Susumɔ akɛ mɔ ko afã kɛshi shĩa lɛ baanyɛ afee miishɛɛ kɛ tsuifãa fɛɛ. Te obaafee tɛŋŋ ole akɛ ofee klalo akɛ obaashi shĩa ni okome oyahi he ko lɛ?

•  Pɛimɔ oyiŋtoi lɛ amli

•  Susumɔ nɔ ni baajɛ mli aba lɛ he

•  Nɔ ni otipɛŋfoi kɛɔ

Yiŋtoi babaoo yɛ ni obaanyɛ odamɔ nɔ ofã kɛshi shĩa​—ekomɛi yɛ ni nilee bɛ mli. Akɛ nɔkwɛmɔnɔ lɛ, oblanyo ko ni atsɛɔ lɛ Mario lɛ wie akɛ, “Mikpɛ miyiŋ akɛ mafã kɛshi shĩa koni maye mihe kɛje sɔ̃i ni esa akɛ matsu he nii yɛ shĩa lɛ ahe.”

Eji anɔkwale akɛ, kɛ́ okome oyahi he kroko lɛ, obaaná heyeli fioo. Onya ni eye afii 18 lɛ wie akɛ: “Kɛ́ ofã kɛshi shĩa lɛ, bo diɛŋtsɛ obaahoo oniyenii, obaawo otsũ kɛ nibii krokomɛi ahe nyɔji​—ejaakɛ ofɔlɔi bɛ jɛmɛ ni amɛbaawa bo!”

Sane lɛ nɔŋŋ ji akɛ: Esa akɛ ole nɔ hewɔ ni otaoɔ ofã kɛshi shĩa lɛ koni ole kɛji ofee klalo.

Yesu wie akɛ: “Nyɛteŋ namɔ ni kɛ́ eetao ema mɔɔ lɛ, klɛŋklɛŋ lɛ, etaŋ shi ni ebu naa ekwɛ kɛji eyɛ nii ni fa bɔ ni sa ni ekɛbaagbe naa lo?” (Luka 14:28) Te obaafee tɛŋŋ ‘obu naa okwɛ’ akɛ ehe miihia ni oshi shĩa lɛ? Okɛ saji ni nyiɛ sɛɛ nɛɛ apɛi omli.

ANI OBAANYƐ OHIƐ SHIKA JOGBAŊŊ?

Biblia lɛ kɛɛ akɛ: “Shika buɔ mɔ he.”​—Jajelɔ 7:​12.

• Ani ewa kɛhã bo akɛ okɛ shika baato?

• Ani ofiteɔ shika waa?

• Ani ofɔɔ shika faa?

Kɛ́ ohã sanebimɔi nɛɛ eko hetoo akɛ hɛɛ lɛ, no lɛ, kɛ́ ofã kɛshi shĩa lɛ, ebaafee naagba!

“Minyɛmi nuu lɛ fã kɛshi shĩa be eye afii 19. Yɛ afi kome pɛ mli lɛ, shika fɛɛ ni ekɛto lɛ tã, bank lɛ he ekar lɛ yɛ edɛŋ ejaakɛ enyɛɛɛ ewo shika ni efa lɛ, ni nitsumɔhei ni faa shika lɛ hu kpa lɛ shika faa ejaakɛ amɛna akɛ eyeee anɔkwa, sɛɛ mli lɛ, ekpa fai koni ahã eba shĩa.”​—Danielle.

Nɔ ni obaanyɛ ofee bianɛ: Bi ofɔlɔi ni amɛtsɔɔ bo shika ni amɛfiteɔ yɛ nyɔŋ kome mli. Mɛɛ nyɔji amɛwoɔ, ni mɛɛ gbɛ nɔ amɛtoɔ shika ni amɛnáa lɛ he gbɛjianɔ koni amɛnyɛ amɛwo nyɔji nɛɛ? Te amɛfeɔ tɛŋŋ amɛkɛ shika toɔ lɛ?

Sane lɛ nɔŋŋ ji akɛ: Kɛ́ okase bɔ ni ahiɛɔ shika jogbaŋŋ bianɛ be ni okɛ ofɔlɔi yɔɔ lɛ, ebaaye ebua bo koni wɔ sɛɛ kɛ́ oshi shĩa lɛ, onyɛ okpee shika he naagbai lɛ anaa.

Biblia lɛ kɛɛ: “Mɔ fɛɛ mɔ baatere lɛ diɛŋtsɛ ejatsu.”​—Galatiabii 6:5.

