Oblayoo ko ni atsɛɔ lɛ Elaine lɛ wie akɛ: “Be ni mina akɛ mɛi ni mikɛyaa skul lɛ pii yɛ nanemɛi pii yɛ Intanɛt lɛ nɔ lɛ, mikɛɛ mihe akɛ, ‘Wao​—ale amɛ waa eii!’ Shi yɛ anɔkwale mli lɛ, no mli lɛ, miiye awuŋa.”

 Ani bo hu onu he nakai pɛŋ? Kɛ́ nakai lɛ, sane nɛɛ baanyɛ aye abua bo koni okaye otsui akɛ oosumɔ ni oná nanemɛi pii loo mɛi pii ale bo yɛ Intanɛt lɛ nɔ.

•  Mɛɛ oshãrai yɔɔ he?

•  Kwa ni akwaa afeɔ tamɔ ayɛ nanemɛi pii

•  Ani ehe miihia ni oná nanemɛi pii yɛ Intanɛt lɛ nɔ?

•  Kwɛmɔ ni owiemɔ akafee tamɔ ookwa ooba ohe shi

 Biblia lɛ kɛɔ yɛ Abɛi 22:1 lɛ akɛ, “Gbɛ́i kpakpa hi fe ninámɔ babaoo.” No hewɔ lɛ, naagba bɛ he akɛ obaaná gbɛ́i kpakpa, loo obaasumɔ ni mɛi asumɔ osane.

 Shi bei komɛi lɛ, akɛni mɛi sumɔɔ ni mɛi asumɔ amɛsane hewɔ lɛ, kɛ́ amɛnáaa nanemɛi babaoo lɛ, amɛmii shɛɛɛ amɛhe. Ani enɛ baanyɛ afee oshãra? Oblayoo ko ni atsɛɔ lɛ Onya ni eye afii 16 lɛ baakɛɛ bo akɛ, hɛɛ ebaanyɛ efee oshãra. Ewie akɛ:

 “Mina mɛi ni efee nibii ni jwɛŋmɔ bɛ mli, eko ji, mɔ ko tu kɛjɛ ŋwɛitsu nsɔɔdoi enyɔ nɔ kɛbayi shi yɛ miskul lɛ​—amɛfeɔ nakai koni amɛkɛhe gbɛ́i.”

 Mɛi komɛi feɔ nibii gbohii ni yɔɔ oshãra, ni amɛshaa kɛfɔ̃ɔ Intanɛt nɔ koni amɛkɛgbala mɛi ajwɛŋmɔ kɛba amɛnɔ. Akɛ nɔkwɛmɔnɔ lɛ, oblahii kɛ oblayei komɛi sha vidio ni amɛmiiye tsofã ko ni pɔizin yɔɔ mli ni akɛfɔɔ nibii ahe, nɔ ko ni esaaa ni adesa ko baafee, ni amɛkɛwoɔ Intanɛt lɛ nɔ!

 Biblia lɛ kɛɛ: “Nyɛkaŋmɛa . . . yaka anunyam taomɔ gbɛ.”​—Filipibii 2:3, Ga Biblia Momo.

 Kɛhã he susumɔ:

•   Ani onuɔ he akɛ ehe miihia ni oná nanemɛi pii yɛ Intanɛt lɛ nɔ?

•   Ani okɛ ohewalɛnamɔ loo owala baawo oshãra mli koni okɛgbala onanemɛi ajwɛŋmɔ kɛba onɔ loo amɛsumɔ osane?

 Jeee be fɛɛ be mɛi feɔ nibii ni yɔɔ oshãra koni amɛkɛná nanemɛi pii loo amɛkɛhe gbɛ́i. Oblayoo ko ni atsɛɔ lɛ Erica ni eye afii 22 lɛ tsɔɔ gbɛ kroko ni mɛi tsɔɔ nɔ kɛheɔ gbɛ́i:

 “Mɛi komɛi kɛ amɛhe mfonirii loo vidioi ni amɛshashai pii woɔ Intanɛt lɛ nɔ koni mɛi babaoo akwɛ ni efee tamɔ amɛyɛ nanemɛi pii ni amɛkɛshãraa be fɛɛ be. Enɛ tsɔɔ akɛ amɛmiikwa amɛmiifee tamɔ amɛyɛ nanemɛi pii.”

