Biblia lɛ kɛ gbɛtsɔɔmɔ ni nɔ bɛ ni baahã wɔkpɛ yiŋ kpakpai hãa wɔ. Enɛ baanyɛ aye abua wɔ ni wɔtao “hiɛshikamɔ [kɛ] niiashishinumɔ.” (Abɛi 4:5) Yɛ shihilɛi komɛi amli lɛ, ehãa wɔleɔ yiŋ kpakpa ni wɔbaanyɛ wɔkpɛ. Yɛ shihilɛi krokomɛi hu amli lɛ, ekɛ ŋaawoo ni baahã wɔkpɛ yiŋ ni nilee yɔɔ mli hãa wɔ.

Nɔ ni wɔbaasusu he yɛ sane nɛɛ mli

•  Nibii ni baaye abua bo ni okpɛ yiŋ kpakpa

•  Ani esa akɛ matsake yiŋ ko ni mikpɛ momo?

•  Ni kɛ́ mikpɛ yiŋ gbonyo ko ni minyɛŋ matsake hu?

•   Ohe akatswa shi kɛkpɛ yiŋ ko ni he hiaa waa. Biblia lɛ kɛɛ: “Hiɛtɛ̃lɔ kwɛɔ enajifaamɔi jogbaŋŋ.” (Abɛi 14:15) Kɛ́ ohe tswa shi kɛkpɛ yiŋ ko ni he hiaa waa lɛ, ekolɛ ojwɛŋmɔ eyaŋ saji ni he hiaa lɛ anɔ. Hemɔ be kɛsusu nibii ni otaoɔ okpɛ oyiŋ yɛ he lɛ ahe.​—1 Tesalonikabii 5:21.

•   Kaadamɔ bɔ ni onuɔ he ohãa lɛ pɛ nɔ okpɛ yiŋ. Biblia lɛ bɔɔ wɔ kɔkɔ akɛ, wɔnyɛŋ wɔkɛ wɔhiɛ afɔ̃ wɔtsui nɔ be fɛɛ be. (Abɛi 28:26; Yeremia 17:9) Akɛ nɔkwɛmɔnɔ lɛ, kɛ́ wɔmli efu, wɔhao waa, wɔnijiaŋ eje wui, wɔnyɛɛɛ wɔto wɔtsui shi, loo etɔ wɔ fe nine lɛ, wɔnyɛŋ wɔkpɛ yiŋ kpakpai.​—Abɛi 24:10; 29:22.

•   Sɔlemɔ kɛbi hiɛshikamɔ. (Yakobo 1:5) Nyɔŋmɔ yɛ he miishɛɛ akɛ ebaahã sɔlemɔi tamɔ nɛkɛ ahetoo. Eji Tsɛ ni susuɔ ebii ahe, ni esumɔɔɔ ni amɛkɛ naagbai kpeɔ. “Yehowa ji mɔ ni hãa mɔ hiɛ kãa shi; Lɛ edaaŋ wiemɔ hãa mɔ nilee kɛ sanesɛɛkɔmɔ.”  a (Abɛi 2:6) Gbɛ titri ni etsɔɔ nɔ ekɛ hiɛshikamɔ nɛɛ hãa ji, kɛtsɔ e-Wiemɔ ni aŋma ni ji Biblia lɛ nɔ.​—2 Timoteo 3:16, 17.

•   Taomɔ nii amli. Dani obaanyɛ okpɛ yiŋ ni ja lɛ, esa akɛ oná sane ni anyɛɔ amuɔ afɔ̃ɔ nɔ. Biblia lɛ kɛɛ, “hiɛshikalɔ boɔ toi, ni no hãa ekaseɔ nii kɛfataa enilee he.” (Abɛi 1:5) Nɛgbɛ obaanyɛ oná sane ni ja ni obaanyɛ omu ofɔ̃ nɔ yɛ?

