Bei komɛi lɛ, mɛi ni jáa Nyɔŋmɔ lɛ ateŋ mɛi komɛi biɔ amɛhe akɛ, “Ani sɛɛnamɔ yɛ he akɛ mafite mibe kɛ hewalɛ kɛhi shi yɛ Biblia mli shishitoo mlai lɛ anaa?” (Lala 73:2, 3) Amɛkaa nibii ni teɔ shi ewoɔ Yehowa mlai lɛ amɛkwɛɔ, ni amɛbɔɔ mɔdɛŋ akɛ amɛkɛ amɛjeŋba gbonyo lɛ baatee Yehowa jalɔi krokomɛi.

 Aŋma sane nɛɛ koni akɛye abua mɛi ni hiɛ hiɛi enyɔ, shi amɛmiitao amɛkpa nakai su lɛ.

Nɔ ni abaasusu he yɛ sane nɛɛ mli

•  Kɛ́ akɛɛ mɔ ko hiɛ hiɛi enyɔ lɛ, te atsɔɔ tɛŋŋ?

•  Kɛ́ mihiɛ hiɛi enyɔ lɛ, ani etsɔɔ akɛ gbɔmɔ gbonyo ji mi?

•  Mɛni baaye abua mi koni mikahiɛ hiɛi enyɔ?

•  Nɔ ni otipɛŋfoi kɛɔ

 Etsɔɔ akɛ, kɛ́ eyɛ mɛi ni kɛ Yehowa gbɛtsɔɔmɔi tsuuu nii lɛ amasɛi lɛ, efeɔ nibii ni ele akɛ ehiii; shi kɛ́ eyɛ mɛi ni kɛ Yehowa gbɛtsɔɔmɔi tsuɔ nii amasɛi lɛ, efeɔ nibii ni hãa anaa akɛ ejáa Yehowa. Etamɔ nɔ ni eyɛ shihilɛi enyɔ amli ni fɛɛ miibi ni ebu mask.

 “Kɛ́ ohiɛ hiɛi enyɔ lɛ, okɛ nɔ ko miitee mɛi, no hewɔ lɛ, mɔ ko mɔ ko nyɛɛɛ ale mɔ ni oji diɛŋtsɛ. Yɛ anɔkwale mli lɛ, kɛ́ ohiɛ hiɛi enyɔ lɛ, etsɔɔ akɛ oyeee mɔ ko mɔ ko anɔkwa.”​—Erin.

 Ani ole? Kɛ́ ohiɛ hiɛi enyɔ lɛ, etsɔɔ akɛ oofee nɔ ko ni ole akɛ Yehowa sumɔɔɔ yɛ teemɔ mli.

 “Be ni miye afii 14 lɛ, mibɔi mfonirii kɛ vidioi ni esaaa akwɛmɔ yɛ Intanɛt lɛ nɔ. Kɛ́ miyɛ mɛi ateŋ lɛ, mifeɔ tamɔ nɔ ni minyɛɔ ponografi, shi yɛ mitsui mli lɛ, mile akɛ misumɔɔ.”​—Nolan.

 Biblia mli shishitoo mla: “Mɔ ko nyɛŋ etsɔ nyɔŋ ehã nuŋtsɔmɛi enyɔ; ejaakɛ no lɛ, ebaanyɛ mɔ kome ni ebaasumɔ mɔ kroko lɛ, loo ebaakpɛtɛ mɔ kome he ni ebuŋ mɔ kroko lɛ ehãŋ nɔ ko.”​—Mateo 6:24.

 Jeee doo. Kɛ̃lɛ, mɛi komɛi ekpɛ amɛyiŋ akɛ, amɛhiŋ shi yɛ Biblia mli shishitoo mlai anaa. Shi ani nakai gbɔmɔ oji? Aloo ekolɛ, yiŋtoi komɛi ahewɔ ohiɔ shi nakai lɛ, yiŋtoi komɛi tamɔ:

•   Ooshe gbeyei akɛ onanemɛi lɛ baana akɛ esoro bo.

•   Onuɔ he akɛ onanemɛi ni okɛyaa skul lɛ kɛ bo fɛɛ sumɔɔ nɔ kome fe mɛi ni okɛyɔɔ asafo lɛ mli lɛ.

•   Onuɔ he akɛ obɛ nyɛmɔ kɛ hewalɛ ni okɛbaahi shi yɛ Nyɔŋmɔ kitãi lɛ anaa.