 Oblayoo ko ni atsɛɔ lɛ Cara, ni eye afii 15 lɛ kɛɛ, mɛi komɛi maleɔ koni mɛi aná nakai susumɔ lɛ:

 “Mina ni mɛi esha mfonirii tamɔ amɛyɛ paati shishi, tsɛbelɛ amɛyɛ shĩa.”

 Oblanyo ko ni atsɛɔ lɛ Matthew ni eye afii 22 lɛ, kɛɛ efee nɔ ko nakai daŋ:

 “Misha mfoniri ko ni miŋma yɛ he akɛ, misha yɛ Mount Everest, tsɛbelɛ mi diɛŋtsɛ lɛ, miyako Asia daŋ!”

 Biblia lɛ kɛɛ: “Wɔmiisumɔ ni wɔye anɔkwa yɛ nibii fɛɛ ni wɔfeɔ lɛ amli.”​—Hebribii 13:18.

 Kɛhã he susumɔ:

•   Kɛ́ oyaa Intanɛt lɛ nɔ lɛ, ani okɛ nibii woɔ nɔ koni oná nanemɛi babaoo loo koni ohe gbɛ́i?

•    Ani mfonirii kɛ saji ni okɛwoɔ nɔ lɛ tsɔɔ mɔ ni oji diɛŋtsɛ loo nɔ ni oheɔ oyeɔ?

 Mɛi pii heɔ amɛyeɔ akɛ nɔ titri ni hãa aheɔ gbɛ́i yɛ Intanɛt lɛ nɔ ji kɛ́ oyɛ nanemɛi pii. Matthew, ni wɔtsĩ eta kɛtsɔ hiɛ lɛ hu wie akɛ, kulɛ, lɛ hu nakai esusuɔ:

 “No mli lɛ, mibiɔ mɛi akɛ, ‘Nanemɛi enyiɛ oyɔɔ yɛ Intanɛt lɛ nɔ?’ loo ‘Mɛi enyiɛ ewie nibii ni okɛwoɔ nɔ lɛ ahe ekpakpa?’ Bɔ ni afee ni maná nanemɛi pii yɛ Intanɛt lɛ nɔ lɛ, miyakwɛɔ nibii ni mɛi ni mileee po lɛ kɛwoɔ nɔ lɛ kɛsusumɔ lɛ akɛ amɛ hu amɛbaakwɛ minɔ lɛ. Mibanu he akɛ esa akɛ maná nanemɛi pii, ni mahe gbɛ́i waa, ni Intanɛt lɛ hã nakai henumɔ lɛ mli wa waa.”

 Oblayoo ko ni atsɛɔ lɛ Maria ni eye afii 25 lɛ, yɔse akɛ, mɛi komɛi damɔɔ mɛi abɔ ni kwɛɔ nibii ni amɛkɛwo Intanɛt lɛ nɔ kɛ mɛi abɔ ni sumɔɔ nibii ni amɛkɛwoɔ nɔ lɛ anɔ amɛkwɛɔ kɛji amɛhe yɛ sɛɛnamɔ loo amɛhe bɛ sɛɛnamɔ:

 “Kɛ́ yoo ko kɛ ehe mfoniri fɔ̃ Intanɛt lɛ nɔ ni mɛi pii ewieee he ekpakpa lɛ, enuɔ he akɛ belɛ, ehe bɛ fɛo. Anɔkwa, susumɔ nɛɛ ejaaa, shi mɛi babaoo ni tamɔ lɛ lɛ hu nuɔ he nakai nɔŋŋ. Yɛ gbɛ ko nɔ lɛ, amɛ diɛŋtsɛ amɛmiiwa amɛhe yi.”

 Biblia lɛ kɛɛ: “Nyɛkahãa wɔnaa wɔhe tsɔ, ni wɔteɔ akaŋshii shi yɛ wɔteŋ, ni wɔhe miitsɛ̃tsɛ̃ɛ wɔhe.”​—Galatiabii 5:26.

 Kɛhã he susumɔ:

•   Kɛ́ okɛ Intanɛt lɛ tsuɔ nii lɛ, ani onaa akɛ ehãa okɛ ohe toɔ mɛi krokomɛi ahe?

•    Ani mɛi abɔ ni kwɛɔ nibii ni okɛfɔ̃ɔ Intanɛt lɛ nɔ lɛ ji nɔ ni he hiaa bo, loo nanemɛi kpakpai ni susuɔ ohe waa lɛ ji nɔ ni he hiaa bo?