•  Nɔ ni esa akɛ ole

•  Nɔ ni obaanyɛ ofee

•  Nɔ ni fɔlɔi kɛɔ

 Ŋmɛnɛ lɛ, yɛ maji komɛi anɔ lɛ, wekukpaa ni yɔɔ fɔlɔi kɛ amɛbii ateŋ lɛ mli wa waa, ni bii lɛ sumɔɔ ni amɛfɔlɔi atsɔɔ amɛ gbɛ. Yɛ maji krokomɛi anɔ lɛ, gbekɛbii biɔ ŋaawoo kɛjɛɔ amɛtipɛŋfoi adɛŋ.

 Kɛ́ gbekɛbii bi ŋaawoo kɛjɛ amɛtipɛŋfoi adɛŋ lɛ, etsɔɔ akɛ amɛbuuu gbɛtsɔɔmɔi ni amɛfɔlɔi kɛhãa amɛ lɛ. Anɔkwa, kɛ́ gbekɛbii nɛɛ tsɔmɔ oblahii loo oblayei lɛ, bei komɛi lɛ, amɛfɔlɔi nuɔ he akɛ amɛnyɛɛɛ amɛkudɔ amɛ dɔŋŋ. Ni enɛ bɛ naakpɛɛ! Ejaakɛ kɛ́ gbekɛbii kɛ gbekɛbii krokomɛi bɔ aahu ni amɛdara lɛ, efeɔ tamɔ nɔ ni amɛ diɛŋtsɛ amɛtsɔse amɛhe moŋ fe amɛfɔlɔi.

 Mɛni hewɔ ewaaa kɛhã gbekɛbii akɛ amɛkɛ amɛtipɛŋfoi baabɔ moŋ fe amɛfɔlɔi lɛ? Susumɔ yiŋtoi ni nyiɛ sɛɛ nɛɛ ahe okwɛ.

•   Skul. Kɛ́ gbekɛbii kɛ gbekɛbii krokomɛi bɔ waa lɛ, wekukpaa ni bakãa amɛ teŋ lɛ mli waa ni bei pii lɛ, amɛsumɔɔ ni amɛsa amɛtipɛŋfoi lɛ ahiɛ fe amɛfɔlɔi. Nɛkɛ subaŋ nɛɛ mli waa kɛ́ amɛtsɔmɔ oblahii loo oblayei.

•   Kɛ́ fɔlɔi náaa be pii amɛhãaa amɛbii. Yɛ wekui babaoo amli lɛ, be ni gbekɛbii lɛ baajɛ skul amɛba lɛ, amɛbanaaa mɔ ko, ekolɛ, fɔlɔ lɛ loo fɔlɔi lɛ etee nitsumɔ.

•   Bɔ ni oblahii kɛ oblayei hiɔ shi amɛhãa. Be ni gbekɛbii lɛ baatsɔmɔ oblahii kɛ oblayei aahu lɛ, no mli lɛ, oblahii kɛ oblayei krokomɛi ni amɛkɛbɔɔ lɛ asui, tamɔ amɛhesaamɔ, amɛwiemɔ, kɛ amɛnifeemɔi krokomɛi ená amɛnɔ hewalɛ. Bɔ ni amɛtipɛŋfoi lɛ naa amɛ amɛhãa lɛ he hiaa amɛ kwraa fe bɔ ni amɛfɔlɔi naa amɛ.

•   Jarayeli. Kɛ́ jarayelɔi miifee amɛnibii loo amɛmiito hiɛtserɛjiemɔi srɔtoi ahe gbɛjianɔ lɛ, mɛi titri ni amɛfeɔ amɛhãa ji oblahii kɛ oblayei, enɛ hewɔ lɛ, ewa akɛ gbeekpamɔ baaba fɔlɔi kɛ amɛbii ateŋ. Dr. Robert Epstein ni ekase bɔ ni adesai ajwɛŋmɔ lɛ tsuɔ nii ehãa lɛ he nii lɛ wie akɛ: “Kɛ́ bɔ ni oblahii kɛ oblayei hiɔ shi amɛhãa lɛ tsake lɛ, nitsumɔhei ni feɔ shika babaoo yɛ amɛhe nɛɛ pii baagu.” a

•   Hã wekukpaa ni mli wa ahi okɛ obi lɛ teŋ.

