Helai amli yɛ srɔtoisrɔtoi.

•   Mɛi komɛi lɛ, kɛ́ hela miiye amɛ lɛ, onyɛɔ onaa, shi mɛi komɛi anɔ hu lɛ, onaaa.

•   Helai komɛi yɛ ni jeee daa amɛjieɔ amɛhiɛ kpo, shi ekomɛi lɛ, amɛheɔ shi kwraa ni amɛgbaa mɛi lɛ anaa daa gbi.

•   Ekomɛi yɛ ni kɛhooo lɛ, abaanyɛ atsa loo amɔ naa fioo, ni ekomɛi hu lɛ, daa nɛɛ emli ewo wu​—ebaanyɛ ekɛ mɔ lɛ wala awo oshara mli po.

 Helai srɔtoi fɛɛ ni atsɔɔ yɛ biɛ lɛ nyɛɔ emɔmɔɔ oblahii kɛ oblayei. Abaawie mɛi ejwɛ ni helai nɛɛ miigba amɛnaa lɛ ahe yɛ sane nɛɛ mli. Kɛ́ hela ko miigba onaa lɛ, no lɛ saji ni amɛwie lɛ baanyɛ awo bo hewalɛ waa.

•  GUÉNAELLE

•  ZACHARY

•  ANAÏS

•  JULIANA

 Nɔ ko ni wa waa kɛhã mi ji ni makpɛlɛ he ni minyɛmɔ yawaa lɛ nɔ. Miisumɔ mafee nibii babaoo, shi gbi fɛɛ gbi lɛ ehe bahiaa ni majwɛŋ shihilɛ mli ni miyɔɔ lɛ he.

 Miyɛ jwɛŋmɔŋ hela ko (motor-neuromuscular disorder) ni hãaa migbɔmɔtso lɛ anyɛ atsu nii jogbaŋŋ. Bei komɛi lɛ, migbɔmɔtso lɛ fãi komɛi, kɛjɛ ŋwɛi kɛbayi shi feɔ shikpilikpii loo amɛtsuuu nii jogbaŋŋ. Minyɛɛɛ matsi mihe, mawie, makane nii, maŋma nii loo ni manu mɛi ashishi; kulɛ esaaa akɛ nibii bibii nɛɛ afeemɔ waa kɛhãa mi. Kɛ́ nibii afeemɔ wa kɛhã mi lɛ, misafoŋ onukpai lɛ kɛ mi feɔ ekome kɛsɔleɔ. Kɛ́ amɛkɛ mi sɔle lɛ, mihe jɔɔ mi amrɔ nɔŋŋ.

 Ekɔɔɔ he eko jaramɔ shihilɛ ni mikɛkpeɔ lɛ, minuɔ he akɛ Yehowa Nyɔŋmɔ yɛ mimasɛi be fɛɛ be koni ewaje mi. Misumɔɔɔ ni mihela lɛ tsiɔ minaa koni mikanyɛ mija lɛ kɛmɔ shi. Mikɛfee oti ni mã mihiɛ akɛ maye mabua mɛi ni amɛbale Biblia mli shiwoo akɛ etsɛŋ ni Yehowa Nyɔŋmɔ baahã shikpɔŋ lɛ atsɔ paradeiso ni nɔnai fɛɛ asɛɛ baafo.​—Kpojiemɔ 21:1-4.

 Kɛhã he susumɔ: Mɛɛ gbɛ nɔ obaanyɛ ofee onii tamɔ Guénaelle, ni bo hu omusuŋ atsɔ bo yɛ mɛi krokomɛi ahe?​—1 Korintobii 10:24.

 Be ni miye afii 16 lɛ, datrɛfoi na akɛ miná kansa henɔ ko ni mɔɔ jwɛŋmɔ lɛ ni hãa mɔ feɔ basabasa. Datrɛfoi lɛ kɛɛ mi akɛ magbo yɛ nyɔji kpaanyɔ pɛ sɛɛ. Kɛjɛ nakai beaŋ kɛbaa nɛɛ shihilɛ lɛ kɛ mi ewuwua shi.

