Namɔ esa akɛ etsɔɔ gbekɛbii bɔlɛnamɔ he saji? Biblia lɛ kɛ sɔ̃ nɛɛ fɔ̃ɔ fɔlɔi anɔ, ni fɔlɔi pii ena akɛ, ŋaawoi ni nyiɛ sɛɛ nɛɛ yeɔ ebuaa amɛ:

•   Kaahã efee bo hiɛgbele. Biblia lɛ wieɔ bɔlɛnamɔ kɛ fɔmɔ nii ahe yɛ faŋŋ mli, ni Nyɔŋmɔ kɛɛ Israelbii lɛ akɛ, amɛtsɔɔ “gbekɛbii” lɛ enɛɛmɛi ahe nii. (5 Mose 31:12; 3 Mose 15:2, 16-19) Okɛ wiemɔi ni bulɛ yɔɔ he atsu nii, jeee wiemɔi ni baahã ana bɔlɛnamɔ loo fɔmɔ nii lɛ akɛ nibii ni yɔɔ hiɛgbele.

•   Yaa nɔ okɛ obi lɛ awie he fiofio. Nɔ najiaŋ ni okɛ obi lɛ baawie nɔ fɛɛ nɔ ni kɔɔ bɔlɛnamɔ he shi kome yɛ eblahiiaŋ loo eblayeiaŋ lɛ, bɔɔ mɔdɛŋ akɛ okɛ lɛ baafɔ bɔlɛnamɔ he wiemɔ yɛ be kɛ beiaŋ yɛ afii abɔ ni eye lɛ naa.​—1 Korintobii 13:11.

•   Tsɔɔmɔ lɛ jeŋba he mlai. Ekolɛ, abaatsɔɔ gbekɛbii lɛ bɔlɛnamɔ he saji komɛi yɛ skul. Kɛ̃lɛ, jeee bɔlɛnamɔ he saji pɛ Biblia lɛ woɔ fɔlɔi hewalɛ ni amɛtsɔɔ amɛbii, ewoɔ fɔlɔi hewalɛ ni amɛtsɔɔ amɛbii bɔ ni amɛbaafee amɛná jwɛŋmɔ ni ja kɛ bɔ ni esa akɛ amɛfee amɛnii amɛhã yɛ bɔlɛnamɔ he hu.​—Abɛi 5:1-23.

•   Bo obi lɛ toi. Kɛ́ obi lɛ bi bo saji ni kɔɔ bɔlɛnamɔ he lɛ, omli akafũ loo kaaa mu sane naa oya. Moŋ lɛ, feemɔ ‘oya kɛ sane toiboo, kaaye ohe oyai kɛwie.’​—Yakobo 1:19.

Bɔ ni obaafee obu gbekɛbii lɛ ahe kɛjɛ bɔlɛnamɔ mli niseniianiifeelɔi ahe

•   Kasemɔ niseniianiifeelɔi ahe nii. Bɔɔ mɔdɛŋ ni ole gbɛ ni mɛi ni fɔɔ gbekɛbii niseniianii feemɔ lɛ tsɔɔ nɔ amɛlakaa gbekɛbii lɛ.​—Abɛi 18:15; kwɛmɔ wolo ni ji Questions Young People Ask​—Answers That Work, Kpo 1, yitso 32 lɛ.

•   Hã ohiɛ ahi obi lɛ he. Dani obaahã mɔ ko akwɛ obi lɛ nɔ lɛ, bɔɔ mɔdɛŋ ni oná nɔmimaa akɛ mɔ lɛ ji mɔ ko ni obaanyɛ omu ofɔ̃ enɔ lo, ni ‘kaakpoo obi lɛ jeŋ ohã lɛ.’—Abɛi 29:15, Ga Biblia momo.

•   Ye obua obi lɛ ni ená jwɛŋmɔ ni ja yɛ toiboo he. Esa akɛ bii ale akɛ esa akɛ amɛbo amɛfɔlɔi atoi. (Kolosebii 3:20) Kɛ̃lɛ, kɛ́ otsɔɔ obi lɛ akɛ be fɛɛ be loo yɛ nɔ fɛɛ nɔ mli lɛ ebo onukpa fɛɛ onukpa toi lɛ, ewaŋ akɛ abaanyɛ afee lɛ niseniianii. Fɔlɔi ni ji Kristofoi lɛ baanyɛ amɛkɛɛ amɛbii akɛ, “Kɛ́ mɔ ko kɛɛ bo akɛ ofee nɔ ko ni Nyɔŋmɔ kɛɛ ejaaa loo ehiii lɛ, kaafee.”​—Bɔfoi 5:29.

•   Nyɛkɛ nyɛbii lɛ afea ekome kɛsusua nibii ni baabu amɛhe lɛ ahe. Ye obua obi lɛ koni ele nɔ ni esa akɛ efee kɛ́ mɔ ko ka akɛ ebaafee lɛ niseniianii be ni obɛ emasɛi. Kɛ́ nyɛfee shihilɛ nɛɛ he nɔkwɛmɔnii kukuji yɛ be kɛ beiaŋ lɛ, ebaahã obi lɛ aná ekãa kɛkɛɛ akɛ “Kpá nɔ ni ofeɔ lɛ! Mayakɛɛ!” ni ebaashi jɛmɛ oya. Akɛni ewaaa akɛ obii lɛ ahiɛ baanyɛ akpa nɔ hewɔ lɛ, ehe baahia “ní otĩ mli shii abɔ otsɔɔ obii” lɛ.​—5 Mose 6:7.