Mɛni Biblia Lɛ Kɛɔ Yɛ Nuu Kɛ Yoo Ni Hiɔ Shi Tamɔ Wu Kɛ Ŋa Shi Amɛboteko Gbalashihilɛ Mli Lɛ He?
Hetoo ni Biblia lɛ kɛhãa
Biblia lɛ kɛɔ akɛ eji Nyɔŋmɔ suɔmɔnaa nii akɛ ‘wɔtsi wɔhe kɛje ajwamaŋbɔɔ he.’ (1 Tesalonikabii 4:3) Wiemɔ ni ji “ajwamaŋbɔɔ” ni akɛtsu nii yɛ Biblia lɛ mli lɛ kɔɔ gbalafitemɔ, nuu kɛ nuu loo yoo kɛ yoo ni kɛ amɛhe náa bɔlɛ, kɛ bɔlɛnamɔ ni yaa nɔ yɛ nuu kɛ yoo ni boteko gbalashihilɛ mli teŋ lɛ ahe.
Ani Nyɔŋmɔ miisumɔ ni nuu kɛ yoo ahi shi tamɔ wu kɛ ŋa dani amɛbote gbalashihilɛ mli?
Nyɔŋmɔ ji mɔ ni to gbalashihilɛ lɛ shishi. Eto shishi be ni ebɔ klɛŋklɛŋ adesai enyɔ lɛ. (1 Mose 2:22-24) Ebɔɔɔ nuu kɛ yoo koni amɛhi shi tamɔ wu kɛ ŋa dani amɛbote gbalashihilɛ mli.
Nyɔŋmɔ le nɔ ni hi hã adesai. Eto gbalashihilɛ he gbɛjianɔ koni efee nuu kɛ yoo ekome ni amɛkagbala mli kɔkɔɔkɔ, koni weku lɛ mli bii fɛɛ aná he sɛɛ ni ebu amɛhe. Naa nɔkwɛmɔnɔ ko. Bɔ ni okpɔlɔ loo sɛi ko ni kapinta ko efee lɛ he manual baanyɛ aye abua wɔ ni wɔnyɛ wɔtsara lɛ jogbaŋŋ lɛ, nakai nɔŋŋ Nyɔŋmɔ gbɛtsɔɔmɔi lɛ baanyɛ aye abua wɔ ni wɔye omanye yɛ wɔgbalashihilɛ mli. Mɛi ni kɛ Nyɔŋmɔ gbɛtsɔɔmɔi kɛ emlai tsuɔ nii lɛ náa he sɛɛ be fɛɛ be.—Yesaia 48:17, 18.
Okpɔlɔ loo sɛi ni kapinta ko efee lɛ he manual baanyɛ aye abua bo ni onyɛ otsara lɛ jogbaŋŋ. Nakai nɔŋŋ Nyɔŋmɔ gbɛtsɔɔmɔi lɛ baanyɛ aye abua wɔ ni wɔye omanye yɛ wɔgbalashihilɛ mli
Kɛ́ mɛi ná bɔlɛ dani amɛbote gbalashihilɛ mli lɛ, amɛbaanyɛ amɛná naagbai ni yɔɔ hiɛdɔɔ. Akɛ nɔkwɛmɔnɔ lɛ, abaanyɛ aŋɔ hɔ be ni asako he, abaanyɛ aná bɔlɛnamɔ mli helai, kɛ naagbai krokomɛi. a
Nyɔŋmɔ bɔ nuu kɛ yoo ni amɛtsɔ bɔlɛnámɔ nɔ amɛfɔ. Wala yɛ krɔŋkrɔŋ kɛhã Nyɔŋmɔ, ni nyɛmɔ ni wɔkɛfɔɔ lɛ hu ji nikeenii ni ekɛdro wɔ. Nyɔŋmɔ miisumɔ ni wɔkɛ nikeenii nɛɛ atsu nii yɛ bulɛ mli kɛwo gbalashihilɛ ni eto he gbɛjianɔ lɛ hiɛ nyam.—Hebribii 13:4.
Ani naagba yɛ he akɛ nuu kɛ yoo baahi shi tamɔ wu kɛ ŋa kɛkwɛ akɛ amɛbaanyɛ amɛhi shi lo dani amɛbote gbalashihilɛ mli?
Kɛ́ nyɛmiitao nyɛgbalashihilɛ lɛ aye omanye lɛ, ehe ehiaaa ni nyɛhi shi tamɔ wu kɛ ŋa kɛyashi be ko dani nyɛbote gbalashihilɛ mli. Moŋ lɛ, nɔ ni hãa gbalashihilɛ yeɔ omanye ji kɛ́ nuu lɛ kɛ yoo lɛ sumɔɔ amɛhe jogbaŋŋ ni amɛfeɔ ekome kɛtsuɔ amɛnaagbai ahe nii. Gbalashihilɛ wajeɔ ekomefeemɔ ni yɔɔ nuu lɛ kɛ yoo lɛ teŋ lɛ.—Mateo 19:6.
Mɛni baahã wu kɛ ŋa aná miishɛɛ yɛ gbalashihilɛ mli?
Gbalashihilɛ ko kwraa bɛ ni naagba bɛ mli. Kɛ̃lɛ, kɛ́ gbalashihilɛ mli bii kɛ Biblia mli ŋaawoi tsu nii lɛ, amɛbaaye omanye. Naa Biblia mli ŋaawoi lɛ ekomɛi:
Okɛ ohefatalɔ lɛ hiamɔ nii aye onɔ hiɛ.—1 Korintobii 7:3-5; Filipibii 2:3, 4.
Nyɛjiea suɔmɔ kɛ bulɛ kpo nyɛtsɔa nyɛhe be fɛɛ be.—Efesobii 5:25, 33.
Susumɔ nii ahe jogbaŋŋ dani owie.—Abɛi 12:18.
Nyɛnáa tsui nyɛhãa nyɛhe, ni nyɛkɛ tɔmɔi akea nyɛhe oya.—Kolosebii 3:13, 14.
a Kwɛmɔ saneyitso ni ji, “Saji Ni Oblahii Kɛ Oblayei Biɔ . . . Ni Kɛ́ Aanyɛ Minɔ Koni Maná Bɔlɛ Hu?”
Ekolɛ Obaasumɔ Enɛ Hu
SANEBIMƆI NI BIBLIA LƐ EHÃ HETOO
Mɛni Biblia Lɛ Kɛɔ Yɛ Gbalashihilɛ He?
Biblia mli shishitoo mlai baanyɛ aye abua wu kɛ ŋa koni amɛhi shi bɔ ni naagbai baŋ amɛteŋ loo amɛtsu amɛnaagbai ahe nii.
SANEBIMƆI NI BIBLIA LƐ EHÃ HETOO
Ani Biblia Lɛ Baanyɛ Awa Mi Ni Maná Weku Ni Miishɛɛ Yɔɔ Mli?
Biblia mli ŋaawoi ni nilee yɔɔ mli lɛ eye ebua hii kɛ yei akpekpei abɔ ni amɛná wekui ni miishɛɛ yɔɔ mli.
