•  Nɔ ni esa akɛ ole

•  Nɔ ni obaanyɛ ofee

•  Nɔ ni otipɛŋfoi kɛɔ

Kɛ́ ofɔlɔi baahe bo amɛye lɛ, esa akɛ ofee nibii ni tsɔɔ akɛ abaanyɛ amu afɔ̃ onɔ. Kɛ́ oyeɔ mlai ni ofɔlɔi woɔ bo lɛ anɔ lɛ, etamɔ nɔ ni oowo nyɔmɔ ko ni ohiɛ. Ohiɛ ofɔlɔi toiboo he nyɔmɔ, no hewɔ lɛ, nyɔmɔ nɛɛ ni obaaya nɔ ‘owo’ lɛ baahã ‘amɛjwere’ bo (loo amɛhã bo heyeli) babaoo. Yɛ gbɛ kroko nɔ lɛ, kɛji ofee nibii ni hãaa amɛhe bo amɛye lɛ, no lɛ kɛ́ amɛgbɔ heyeli ni amɛhã bo lɛ nɔ lɛ, kaahã efee bo naakpɛɛ.’

Ebaahe be dani ofɔlɔi baahe bo amɛye. Esa akɛ otsu nitsumɔi ni ofɔlɔi kɛwoɔ odɛŋ be fɛɛ be lɛ dani amɛbaahã bo heyeli babaoo.

SANE NI BA DIƐŊTSƐ: “Be ni miji oblanyo lɛ, mile nɔ tuuntu ni mifɔlɔi taoɔ akɛ mafee, no hewɔ lɛ, mikwaa mifeɔ tamɔ nɔ ni miifee, shi yɛ anɔkwale mli lɛ, mifeɔ nɔ ni mi diɛŋtsɛ misumɔɔ lɛ yɛ teemɔ mli. Enɛ hã ewa kɛhã mifɔlɔi akɛ amɛbaahe mi amɛye. Sɛɛ mli lɛ, miyɔse akɛ, gbɛ kome pɛ yɔɔ ni manyɛ matsɔ nɔ maná heyeli babaoo, no ji ni maye anɔkwa. Esa akɛ oye anɔkwa dani ahe bo aye.”​—Craig.

Wiemɔ anɔkwale, kɛ́ nakai feemɔ wa po. Mɔ fɛɛ mɔ tɔ̃ɔ, shi kɛ́ otɔ̃ ni omale kɛtsĩmɔ nɔ (loo oshiu anɔkwalei komɛi anɔ) lɛ, ofɔlɔi heŋ bo amɛyeŋ dɔŋŋ. Yɛ gbɛ kroko nɔ lɛ, kɛ́ ofee nibii ni tsɔɔ akɛ oyeɔ anɔkwa lɛ, ofɔlɔi náa hekɛnɔfɔɔ yɛ omli, amɛbaana akɛ oda, ni okpɛlɛɔ otɔmɔi anɔ. Gbɔmɔ ni tamɔ nɛkɛ aheɔ ayeɔ.

“Kɛ́ otɔ̃ lɛ, no etsɔɔɔ akɛ aheŋ bo ayeŋ, moŋ lɛ, kɛ́ otɔ̃ɔ ni okɛtoɔ lɛ, aheŋ bo ayeŋ.”​—Anna.

Biblia lɛ kɛɔ akɛ: “Wɔmiisumɔ ni wɔye anɔkwa yɛ nibii fɛɛ ni wɔfeɔ lɛ amli.”​—Hebribii 13:18.

• Kɛhã he susumɔ: Kɛ́ ofɔlɔi bi bo akɛ nɛgbɛ oyaa ni mɛni oyaafee yɛ jɛmɛ lɛ, ani okɛɔ amɛ anɔkwale lɛ fɛɛ. Loo kɛ́ amɛbi bo akɛ nɛgbɛ otee ni mɛni oyafee yɛ jɛmɛ lɛ, ani okɛɔ amɛ anɔkwalei lɛ fɛɛ aloo okɛ ekomɛi teɔ?

