Nyɔŋmɔ Maŋtsɛyeli lɛ baaye adesai anɔyelii fɛɛ najiaŋ, ni ebaaye shikpɔŋ muu lɛ fɛɛ nɔ. (Daniel 2:44; Kpojiemɔ 16:14) Kɛ́ eba lɛ nakai nɔŋŋ lɛ, Nyɔŋmɔ Maŋtsɛyeli lɛ baafee nibii ni nyiɛ sɛɛ nɛɛ:

•   Ebaajie mɛi fɔji ni amɛhiɛjoomɔ nifeemɔi yeɔ wɔ fɛɛ awui lɛ yɛ shihilɛ mli. ‘Aaafolɔ yiwalɔi lɛ kɛaajɛ shikpɔŋ lɛ nɔ ashwie.’—Abɛi 2:22.

•   Ebaafo tai asɛɛ. ‘Nyɔŋmɔ hãa tai asɛɛ foɔ kɛyaa shikpɔŋ lɛ naagbeehei lɛ.’—Lala 46:10.

•   Ekɛ shweremɔ kɛ shweshweeshwe shihilɛ baaba shikpɔŋ lɛ nɔ. “Mɔ fɛɛ mɔ aaata eweintso kɛ egbamitso shishi, ni mɔ ko woŋ amɛhe gbeyei.”—Mika 4:4.

•   Ebaahã shikpɔŋ lɛ atsɔ paradeiso. “Shiaŋa lɛ kɛ shikpɔŋ gbiŋ lɛ aaanya, shiaŋa lɛ mii aaashɛ ehe ni eeegba afofro tamɔ fɔfɔi.”—Yesaia 35:1, Ga Biblia hee.

•   Ebaahã mɔ fɛɛ mɔ aná nitsumɔ kpakpa ni hãa mɔ tsui nyɔɔ emli atsu. Nyɔŋmɔ halamɔbii lɛ “aaaye amɛnine naa nitsumɔ lɛ mli nii aahu po. Amɛgboŋ deŋme yakatswaa.”—Yesaia 65:21-23.

•   Ebaajie hela kɛje shihilɛ mli. “Maŋbii lɛ ateŋ mɔ ko ekɛŋ akɛ: Mihe miiye” loo mibɛ hewalɛ.—Yesaia 33:24, Ga Biblia hee.

•   Ebaahã wɔye wɔhe kwraa yɛ gbɔlɛ he. “No lɛ eheloo lɛ aaatsɔ efɔ́ fe gbekɛ nɔ; eeeku sɛɛ eeetsɔ oblanyo ekoŋŋ.”—Hiob 33:25.

•   Ebaatee gbohii lɛ ashi kɛba wala mli ekoŋŋ. “Mɛi fɛɛ ni yɔɔ gbohiiabui lɛ amli lɛ aaanu [Yesu] egbee, ni amɛaaje kpo.”—Yohane 5:28, 29.