   Klɛŋklɛŋ lɛ, taomɔ nɔ ni Biblia lɛ diɛŋtsɛ wieɔ yɛ sane ni otaoɔ okpɛ oyiŋ yɛ he lɛ he. Akɛni wɔ-Bɔlɔ lɛ le nɔ hi fe fɛɛ kɛhã wɔ hewɔ lɛ, e-Wiemɔ lɛ mli eyi obɔ kɛ ŋaawoo ni nɔ bɛ ni wɔbaanyɛ wɔmu wɔfɔ̃ nɔ. (Lala 25:12) Yiŋ komɛi yɛ ni kɛ́ wɔbaakpɛ lɛ, Biblia lɛ etsɔ hiɛ ekɛ gbɛtsɔɔmɔi ni yɔɔ faŋŋ ehã yɛ he, ekolɛ kɛtsɔ mlai loo famɔi anɔ. (Yesaia 48:17, 18) Shi saji krokomɛi yɛ ni Biblia lɛ woko mlai pɔtɛɛ yɛ he. Moŋ lɛ, ekɛ shishitoo mlai hãa wɔ koni no akudɔ wɔ. Enɛɛmɛi hãa wɔnyɛɔ wɔkpɛɔ yiŋ ni ja, kɛ́ yiŋ ni wɔkpɛɔ lɛ yɛ srɔto yɛ mɔ kroko nɔ he po. Kɛ́ ootao ona Biblia mli sane ko ni kɔɔ yiŋ ni ootao okpɛ lɛ he lɛ, taomɔ nii amli yɛ saji loo woji ni adamɔ Biblia lɛ nɔ aŋmala lɛ amli, ekomɛi ji saji kɛ woji ni ahɔ̃ɔɔ, ni yɔɔ wɔwɛbsaiti b nɛɛ nɔ lɛ.

   Yɛ nibii komɛi agbɛfaŋ lɛ, kɛ́ obaakpɛ yiŋ lɛ, ehe miihia ni otao hei krokomɛi ni anáa saji ni anyɛɔ amuɔ afɔ̃ɔ nɔ yɛ. Akɛ nɔkwɛmɔnɔ lɛ, dani obaahe nɔ ko lɛ, titri lɛ, nɔ ko ni jara wa lɛ​—nilee yɛ mli akɛ obaatao ehe saji, mɛi ni fee, kɛ saji krokomɛi; eko ji, kɛ́ aleee nɔ ni nii lɛ fite lɛ, ani obaanyɛ okɛya koni atsake ahã bo loo asaa ahã bo? Agbɛnɛ hu, esa akɛ okwɛ akɛ nibii ni aŋmala yɛ nɔ ni otaoɔ ohe lɛ he lɛ, no ji nɔ ni otaoɔ lo.

   Biblia lɛ kɛɛ “kɛ́ ajinatoo bɛ lɛ, yiŋtoi feɔ efolo.” (Abɛi 15:22) Hewɔ lɛ dani obaakpɛ yiŋ ko lɛ, okɛ aŋkroaŋkroi komɛi ni anyɛɔ amuɔ afɔ̃ɔ amɛ nɔ lɛ asusu he. Akɛ nɔkwɛmɔnɔ lɛ, kɛ́ ookpɛ yiŋ yɛ helatsamɔ saji ahe lɛ, nilee yɛ mli akɛ okɛ datrɛfonyo ko baagba he sane dã. (Mateo 9:12) Yɛ shihilɛi komɛi amli lɛ, ehe baahia ni okɛ mɛi ni etsɔ shihilɛi ni tamɔ onɔ lɛ mli lɛ ateŋ mɔ ko agba sane. Kɛ̃lɛ hã ehi ojwɛŋmɔ mli akɛ, bo ji mɔ ni obaakpɛ yiŋ lɛ koni okpee nɔ ni baajɛ mli aba lɛ naa, shi jeee mɛi ni obiɔ amɛsusumɔ lɛ.​—Galatiabii 6:4, 5.

•   Susumɔ saji fɛɛ ni oná loo akɛɛ bo lɛ ahe jogbaŋŋ. Obaanyɛ odamɔ saji ni onine eshɛ nɔ lɛ anɔ oŋmala nibii ni obaanyɛ ohala amɛteŋ eko lɛ fɛɛ oshwie shi, ni oŋmala nɔ ni hi kɛ nɔ ni ehiii ni kɔɔ eko fɛɛ eko he lɛ hu oshwie shi. Ni okɛ anɔkwayeli asusu nibii ni baanyɛ ajɛ yiŋ ni obaakpɛ lɛ mli kɛba lɛ he. (5 Mose 32:29) Akɛ nɔkwɛmɔnɔ lɛ, te yiŋ ni obaakpɛ lɛ baasa bo, oweku lɛ, kɛ mɛi krokomɛi ahe ehã tɛŋŋ? (Abɛi 22:3; Romabii 14:19) Kɛ́ okɛ Biblia mli shishitoo mlai tsu nii kɛsusu sanebimɔi ahe lɛ, ebaaye ebua bo ni okpɛ yiŋ ni tsɔɔ akɛ ohiɛ kã shi ni oyɛ suɔmɔ.