 Yɛ he ni fũumɔ lɛ yaje yɛ migbɔmɔtso lɛ mli lɛ hewɔ lɛ, mininejurɔ gbɛ nyɛɛɛ atsu nii. Akɛni minyɛɛɛ manyiɛ hewɔ lɛ, daa nɛɛ, esa akɛ mɔ ko ahi mihe yɛ shĩa koni kɛ́ miiya he ko lɛ, eye ebua mi.

 Mihela lɛ mli ewa, no hewɔ lɛ, minyɛɛɛ mawie jogbaŋŋ. Tsutsu ko lɛ, miji mɔ ko ni yɔɔ ekãa waa, ni minyaa baskɛtbɔl kɛ vɔlibɔl tswaa he waa. Akɛ Yehowa Odasefonyo lɛ, mikɛ mihe woɔ sanekpakpa lɛ shiɛmɔ mli waa. Efeŋ mi akɛ mɛi babaoo baanu bɔ ni eji hã kɛ́ osumɔɔ nɔ ko feemɔ ni be shɛ ni onyɛɛɛ ofee dɔŋŋ lɛ shishi.

 Wiemɔi ni aŋma yɛ Yesaia 57:15 lɛ woɔ mi hewalɛ waa, ejaakɛ ehãa mináa nɔmimaa akɛ Yehowa Nyɔŋmɔ efee klalo akɛ ebaaye ebua mɛi ni ‘tswiaa shi yɛ mumɔŋ lɛ’ ni akɛ esusuɔ mihe. Agbɛnɛ hu lɛ, Yehowa ewo shi yɛ Yesaia 35:6 lɛ akɛ manyɛ manyiɛ ekoŋŋ ni maná hewalɛ kpakpa kɛsɔmɔ lɛ.

 Eyɛ mli akɛ bei komɛi lɛ, mihela lɛ hãa shihilɛ lɛ mli waa kɛhãa mi moŋ, shi miyɛ nɔmimaa akɛ Yehowa fĩɔ misɛɛ. Kɛtsɔ sɔlemɔ nɔ lɛ, mináa mɔ ko kɛ̃ mikɛgbaa sane daa kɛ́ minu he akɛ minijiaŋ miije wui loo shihilɛ lɛ miije mitsine. Nɔ ko nɔ ko bɛ ni baatse mi kɛje Yehowa suɔmɔ lɛ he.​—Romabii 8:39.

 Be ni abibii Zachary saji lɛ, nyɔji enyɔ sɛɛ lɛ ewɔ yɛ gbele mli be ni eye afii 18. Ehiɛ ehiɛnɔkamɔ yɛ Nyɔŋmɔ shiwoo akɛ ebaatee gbohii ashi kɛya paradeiso mli lɛ mli kpɛŋŋ kɛyashi egbo.

 Kɛhã he susumɔ: Mɛɛ gbɛ nɔ sɔlemɔ baanyɛ aye abua koni ohi Nyɔŋmɔ suɔmɔ lɛ mli taakɛ ebalɛ yɛ Zachary gbɛfaŋ lɛ?

 Be ni afɔ mi ni miye gbii fioo ko lɛ, miná jwɛŋmɔŋ hela ko (brain hemorrhage) ni gba migbɔmɔtso muu lɛ fɛɛ naa, titri lɛ minaji.

 Ŋmɛnɛ lɛ, mikɛ tso nyiɛɔ kɛyaa hei ni jekɛɛɛ, shi kɛ́ maya hei ni jekɛ lɛ, mitaa helatsɛmɛi ashwiili mli. Kɛfata he lɛ, hela ko tamɔ ablami shaa mi, ni ehãa niŋmaa waa kɛhãa mi.

 Shihilɛ ni mikɛkpeɔ lɛ naa wa, agbɛnɛ hu lɛ, minaaa hela lɛ naa tsabaa. Mitee helatsamɔhe kɛhã gbɔlemɔ shii abɔ yɛ otsi mli. Be ni miye afii enumɔ lɛ, afee mi opireshɛŋ ko ni mli wa waa, ni kɛjɛ no nɔ kɛbaa nɛɛ afee mi opireshɛŋ etɛ krokomɛi hu ni mli wala. Naagbee opireshɛŋ enyɔ ni afee mi lɛ waa mihe waa, ejaakɛ be ni agbe naa lɛ, ehe mi nyɔji etɛ dani miba shĩa.

