“Be ni miye afii 15 lɛ, mikɛ mifɔlɔi kpãa gbee yɛ mlai ni amɛwoɔ mi lɛ ahe, shi amrɔ nɛɛ ni miye afii 19 lɛ, miinu he akɛ esa akɛ maná heyeli babaoo.”​—Sylvia.

Ani onuɔ he tamɔ bɔ ni Sylvia nuɔ he lɛ? Kɛ́ nakai lɛ, sane nɛɛ baaye abua bo ni okɛ ofɔlɔi agba bɔ ni onuɔ he ohãa lɛ he sane.

•  Nɔ ni esa akɛ ole

•  Nɔ ni obaanyɛ ofee

•  Nɔ ni otipɛŋfoi kɛɔ

Dani okɛ ofɔlɔi baawie mlai ni amɛwo bo lɛ ahe lɛ, susumɔ saji ni nyiɛ sɛɛ nɛɛ ahe:

• Kɛ́ mlai bɛ lɛ, basabasafeemɔ baa. Susumɔ gbɛjegbɛ wulu ko ni okadii bɛ nɔ, traffic light bɛ he, ni foi ni esa akɛ tsɔji kɛnyiɛ nɔ hu bɛ he lɛ he okwɛ. Mlai ni ofɔlɔi woɔ yɛ shĩa lɛ tamɔ mlai ni yɔɔ gbɛjegbɛi ahe lɛ nɔŋŋ, amɛyeɔ amɛbuaa ni nɔ fɛɛ nɔ yaa nɔ jogbaŋŋ.

• Mlai ni ofɔlɔi woɔ bo lɛ tsɔɔ akɛ amɛsusuɔ ohe. Kɛ́ amɛwooo bo mlai lɛ, ebaanyɛ etsɔɔ akɛ amɛsusuuu ohe. Anɔkwa, ebaanyɛ etsɔɔ hu akɛ amɛjeee fɔlɔi kpakpai?

ANI OLE? Fɔlɔi hu yɛ mlai ni esa akɛ amɛye nɔ! Kɛ́ oyiŋ etɛɛɛ bo yɛ he lɛ, kanemɔ 1 Mose 2:​24; 5 Mose 6:​6, 7; Efesobii 6:4; kɛ 1 Timoteo 5:8.

Kɛ́ oonu he lolo akɛ ofɔlɔi amlai lɛ yɛ kpɛŋŋ tsɔ hu?

Dani okɛ amɛ baagba he sane lɛ, susumɔ saji ni nyiɛ sɛɛ nɛɛ ahe. Ani ofɔlɔi le bo akɛ mɔ ko ni yeɔ mlai ni amɛwoɔ bo be fɛɛ be lɛ anɔ? Kɛ́ amɛle bo akɛ oyeee mlai ni amɛwoɔ bo lɛ anɔ lɛ, ekolɛ, jeee be ni sa akɛ obi amɛ ni amɛhã bo heyeli nɛ. Moŋ lɛ, kanemɔ sane ni ji, “Mɛni Mafee Koni Mifɔlɔi Ahe Mi Amɛye?”

Kɛ́ oyeɔ mlai ni ofɔlɔi woɔ bo be fɛɛ be lɛ anɔ lɛ, no lɛ, susumɔ nɔ ni obaasumɔ ni oyakɛɛ amɛ lɛ he. Obaanyɛ otsɔ hiɛ oŋma nɔ ni obaasumɔ ni oyakɛɛ amɛ lɛ, ni no baaye abua bo koni ona kɛ́ jwɛŋmɔ yɛ mli akɛ oyana amɛ loo esaaa akɛ oyanaa amɛ. No sɛɛ lɛ, kɛɛmɔ ofɔlɔi lɛ ni amɛto be kɛ he ko ni hi ni baahã nyɛ fɛɛ nyɛhe ajɔ nyɛ kɛsusu sane lɛ he. No sɛɛ kɛ́ okɛ ofɔlɔi lɛ kpe lɛ, hã saji ni nyiɛ sɛɛ nɛɛ ahi ojwɛŋmɔ mli:

Jiemɔ bulɛ kpo. Biblia lɛ kɛɔ akɛ: “Wiemɔ ni dɔɔ mɔ lɛ, eteɔ mlifu shi.” (Abɛi 15:1) No hewɔ lɛ, hã ehi ojwɛŋmɔŋ akɛ: Kɛ́ okɛ ofɔlɔi lɛ taa saji anaa loo okɛɛ amɛ akɛ amɛyɛ kpɛŋŋ tsɔ lɛ, sanegbaa lɛ eyagbeŋ naa ekpakpa.