 “Misusuɔ akɛ oblahii kɛ oblayei ni hiɛɔ hiɛi enyɔ lɛ nuɔ he akɛ amɛhe ejɔ amɛ, ejaakɛ, amɛsumɔɔ ni amɛfata mɛi komɛi ahe ni ekɔɔɔ he eko mɛi ni amɛ ji.”​—David.

 Eji anɔkwale akɛ, enɛɛmɛi etsɔɔɔ doo akɛ esa akɛ ohiɛ hiɛi enyɔ. Moŋ lɛ, ehãa wɔnaa akɛ gbɔmɛi kpakpai baanyɛ ahi shi akɛ mɛi ni hiɛ hiɛi enyɔ. Kɛ́ okɛ shihilɛ tamɔ nakai ekpe pɛŋ lɛ, mɛni obaanyɛ ofee?

1.  1. Susumɔ bɔ ni ohiɔ shi ohãa bianɛ lɛ he. Bi ohe akɛ: ‘Ani nɛkɛ gbɔmɔ miisumɔ ni matsɔ? Kɛ́ hetoo lɛ ji dabi lɛ, mɛni baajɛ bɔ ni mihiɔ shi mihãa lɛ mli kɛba?’

    Biblia mli shishitoo mla: “Hiɛtɛ̃lɔ naa oshãra lɛ . . . , shi mɔ ni jwɛŋmɔ esako lɛ, ebɛŋkɛɔ he, ni enaa amane.”​—Abɛi 27:12.

2.  2. Ye anɔkwa. Okɛ ofɔlɔi loo mɔ ko ni eda ni ehiɔ shi yɛ Yehowa mlai anaa lɛ asusu oshihilɛ lɛ he. Ekã shi faŋŋ akɛ, ebaaŋɔɔ amɛnaa akɛ obabi amɛ kɛhã yelikɛbuamɔ. Ni amɛmii baashɛ amɛhe akɛni amɛmiina akɛ osumɔɔ ni ofee nɔ ni ja lɛ hewɔ!

    “Ewa kɛhã mi akɛ makpɛlɛ mitɔ̃mɔi anɔ yɛ mɛi ahiɛ, shi kɛ́ mifee lɛ, mihe jɔɔ mi diɛŋtsɛ.”​—Nolan.

    Biblia mli shishitoo mla: “Mɔ ni tsimɔɔ etɔmɔi anɔ lɛ, eyeŋ omanye, shi mɔ ni jajeɔ ni etsiɔ ehe kɛjeɔ he lɛ, abaana lɛ mɔbɔ.”​—Abɛi 28:13.

3.  3. Kpɛlɛmɔ nɔ ni baajɛ mli aba lɛ nɔ. Kaimɔ akɛ, kɛ́ okɛ nɔ ko etee ofɔlɔi kɛ asafo lɛ, ohã ewa kɛhã amɛ akɛ amɛbaahe bo amɛye. Enɛ baahã ofɔlɔi loo asafoŋ onukpai lɛ kɛ naatsii komɛi ashwie onɔ. Kpɛlɛmɔ nɔ ni otswa ofai shi akɛ, obaaye “anɔkwa yɛ nibii fɛɛ” mli agbɛnɛ.​—Hebribii 13:18.

    Biblia mli shishitoo mla: “Bo ŋaawoo toi, ni okpɛlɛ tsɔsemɔ, koni wɔsɛɛ lɛ ohiɛ akã shi.”​—Abɛi 19:20.

4.  4. Ná nɔmimaa ni mli wa akɛ Nyɔŋmɔ sumɔɔ bo. Akɛni Yehowa sumɔɔ bo hewɔ lɛ, ele nibii fɛɛ ni ofeɔ yɛ shihilɛ mli lɛ jogbaŋŋ diɛŋtsɛ. No hewɔ lɛ, kɛ́ ohiɛ hiɛi enyɔ lɛ ele ni edɔɔ lɛ waa. Kɛ̃lɛ, akɛni ‘ejwɛŋɔ ohe’ hewɔ lɛ, efee klalo akɛ ebaaye ebua bo ni ojaje ogbɛi.​—1 Petro 5:7.

    Biblia mli shishitoo mla: “Yehowa hiŋmɛii kpaa shi yɛ shikpɔŋ lɛ nɔ fɛɛ, koni ekɛ ehewalɛ lɛ aye abua mɛi ni kɛ amɛtsui fɛɛ ehã lɛ lɛ.”​—2 Kronika 16:9.