Tsu osɔ̃i ahe nii. Bo mlai ni ofɔlɔi ewo yɛ shĩa lɛ fɛɛ toi. Tsu shĩa nitsumɔi ni akɛhã bo lɛ fɛɛ. Ye obe nɔ be fɛɛ be. Kɛ́ ahã bo nifeemɔ ko yɛ skul lɛ, bo diɛŋtsɛ feemɔ. Ye be ni ato ahã bo akɛ esa akɛ okɛhi shĩa lɛ nɔ.

“Kɛ́ ofɔlɔi ŋmɛ bo gbɛ ni okɛ onanemɛi je kpo, shi amɛkɛɛ bo akɛ esa akɛ be ni abaatswa gbɛkɛ 9:00 lɛ oyɛ shĩa, ni oba shĩa 10:30 lɛ, no lɛ be kroko kɛ́ okɛɛ amɛ akɛ ootao okɛ onanemɛi lɛ aje kpo lɛ, amɛŋmɛŋ bo gbɛ!”​—Ryan.

Biblia lɛ kɛɔ akɛ: “Mɔ fɛɛ mɔ baatere lɛ diɛŋtsɛ ejatsu ni ji esɔ̃.”​—Galatiabii 6:5, shishigbɛ niŋmaa.

• Kɛhã he susumɔ: Ani ale bo akɛ mɔ ko ni yeɔ be nɔ, mɔ ko ni gbeɔ eshĩa nitsumɔ naa mra, kɛ mɔ ko ni yeɔ mla nɔ​—kɛ́ onyaaa he po?

Too otsui shi. Kɛ́ ofee nɔ ko ni efite hekɛnɔfɔɔ ni ofɔlɔi yɔɔ yɛ omli lɛ, ebaahe be dani amɛbaahe bo amɛye ekoŋŋ. Shi ná tsui ni omɛ.

“Be ni mida kɛshɛ he ko ni mifɔlɔi hãaa mafee nibii komɛi ni mikpaa gbɛ akɛ amɛbaahã mafee lɛ, egba minaa waa. Miyɔseee akɛ kɛ́ mɔ ko eda yɛ afii amli lɛ, no etsɔɔɔ doo akɛ ejwɛŋmɔ esa. Mibi mifɔlɔi ni amɛhã mi hegbɛ koni mahã amɛna akɛ, amɛbaanyɛ amɛmu amɛfɔ̃ minɔ. Ehe mi be, shi minyɛ mitsu he nii. Mina akɛ mɔ ko nifeemɔi anɔ adamɔɔ amuɔ afɔ̃ɔ enɔ, shi jeee afii abɔ ni eye lɛ nɔ.”​—Rachel.

Biblia lɛ kɛɔ akɛ: “Nyɛyaa nɔ nyɛkaa bɔ ni nyɛji diɛŋtsɛ lɛ nyɛkwɛa.”​—2 Korintobii 13:5.

• Kɛhã he susumɔ: Kɛ́ ootao ni ofɔlɔi ahe bo amɛye (loo amɛhe bo amɛye ekoŋŋ) lɛ, mɛɛ nibii komɛi obaanyɛ ofee koni okɛhã amɛna ‘bɔ ni oji diɛŋtsɛ’?

Ŋaawoo: Okɛ oti ko ama ohiɛ akɛ obaaye obe nɔ, obaagbe oshĩa nitsumɔi anaa mra, obaahi shĩa yɛ be ni ato ahã bo lɛ naa, loo obaafee nɔ kroko. Hã ofɔlɔi ale yiŋ ni okpɛ lɛ, ni obi amɛ ni amɛtsɔɔ bo nɔ ni amɛbaasumɔ ni ofee koni amɛhe bo amɛye. No sɛɛ lɛ, miamɔ ohiɛ ni okɛ Biblia mli ŋaawoo ni nyiɛ sɛɛ nɛɛ atsu nii, ekɛɛ: ‘Nyɛjiea subaŋ momo lɛ ni kɛ nyɛtsutsu jeŋba lɛ kpãa gbee lɛ nyɛshɛa nyɛfɔa.’ (Efesobii 4:​22) Be baashɛ ni ofɔlɔi baana akɛ oofee tsakemɔ!