“Bei pii lɛ, bɔlɛnamɔ bayiɔ mijwɛŋmɔ mli trukaa. Etamɔ nɔ ni mɔ kroko jwɛŋmɔ ebabote miyitsoŋ.”​—Vera.

“Bei komɛi lɛ, mináaa lɛ mlɛo akɛ majie mijwɛŋmɔ kɛje bɔlɛnamɔ nɔ. Efeɔ mlɛo kɛhãa mi akɛ mafɔmɔ miniji oookɛɛ miitao mafiliki.”​—John.

Ani bɔ ni onuɔ he ohãa lɛ tamɔ Vera kɛ John nɔ lɛ? Kɛ́ nakai lɛ, sane nɛɛ baanyɛ aye abua bo.

•  Mɛni hewɔ esaaa akɛ wɔyaa nɔ wɔjwɛŋɔ bɔlɛnamɔ he?

•  Mɛni hewɔ ewa waa akɛ wɔbaakpa bɔlɛnamɔ he susumɔ?

•  Nɔ ni obaanyɛ ofee

•  Nɔ ni otipɛŋfoi kɛɔ

Oblanyo ko ni atsɛɔ lɛ Alex lɛ wie akɛ: “Mitsɛkwɛ̃ ko kɛɛ mi akɛ eji Nyɔŋmɔ sumɔɔɔ ni maná bɔlɛ kulɛ, ebɔŋ mi ni manu he akɛ esa akɛ maná bɔlɛ.”

Sane ni Alex tsɛkwɛ̃ lɛ wie lɛ eko ja​—Nyɔŋmɔ bɔ wɔ koni wɔnu he akɛ esa akɛ wɔná bɔlɛ, ni efee nakai yɛ yiŋtoo kpakpa hewɔ. Eji Nyɔŋmɔ ebɔɔɔ wɔ ni wɔná bɔlɛ kulɛ, kulɛ ŋmɛnɛ lɛ, adesa ko adesa ko bɛ. No hewɔ lɛ, mɛni hewɔ mɔ ni esa akɛ okpa bɔlɛnamɔ he susumɔ lɛ? Naa yiŋtoi kpakpai enyɔ komɛi ahewɔ:

• Biblia lɛ tsɔɔ akɛ, Nyɔŋmɔ yiŋtoo ji akɛ, ja nuu kɛ yoo ebote gbalashihilɛ mli dani amɛbaanyɛ amɛná bɔlɛ.​—1 Mose 1:28; 2:24.

  Kɛ́ oboteko gbalashihilɛ mli ni oyɛ bulɛ kɛhã nɔ ni Nyɔŋmɔ ewie nɛɛ, no lɛ kɛ́ otee nɔ ojwɛŋ bɔlɛnamɔ he lɛ, ebaagba onaa. Ebaanyɛ eka bo koni oyaná bɔlɛ​—mɛi pii ekɛɛ akɛ be ni amɛfee nakai lɛ, sɛɛ mli lɛ amɛshwa amɛhe.

• Kɛ́ okase bɔ ni obaafee ojie ojwɛŋmɔ kɛje bɔlɛnamɔ nɔ lɛ, ebaawa bo ni oná su ni ji henɔyeli, ni su nɛɛ baaye abua bo yɛ oshihilɛ mli nibii pii amli.​—1 Korintobii 9:25.

Su ni ji henɔyeli lɛ baaye abua bo ni oná miishɛɛ yɛ shihilɛ mli ŋmɛnɛ kɛ wɔsɛɛ fɛɛ. Anɔkwa, niiamlitaomɔ ko ni afee lɛ tsɔɔ akɛ, gbekɛbii ni nyɛɔ amɛyeɔ amɛhe nɔ lɛ, kɛ́ amɛdara lɛ, hela efɔɔɔ amɛ mɔmɔ, amɛyeee amɛtsui yɛ shika he, ni amɛnáaa sane ni baabi ni awo amɛtsuŋ. a

Mɛi ni ebɔle wɔ lɛ susuɔ bɔlɛnamɔ he be fɛɛ be ni amɛwieɔ he hu, ni kɛ́ oji oblanyo loo oblayoo hu lɛ, tsakemɔi komɛi yaa nɔ yɛ ogbɔmɔtso lɛ mli ni hãa onuɔ he akɛ esa akɛ oná bɔlɛ.

