Hɛɛ, ejaakɛ Nyɔŋmɔ miisumɔ ni mɛi akpe kutuu kɛjá lɛ. Biblia kɛɔ akɛ: “Ni nyɛhãa wɔteŋ mɔ fɛɛ mɔ asusua enyɛmi he bɔ ni afee ni wɔkanyakanyaa wɔhe koni wɔjie suɔmɔ kpo ní wɔtsu nitsumɔi kpakpai, ni wɔkakwa kpe ni wɔkpeɔ kutuu lɛ.”—Hebribii 10:24, 25, shishigbɛ niŋmaa.

 Yesu tsɔɔ akɛ abaato esɛɛnyiɛlɔi lɛ ahe gbɛjianɔ, ekɛɛ amɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛbaale akɛ mikaselɔi ji nyɛ.” (Yohane 13:35) Gbɛ titri ni Kristo kaselɔi lɛ baatsɔ nɔ amɛjie suɔmɔ nɛɛ kpo ji, ni amɛkɛ amɛnyɛmimɛi Kristofoi baabɔ. Abaato amɛhe gbɛjianɔ awo asafoi amli ni amɛbaakpe daa kɛjá Nyɔŋmɔ. (1 Korintobii 16:19) Akɛ kuu lɛ, amɛbaafee ekome akɛ nyɛmimɛi yɛ jeŋ fɛɛ.—1 Petro 2:17.

Jeee jamɔ ko ni okɛ ohe baayadɔmɔ lɛ kɛkɛ ji sane lɛ

 Eyɛ mli akɛ Biblia lɛ tsɔɔ akɛ esa akɛ akpe kutuu kɛjá Nyɔŋmɔ moŋ, shi etsɔɔɔ akɛ jamɔ ko kɛkɛ ni mɔ ko kɛ ehe baadɔmɔ lɛ baahã esa Nyɔŋmɔ hiɛ. Kɛ́ Nyɔŋmɔ baakpɛlɛ mɔ ko nɔ lɛ, esa akɛ mɔ lɛ jamɔ aná edaa gbi shihilɛ nɔ hewalɛ kpakpa. Ákɛ nɔkwɛmɔnɔ lɛ, Biblia lɛ kɛɔ akɛ: “Jamɔ ni he tse ní abuleko yɛ wɔ-Nyɔŋmɔ kɛ wɔ-Tsɛ lɛ hiɛ ji enɛ: akɛ mɔ akwɛ awusãi kɛ yei okulafoi yɛ amɛmanehulu lɛ mli, ní ekwɛ ehe nɔ jogbaŋŋ ní je lɛ akawo ehe muji.”—Yakobo 1:27.