“Babaoo ni mijieɔ bulɛ kpo mitsɔɔ mifɔlɔi lɛ, babaoo ni amɛ hu amɛjieɔ bulɛ kpo amɛtsɔɔ mi ji no. Ewaaa akɛ wɔbaakpã gbee yɛ saji ahe, ejaakɛ mibuɔ amɛ ni amɛ hu amɛbuɔ mi.”​—Bianca, 19.

Bo amɛ toi. Biblia lɛ kɛɔ akɛ “esa akɛ mɔ fɛɛ mɔ he afee oya kɛ sane toiboo, ekaye ehe oyai kɛwie.” (Yakobo 1:​19) Kaimɔ akɛ, okɛ ofɔlɔi lɛ miigba sane, jeee akɛ oowie ootsɔɔ amɛ.

“Be ni wɔdaraa lɛ, ekolɛ wɔbaasusu akɛ wɔle fe wɔfɔlɔi lɛ, shi jeee nakai kwraa eji. Esa akɛ wɔbo gbɛtsɔɔmɔ kɛ ŋaawoo ni amɛkɛhãa wɔ lɛ toi.”​—Devan, 20.

Nu amɛ shishi. Bɔɔ mɔdɛŋ ni onu nɔ hewɔ ni ofɔlɔi lɛ feɔ nakai lɛ shishi. Biblia lɛ kɛɔ akɛ ‘nyɛtaoa nibii ni hi hã mɛi krokomɛi, shi jeee nibii ni hi hã nyɛ pɛ’​—yɛ sane nɛɛ mli lɛ, no ji nibii ni hi hã ofɔlɔi lɛ. Bɔɔ mɔdɛŋ ni okɛ sane nɛɛ atsu nii.​—Filipibii 2:4.

“Be ko ni eho lɛ, misusu akɛ mifɔlɔi lɛ sumɔɔɔ misane. Shi amrɔ nɛɛ, mina akɛ no mli lɛ, amɛmiibɔ mɔdɛŋ ni amɛtsɔmɔ fɔlɔi kpakpai tamɔ bɔ ni no mli lɛ, mi hu miibɔ mɔdɛŋ ni matsɔ onukpa ni nyɛɔ etsuɔ esɔ̃i ahe nii lɛ. Nɔ fɛɛ nɔ ni amɛfee lɛ tsɔɔ akɛ amɛsumɔɔ mi ni amɛsusuɔ mihe.”​—Joshua, 21.

Okɛ amɛ asusu nɔ ni baaye abua lɛ he. Ŋɔɔ lɛ akɛ ootao oya paati ko ni baabi ni okɛ ŋmɛlɛtswaa kome adraivi kɛya, shi ofɔlɔi kɛɛ okaya. Bi amɛ ni amɛtsɔɔ bo nɔ hewɔ ni amɛsumɔɔɔ ni oyaa lɛ​—ani gbɛ jekɛmɔ lɛ, loo henaabuamɔ lɛ hewɔ?

• Kɛ́ gbɛ jekɛmɔ lɛ ni lɛ, ani kɛ́ okɛɛ amɛ akɛ okɛ mɔ ko ni le draivin waa baafata ohe kɛya lɛ, ani amɛbaahã oya?

• Kɛ́ henaabuamɔ lɛ ni lɛ, ani amɛbaahã oya kɛji otsɔɔ amɛ mɔ ni baaba eko kɛ mɔ ni baakwɛ nɔ lɛ?

Kaimɔ ni ohã bulɛ ahi owiemɔ lɛ mli ni obo nɔ ni ofɔlɔi lɛ yɔɔ kɛɛmɔ lɛ toi. Hã ana yɛ owiemɔ kɛ onifeemɔ mli akɛ ‘okɛ woo hãa opapa kɛ omami.’ (Efesobii 6:​2, 3) Ani amɛbaatsake amɛjwɛŋmɔ? Amɛtsake amɛjwɛŋmɔ jio, amɛtsakeee amɛjwɛŋmɔ jio lɛ, ehe miihia ni ofee nɔ ni nyiɛ sɛɛ nɛɛ.

Jɛɛ bulɛ mli okpɛlɛ ofɔlɔi lɛ ayiŋkpɛɛ lɛ nɔ. Enɛ he hiaa waa, shi bei pii lɛ akuɔ hiɛ afɔ̃ɔ nɔ. Kɛ́ onine shɛɛɛ nɔ ni otaoɔ lɛ nɔ ni okɛ ofɔlɔi bɔi naataamɔ lɛ, no lɛ, ebaawa kɛhã bo be kroko kɛ́ okɛ amɛ miigba sane. Yɛ gbɛ kroko nɔ lɛ, kɛ́ ojɛ otsuiŋ okpɛlɛ amɛsusumɔ lɛ nɔ lɛ, be kroko kɛ́ obi amɛ ni amɛhã ofee nɔ ko loo amɛŋmɛ bo gbɛ ni oya he ko lɛ, amɛbaaŋmɛ bo gbɛ.