“Nibii ni ajieɔ yɛ TV nɔ lɛ ateŋ babaoo hãa efeɔ tamɔ nɔ ni naagba ko kwraa bɛ he akɛ okɛ mɔ ko ni okɛ lɛ boteko gbalashihilɛ mli lɛ baaná bɔlɛ, ni kɛ́ ofee nakai lɛ, nɔ ko gbonyo ko kwraa jɛŋ mli kɛbaŋ. Kɛ́ mɔ ko kɛ mɔ ko ni ekɛ lɛ boteko gbalashihilɛ mli ná bɔlɛ, ni ahãaa ana akɛ eji tɔmɔ lɛ, ewaaa akɛ bɔlɛnamɔ baaba ojwɛŋmɔ mli.”​—Ruth.

“Kɛ́ mitee nitsumɔ lɛ, minuɔ bɔlɛnamɔ he saji ni esaaa babaoo, ni ehãa minuɔ he akɛ esa akɛ male nɔ ni amɛwieɔ lɛ. Ahã bɔlɛnamɔ jeŋba sha efee tamɔ nɔ ko ni naagba bɛ he, no hewɔ lɛ, ewa akɛ obaana akɛ eji nɔ fɔŋ.”​—Nicole.

“Kɛ́ ookwɛ mfonirii yɛ social media lɛ nɔ, ni ohãaa ohiɛ ahi ohe nɔ lɛ, ewaŋ akɛ obaagbee oshãra mli. Kɛ́ bɔlɛnamɔ he mfoniri kome bote ojwɛŋmɔ mli lɛ, ebaawa akɛ ohiɛ baakpa nɔ!”​—Maria.

Yiŋtoi nɛɛ ahewɔ lɛ, ekolɛ obaanu he tamɔ bɔfo Paulo nu he lɛ. Eŋma akɛ: “Kɛ́ miitao mafee nɔ ni ja lɛ, minaa nɔ gbonyo hu yɛ mimli.”​—Romabii 7:21.

Jwɛŋmɔ nibii krokomɛi ahe. Bɔɔ mɔdɛŋ ni okɛ ojwɛŋmɔ aya nibii krokomɛi anɔ moŋ fe bɔlɛnamɔ nɔ. Obaanyɛ osusu nibii ni onyaa amɛfeemɔ he, tamɔ kpɔiaŋgbɔlemɔ nifeemɔi, loo nɔ kroko ni baahã ojie ojwɛŋmɔ kɛje bɔlɛnamɔ nɔ lɛ he. Oblayoo ko ni atsɛɔ lɛ Valerie lɛ wie akɛ: “Biblia kanemɔ yeɔ ebuaa waa. Nyɔŋmɔ he saji yɛ mli, no hewɔ lɛ, kɛ́ oojwɛŋ Nyɔŋmɔ he lɛ, ebaawa akɛ obaajwɛŋ nɔ kroko he.”

Eji anɔkwale akɛ, bɔlɛnamɔ he susumɔ baanyɛ aba ojwɛŋmɔ mli. Shi bo obaakpɛ oyiŋ akɛ obaajie yɛ ojwɛŋmɔ mli loo ofeŋ nakai. Kɛ́ ojie yɛ ojwɛŋmɔ mli lɛ, ebaawa bo waa.

“Kɛ́ bɔlɛnamɔ he saji bayi mijwɛŋmɔ mli lɛ, mibɔɔ mɔdɛŋ mijwɛŋɔ nibii krokomɛi moŋ ahe. Mitaoɔ nɔ ni hã bɔlɛnamɔ he saji lɛ bayi mijwɛŋmɔ mli lɛ, kɛ́ lala loo mfoniri ko lɛ, midilitiɔ.”​—Helena.