•   Kpɛɛ yiŋ lɛ agbɛnɛ. Bei komɛi lɛ, wɔshashaoɔ shi akɛ wɔbaakpɛ yiŋ ko, akɛni ekolɛ wɔleee yiŋ tuuntu ni wɔtaoɔ wɔkpɛ lɛ hewɔ. Shi kɛ́ wɔtee nɔ wɔshashaoɔ shi ni wɔnyɛɛɛ wɔkpɛ yiŋ lɛ, nɔ ko kpakpa ko baanyɛ aŋmɛɛ wɔ, loo wɔbaayaje shihilɛ ko ni esaaa mli. Kɛ́ wɔɔwie he yɛ gbɛ kroko nɔ lɛ, kɛ́ mɔ ko nyɛɛɛ akpɛ eyiŋ lɛ, etamɔ mɔ ko ni ekpɛ yiŋ gbonyo nɔŋŋ. Biblia lɛ kɛ okwaayeli sane tsu nii kɛtsɔɔ akɛ: “Kɛ́ oomɛ ni oná kɔɔyɔɔ kɛ kɔɔyɔŋ tsakemɔ bɔ ni osumɔɔ lɛ, oduŋ nɔ ko ni okpaŋ nɔ ko hu.”​—Jajelɔ 11:4, Good News Translation.

 Kaimɔ hu akɛ, kɛ́ okpɛ yiŋ ni hi jogbaŋŋ po lɛ, ekolɛ no efeŋ yiŋ ni hi fe fɛɛ. Bei pii lɛ, nɔ ni obaahala lɛ baabi ni okɛ nɔ ko kɛ̃ ashã afɔle. Agbɛnɛ hu, nibii ni akpaaa gbɛ baanyɛ aba. (Jajelɔ 9:11) Hewɔ lɛ, okɛ saji ni otao lɛ ateŋ nɔ ni hi fe fɛɛ lɛ atsu nii, koni ohala yiŋ srɔtoi ni yɔɔ ni obaanyɛ okpɛ lɛ ateŋ nɔ ni oheɔ oyeɔ waa akɛ ebaaye omanye.

 Jeee yiŋ fɛɛ yiŋ ni kɛ́ okpɛ lɛ, onyɛŋ otsake. Oshihilɛ baanyɛ atsake loo ekolɛ obaayɔse akɛ, nɔ ko gbonyo baajɛ yiŋ ko ni okpɛ mra mli lɛ mli aba. Enɛ hewɔ lɛ, nilee yɛ mli akɛ obaasusu shihilɛ lɛ he ekoŋŋ ni okpɛ yiŋ kroko ni oheɔ oyeɔ akɛ ebaahã onine ashɛ nɔ ni otaoɔ lɛ nɔ.

 Shi kɛ̃lɛ, yiŋ komɛi yɛ ni esaaa akɛ atsakeɔ. (Lala 15:4) Akɛ nɔkwɛmɔnɔ lɛ, Nyɔŋmɔ miikpa gbɛ akɛ gbalashihilɛ mli hefatalɔi baaye amɛgbalashihilɛ he kitãkamɔ c lɛ nɔ. (Maleaki 2:16; Mateo 19:6) Kɛ́ naagbai ba gbalashihilɛ lɛ mli lɛ, esa akɛ abɔ mɔdɛŋ fɛɛ ni abaanyɛ kɛtsu naagba lɛ he nii, ni akatse gbãla lɛ.

 Wɔ fɛɛ lɛ, be shɛɔ ni wɔkpɛɔ yiŋ gbonyo loo yiŋ ko ni nilee bɛ mli. (Yakobo 3:2, shishigbɛ niŋmaa) Ekolɛ wɔbaanu fɔyeli he loo wɔbaashwa wɔhe po, ni naagba bɛ he. (Lala 69:5) Anɔkwa, kɛ́ bei komɛi lɛ wɔnáa henumɔi nɛɛ, ebaanyɛ eye ebua wɔ koni wɔkatɔ̃ nakai tɔmɔ lɛ dɔŋŋ! (Abɛi 14:9) Kɛ̃lɛ, Biblia lɛ woɔ wɔ ŋaa ni wɔkahã wɔhe nilee yi wɔ fe nine, ejaakɛ ebaahã wɔnijiaŋ aje wui ni wɔkajwɛŋ jogbaŋŋ. (2 Korintobii 2:7) d Biblia lɛ kɛɛ “Yehowa lɛ, mɔbɔnalɔ kɛ musuŋtsɔlɔ ji lɛ.” (Lala 103:8-13) No hewɔ lɛ, bɔɔ mɔdɛŋ ni okase nii kɛjɛ yiŋ gbonyo ko ni okpɛ ni onyɛɛɛ otsake lɛ mli, ni obɔ mɔdɛŋ ni ofee nibii ni baahã shihilɛ lɛ ahi fioo.