• Ani oji mɔ ko ni tsiɔ be ewoɔ be mli?

• Ani ofɔlɔi kaiɔ bo dani otsuɔ shĩa nitsumɔi?

• Ani efɔɔ kaa akɛ oyeee be ni ofɔlɔi eto akɛ okɛba shĩa lɛ nɔ?

Kɛ́ ohã sanebimɔi nɛɛ eko hetoo akɛ hɛɛ lɛ, no lɛ, kɛ́ ofã kɛshi shĩa ni okome oyahi shi lɛ ebaawa waa akɛ obaatsu osɔ̃i ahe nii.

“Kɛ́ okome oyɔɔ lɛ, nibii komɛi yɛ ni onyaŋ amɛfeemɔ he, shi esa akɛ otao be ni ofee. Mɔ ko ekɛŋ bo akɛ ofee nakai nibii lɛ, no hewɔ lɛ, ebaabi ni oto gbɛjianɔ koni onyɛ ofee.”​—Jessica.

Nɔ ni obaanyɛ ofee bianɛ: Kɔ nyɔŋ kome ni otsu shĩa nitsumɔi babaoo ahe nii bɔ ni obaanyɛ. Akɛ nɔkwɛmɔnɔ lɛ, bo diɛŋtsɛ saamɔ shĩa lɛ, fɔ onibii ahe, yaaye jara, hoomɔ nii daa gbɛkɛ, ni osha nibii amli. Enɛ baahã ona shihilɛ ni okɛbaakpe kɛ́ ofã kɛshi shĩa.

Sane lɛ nɔŋŋ ji akɛ: Kɛ́ onyɛɔ otsuɔ osɔ̃i ahe nii lɛ, ebaaye ebua bo kɛ́ okome oyahi he ko.

ANI OMLI FUƆ MRAMRA?

Biblia lɛ kɛɛ: ‘Nyɛjiea nibii nɛɛ fɛɛ yɛ nyɛhe nyɛshwiea: mlifu, mlila, efɔŋfeemɔ, wiemɔ fɔŋ.’​—Kolosebii 3:8.

• Ani ewa kɛhã bo akɛ obaatse ohiɛ ohã mɛi?

• Ani otsui shaa bo?

• Ani oyeɔ otsui naa sane?

Kɛ́ ohã sanebimɔi nɛɛ eko hetoo akɛ hɛɛ lɛ, no lɛ, wɔ sɛɛ lɛ, ebaawa kɛhã bo akɛ okɛ mɔ ko loo ogbalashihilɛ mli hefatalɔ baahi tsũ mli.

“Mɛi krokomɛi ni mikɛhi tsũ mli lɛ hã mina migbɔjɔmɔi lɛ. Mikase akɛ, akɛni kɛ́ mikɛ nɔnyɛɛ kpe lɛ mimli fuɔ hewɔ lɛ, mikpaaa gbɛ akɛ mɛi baaná mihe miishɛɛ. Esa akɛ makwɛ gbɛ ni hi ni matsɔ nɔ makpee nɔnyɛɛ ni mikɛkpeɔ lɛ naa.”​—Helena.

Nɔ ni obaanyɛ ofee bianɛ: Okɛ ofɔlɔi kɛ onyɛmimɛi lɛ ahi shi jogbaŋŋ. Ejaakɛ, bɔ ni obaafee onii ohã bianɛ yɛ amɛtɔmɔi lɛ ahe lɛ baatsɔɔ bɔ ni obaafee onii ohã yɛ mɔ ni okɛbaahi shi wɔ sɛɛ lɛ tɔmɔi ahe.

Sane lɛ nɔŋŋ ji akɛ: Esaaa akɛ ofãa kɛshiɔ shĩa kɛsusumɔ akɛ ootao ojo osɔ̃i anaa foi​—esa akɛ osaa ohe jogbaŋŋ dani oshi. Okɛ mɛi ni eye omanye yɛ shihilɛ ni tamɔ nakai mli lɛ agba sane? Bi amɛ ni amɛtsɔɔ bo nɔ ni kulɛ amɛbaafee loo nibii ni kulɛ amɛbaasumɔ akɛ amɛle ni amrɔ nɛɛ amɛná amɛle. Enɛ feemɔ yeɔ ebuaa waa kɛ́ obaakpɛ yiŋ ko ni he hiaa waa!