 Miweku lɛ eye ebua mi waa. Kɛ́ sane ko ba lɛ, wɔŋmɔɔ, ni enɛ yeɔ ebuaa mi waa kɛ́ minijiaŋ je wui. Mimami kɛ minyɛmimɛi yei lɛ yeɔ amɛbuaa mi koni masaa mihe, ejaakɛ mi diɛŋtsɛ minyɛɛɛ mihe masaa. Edɔɔ mi akɛ minyɛɛɛ mawo tokotai ni nɔ kwɔlɔ. Shi be ni midako lɛ, mibɔ mɔdɛŋ miwo eko shi kome, mikɛ miniji wo mli ni mikɛ bɔi waamɔ, ni wɔ fɛɛ wɔkɛfee ŋmɔlɔ!

 Mihãaa mihela lɛ ahé mijwɛŋmɔ fɛɛ. Mikaseɔ wiemɔi krokomɛi. Eyɛ mli akɛ minyɛɛɛ mikɛ ŋmoŋmolo aye odi moŋ shi minyɛɔ misereɔ waa. Akɛ Yehowa Odasefonyo lɛ, misumɔɔ ni mashiɛ mihemɔkɛyeli lɛ he sane matsɔɔ mɛi. Kɛ́ mi kɛ mɛi miigba sane lɛ, etamɔ nɔ ni amɛboɔ mi toi waa.

 Be ni midako lɛ, mifɔlɔi tsɔɔ mi akɛ mishihilɛ lɛ ehiŋ shi kɛyaŋ naanɔ. Kɛjɛ nakai beaŋ kɛbaa nɛɛ, mi diɛŋtsɛ miwaje mihemɔkɛyeli ni miyɔɔ yɛ Yehowa kɛ shi ni ewo akɛ ebaafo nɔnai fɛɛ ni minɔ lɛ fata he lɛ asɛɛ lɛ mli. Enɛ wajeɔ mi ni mináa ekãa.—Kpojiemɔ 21:3, 4.

 Kɛhã he susumɔ: Taakɛ Anaïs fee lɛ, mɛni bo hu obaanyɛ ofee koni ‘ohela lɛ akahe ojwɛŋmɔ fɛɛ’?

 Miiye hela ko ni waa mɔ he waa ni nyɛɔ emɔɔ tsui, flufla kɛ la lɛ. Amrɔ nɛɛ po lɛ emɔ misabai lɛ.

 Be ni miye afii nyɔŋma tɔŋŋ ni datrɛfoi yɔse akɛ miiye hela ko (lupus), hela nɛɛ hãa mipiŋɔ waa, etɔɔ mi, ni etsɛɛɛ nɔŋŋ kɛkɛ lɛ miwerɛ eho mihe. Bei komɛi lɛ, minuɔ he akɛ sɛɛnamɔ bɛ mihe.

 Be ni miye afii 13 lɛ, Yehowa Odasefonyo ko ba wɔshĩa lɛ. Ekane Yesaia 41:10 lɛ ehã mi, jɛmɛ kɛɔ akɛ: “Kaashe gbeyei, shi mi, mikɛo yɔɔ!. . . . mahiɛ omli kɛ mijalɛ ninejurɔ lɛ.” Nakai beaŋ Yehowa Odasefoi kɛ mi bɔi nikasemɔ. Afii kpaanyɔ ni eho nɛ lɛ, mikɛ mitsui fɛɛ miisɔmɔ Nyɔŋmɔ, ni mitswa mifai shi akɛ mihaŋ mihela lɛ aye minɔ. Minuɔ he akɛ Yehowa ehã mi “hewalɛ ní fá kɛteke nɔ,” bɔ ni afee ni manyɛ maná miishɛɛ.​—2 Korintobii 4:7.

 Kɛhã hesusumɔ: Mɛɛ gbɛ nɔ Yesaia 41:10 lɛ baanyɛ aye abua bo ni oná miishɛɛ, taakɛ eye ebua Juliana lɛ?