsakemɔ tsɔɔmɔ lɛ kɛ adebɔɔ he lɛ, mɛɛ gbɛ nɔ obaanyɛ oná he sɛɛ?—Hebribii 11:1.
Sanebimɔi kɛhã hesusumɔ
SUSUMƆ NI AHIƐ: ‘Nɔ fɛɛ nɔ ni yɔɔ shihilɛ mli lɛ ba kɛkɛ.’
Namɔ aloo mɛni hã nibii lɛ ba?
Te nɔ ni jwɛŋmɔ yɔɔ mli lɛ—nɔ fɛɛ nɔ ba kɛkɛ aloo nɔ ko loo mɔ ko ji mɔ ni hã nɔ fɛɛ nɔ ba?
SUSUMƆ NI AHIƐ: ‘Adesai jɛ kooloi amli.’
Kɛ́ adesai jɛ kooloi, tamɔ aduji amli lɛ, belɛ mɛni hewɔ adesai yɔɔ jwɛŋmɔ kwraa fe nakai aduji lɛ? a
Mɛni hewɔ adebɔɔ nibii ni daraaa kwraa ni wala yɔɔ amɛmli lɛ po yɔɔ ŋwanyaŋŋ nakai lɛ? b
SUSUMƆ NI AHIƐ: ‘Adesai jɛ kooloi amli lɛɛlɛŋ.’
Mɔ ni hiɛ susumɔ nɛɛ, ani lɛ diɛŋtsɛ etao nii amli?
Mɛi enyiɛ yɔɔ ni heɔ sutsakemɔ tsɔɔmɔ lɛ amɛyeɔ akɛni akɛɛ amɛ akɛ nilelɔi fɛɛ heɔ tsɔɔmɔ nɛɛ amɛyeɔ lɛ hewɔ?
a Mɛi komɛi susuɔ akɛ akɛni adesai ajwɛŋmɔ dara fe aduji anɔ lɛ, no hewɔ ni amɛyɔɔ jwɛŋmɔ fe aduji lɛ. Kɛ́ ootao ona nɔ hewɔ ni nilee bɛ susumɔ nɛɛ mli lɛ, kwɛmɔ wolo ni ji, The Origin of Life—Five Questions Worth Asking lɛ baafã 28.
b Kwɛmɔ wolo ni ji, The Origin of Life—Five Questions Worth Asking lɛ baafã 8-12.
Ekolɛ Obaasumɔ Enɛ Hu
NIFEEMƆ WOJI
Mɛni Hewɔ Miheɔ Nyɔŋmɔ nɔ Miyeɔ?
Feemɔ klalo akɛ obaajɛ bulɛ mli otsɔɔ nɔ ni hãa oheɔ oyeɔ akɛ Nyɔŋmɔ yɛ lɛ mli ní osheee gbeyei.
SAJI NI OBLAHII KƐ OBLAYEI BIƆ
Adebɔɔ Aloo Sutsakemɔ?—Fã 1: Mɛni Hewɔ Esa akɛ Ohe Nyɔŋmɔ Nɔ Oye?
Ani obaasumɔ ni oná ekãa kɛgbala mli ohã mɔ ko? Naa nibii komɛi ni baaye obua bo ni onyɛ ohã mɔ ko ni baabi ohemɔkɛyeli lɛ he sane lɛ hetoo.
SAJI NI OBLAHII KƐ OBLAYEI BIƆ
Adebɔɔ Aloo Sutsakemɔ?—Fã 3: Mɛni Hewɔ Esa akɛ Ohe Adebɔɔ Oye?
Kɛ́ mɔ ko heɔ adebɔɔ eyeɔ lɛ, ani no tsɔɔ akɛ eteɔ shi ewoɔ jeŋ shikpamɔ?