Biblia mli shishitoo mla: “Nɔ fɛɛ nɔ ni ja, nɔ fɛɛ nɔ ni he tse [loo “ni yɔɔ krɔŋŋ,” shishigbɛ niŋmaa], . . . nyɛyaa nɔ nyɛsusua enɛɛmɛi ahe.”​—Filipibii 4:8.

Halamɔ nanemɛi kpakpai. Kɛ́ onanemɛi lɛ sumɔɔ bɔlɛnamɔ he wiemɔ lɛ, ebaawa akɛ obaajie ojwɛŋmɔ yɛ nɔ.

“Be ni miyeko afii 20 lɛ, ewa waa kɛhã mi akɛ majie mijwɛŋmɔ kɛje nibii gbohii anɔ, ni mɛi ni mikɛbɔ lɛ titri hã eba lɛ nakai. Kɛ́ okɛ mɛi ni kɛɔ akɛ naagba ko kwraa bɛ bɔlɛnamɔ jeŋba sha he lɛ bɔɔ lɛ, ehãa okɛ ojwɛŋmɔ maa bɔ ni onuɔ he ohãa lɛ nɔ, ni no hãa bɔ ni onuɔ he ohãa lɛ mli waa moŋ fe tsutsu lɛ.”​—Sarah.

Biblia mli shishitoo mla: “Mɔ ni kɛ hiɛshikalɔi nyiɛɔ lɛ, ebaatsɔ hiɛshikalɔ, shi mɔ ni kɛ kwashiai bɔɔ lɛ, egbeŋ naa ekpakpa.”​—Abɛi 13:20.

Tsi ohe kɛje hiɛtserɛjiemɔi ni esaaa ahe. Mɔ fɛɛ mɔ le akɛ, bɔlɛnamɔ jeŋba sha yɛ nibii ni akɛjieɔ hiɛtserɛ lɛ babaoo amli. Nicole wie akɛ: “Mi lɛ, lala náa minɔ hewalɛ waa. Enyɛɔ ehãa henumɔi ni miyɔɔ kɛhã bɔlɛnamɔ lɛ mli waa aahu akɛ, minyɛɛɛ he nɔ ko mafee dɔŋŋ.”

“Mibɔi TV nɔ nibii kɛ fim ni bɔlɛnamɔ jeŋba sha yɔɔ mli lɛ kwɛmɔ. Ená minɔ hewalɛ ní miyɔseee, ni mibɔi bɔlɛnamɔ he susumɔ waa. Ewaaa kɛhã mi akɛ mana nɔ ni hã eba lɛ nakai lɛ. Be ni mikpa TV nɔ nibii kɛ fim ni kɔɔ bɔlɛnamɔ he lɛ kwɛmɔ lɛ, ehã mikpa nibii gbohii nɛɛ ahe susumɔ. Kɛ́ mihala hiɛtserɛjiemɔi ni sa lɛ, ebaafee mlɛo kɛhã mi akɛ majie mijwɛŋmɔ kɛje susumɔi gbohii anɔ.”​—Joanne.

Biblia mli shishitoo mla: “Ajwamaŋbɔɔ kɛ muji nii srɔtoi fɛɛ kɛ amimyeli lɛ, akatsĩ tã po yɛ nyɛteŋ.”​—Efesobii 5:3.

Sane lɛ nɔŋŋ ji akɛ: Mɛi komɛi susuɔ akɛ amɛbɔlɛnamɔ henumɔi ahe miihia aahu akɛ, esaaa akɛ amɛyeɔ nɔ, ni kɛ́ amɛbaanyɛ amɛye nɔ po lɛ, amɛfeŋ. Shi Biblia lɛ wieɔ nɔ ko srɔto kwraa. Ewoɔ wɔhiɛ nyam, ejaakɛ etsɔɔ akɛ adesai baanyɛ aye amɛhe nɔ loo amɛkudɔ amɛsusumɔi.

Biblia mli shishitoo mla: “Nyɛyaa nɔ nyɛtsakea nyɛjwɛŋmɔ koni etsɔ ehee be fɛɛ be.”​—Efesobii 4:23.