   Biblia lɛ kɛɛ akɛ: “Hã wiemɔi ni mijajeɔ mitsɔɔ bo ŋmɛnɛ lɛ akã otsui nɔ, ní otĩ mli shii abɔ otsɔɔ obii, ní owie he be ni ota shi yɛ oshĩa kɛ be ni onyiɛ gbɛ nɔ kɛ be ni okã shi kɛ be ni ote shi.”​—5 Mose 6:6, 7.

   Obii lɛ baanyɛ amɛkɛ amɛtipɛŋfoi lɛ abɔ naanyo shi amɛtipɛŋfoi lɛ nyɛŋ amɛkɛ gbɛtsɔɔmɔi ni esa akɛ okɛhã amɛ lɛ ahã amɛ. Shi miishɛɛ sane ko yɛ: Nilelɔi ewie akɛ gbekɛbii kɛ oblahii kɛ oblayei babaoo buɔ amɛfɔlɔi, ni amɛmiisumɔ ni amɛsa amɛfɔlɔi ahiɛ. Kɛ́ ohã wekukpaa kpakpa hi okɛ obii lɛ ateŋ lɛ, amɛbaabo bo toi fe bɔ ni amɛbaabo amɛtipɛŋfoi lɛ atoi.

   “Esa akɛ oná be ohã obii lɛ ni okɛ amɛ agba sane, okɛ amɛ afee ekome kɛfee nibii tamɔ nihoomɔ, niiahefɔmɔ, shĩa saamɔ, kɛ homwɛk po. Nyɛfea ekome kɛjiea nyɛhiɛtserɛ tamɔ geemstswaa, fim loo TV kwɛmɔ. Kaasusu akɛ ja oná be ni hi dã​—kɛ́ oná be fioo lɛ, nyɛbaanyɛ nyɛkɛfee nɔ ko. Kɛ́ onáaa be ni fa kɛhãaa obii lɛ wekukpaa kpakpa ehiŋ nyɛteŋ!”​—Lorraine.

•   Kwɛmɔ ni obii lɛ kɛ amɛtipɛŋfoi pɛ akabɔ naanyo.

   Biblia lɛ kɛɛ akɛ: “Buulufeemɔ yɛ gbekɛ tsui mli tɔ̃ɔ.”​—Abɛi 22:15.

   Fɔlɔi komɛi náa miishɛɛ kɛ́ amɛna akɛ amɛbii lɛ yɛ nanemɛi babaoo. Eyɛ mli akɛ kɛ́ obi lɛ kɛ etipɛŋfoi babaoo bɔɔ naanyo lɛ ehi moŋ, shi no hãŋ ekɛ mɛi ni eye afii srɔtoi abɔ naanyo. Tipɛŋfoi nyɛŋ amɛkɛ gbɛtsɔɔmɔ kɛ tsɔsemɔ ni sa ahã lɛ tamɔ bɔ ni efɔlɔi ni sumɔɔ lɛ lɛ baafee lɛ.

   “Obi lɛ tipɛŋfoi baanyɛ ale nibii komɛi, shi amɛbɛ hesai, niiashikpamɔi, kɛ nilee ni amɛkɛbaaye amɛbua obi lɛ ni ekpɛ yiŋ kpakpai yɛ shihilɛ mli. Kɛ́ bii kɛ gbɛtsɔɔmɔi ni amɛfɔlɔi kɛhãa amɛ lɛ tsu nii lɛ, amɛdaraa kɛtsɔmɔɔ onukpai kpakpai.”​—Nadia.

•   Okɛ gbɛtsɔɔmɔ ni nilee yɔɔ mli ahã.

   Biblia lɛ kɛɛ akɛ: “Mɔ ni kɛ hiɛshikalɔi nyiɛɔ lɛ, ebaatsɔ hiɛshikalɔ.”​—Abɛi 13:20.

   Be ni obii lɛ daraa po lɛ, kɛ́ oná be ohã amɛ ni okɛ amɛ gba sane lɛ, amɛbaaná he sɛɛ waa. Feemɔ nɔkwɛmɔnɔ kpakpa ohã amɛ.

   “Fɔlɔi ji mɛi ni sa waa akɛ amɛbaafee nɔkwɛmɔnɔ amɛhã amɛbii. Kɛ́ fɔlɔi tsɔɔ amɛbii koni amɛsumɔ amɛfɔlɔi asane ni amɛbu amɛ lɛ, gbekɛbii lɛ baaná he miishɛɛ akɛ wɔsɛɛ lɛ amɛtsɔmɔ tamɔ amɛ.”​—Katherine.