Oblahii kɛ oblayei komɛi yeee be ni amɛfɔlɔi eto ehã amɛ akɛ amɛba shĩa lɛ nɔ. Amɛteŋ mɛi komɛi lakaa amɛfɔlɔi, ni amɛjuɔ shi kɛyaa amɛnanemɛi aŋɔɔ. Mɛni obaafee kɛ́ obi lɛ fee nɔ ko ni hãaa ohe lɛ oye dɔŋŋ?

•  Ani atuatselɔ ji mibi lɛ?

•  Ani mibi lɛ maleɔ?

•  Namɔ esa akɛ ashwa?

•  Te mafee tɛŋŋ maye mabua mibi lɛ koni efee nibii ni baahã mahe lɛ maye ekoŋŋ lɛ?

•  Nɔ ni fɔlɔi kɛɔ

 Ekolɛ, jeee nakai. Biblia lɛ kɛɛ: “Buulufeemɔ yɛ gbekɛ tsui mli tɔ̃ɔ,” ni bei pii lɛ oblahii kɛ oblayei anifeemɔi hãa anaa akɛ sane nɛɛ ji anɔkwale. (Abɛi 22:15) Dr. Laurence Steinberg wie akɛ, “Oblahii kɛ oblayei komɛi kɛ oyaiyeli kɛ buulufeemɔ kpɛɔ amɛyiŋ. Kɛ́ eba lɛ nakai lɛ, esa akɛ amɛkpa gbɛ akɛ naagba baaba amɛyiŋkpɛɛ lɛ he.” a

 Kaamu sane naa akɛ obi lɛ ekpɛ eyiŋ akɛ ebaatse ohiɛ atua. Niiamlitaomɔ tsɔɔ akɛ oblahii kɛ oblayei susuɔ bɔ ni amɛfɔlɔi naa amɛ amɛhãa lɛ he waa diɛŋtsɛ, kɛ́ amɛfee amɛnii tamɔ jeee amɛhe sane po. Eyɛ mli akɛ ekolɛ obi lɛ hãŋ ona akɛ nɔ ni efeɔ lɛ miigba enaa moŋ, shi le ni ele akɛ obɛ nɔ ni efeɔ lɛ he miishɛɛ lɛ dɔɔ lɛ ni ehaoɔ. b

•    Ani nanemɛi ni ekɛbɔɔ lɛ? Biblia lɛ kɛɛ: “Naanyobɔɔ gbonyo fiteɔ sui kpakpai.” (1 Korintobii 15:33) Eji anɔkwale akɛ, oblahii kɛ oblayei ananemɛi náa amɛnɔ hewalɛ waa diɛŋtsɛ. Nakai nɔŋŋ nibii krokomɛi tamɔ social media kɛ jarayeli nibii ahe adafitswai hu feɔ. Nibii nɛɛ kɛ niiashikpamɔi ni oblahii kɛ oblayei nɛɛ bɛ lɛ hãa wɔnaa nɔ hewɔ ni bei komɛi lɛ amɛkpɛɔ yiŋ ni nilee bɛ mli lɛ. Anɔkwa, esa akɛ amɛkase bɔ ni amɛbaafee amɛkpee nɔ ni jɛɔ amɛyiŋkpɛi amli kɛbaa lɛ naa koni wɔsɛɛ lɛ, amɛtsɔmɔ onukpai kpakpai.

•    Ani naagba lɛ jɛ mi? Ekolɛ, obaasusu akɛ oyafee kpɛŋŋ tsɔ ni no hã obi lɛ bɔi nɔ ni efeɔ lɛ feemɔ lɛ. Aloo obaasusu akɛ ekolɛ, oyahiɛ lɛ fɔfɔɔle ni tsɔɔ akɛ ohã lɛ heyeli babaoo tsɔ. Nɔ najiaŋ ni obaajwɛŋ nɔ ni ekolɛ ofee hewɔ ni naagba lɛ ba lɛ he lɛ, jwɛŋmɔ nɔ ni obaanyɛ ofee bianɛ moŋ kɛye obua lɛ he.

•   Ye ohe nɔ. Obi lɛ le akɛ omli baanyɛ afu. Mɛni hewɔ obɔɔɔ mɔdɛŋ ni oye ohe nɔ? Too otsui shi ni okɛ obi lɛ asusu nɔ ni efee ni kɛ naagba lɛ ba lɛ he. Ani eetao ele nɔ ko? Ani ebɛ miishɛɛ? Ani ehe efee shoo? Eetao ená nanemɛi doo? Esaaa akɛ ekɛ saji nɛɛ eko eko jieɔ enaa, shi ebaaye ebua bo kɛ lɛ fɛɛ ni nyɛna nɔ ni kɛ naagba lɛ ba lɛ.

   Biblia mli shishitoo mla: “Mɔ fɛɛ mɔ he afee oya kɛ sane toiboo, ekaye ehe oyai kɛwie, emli akafu oya.”​—Yakobo 1:19.

•   Ye obua obi lɛ ni ejwɛŋ nɔ ni ba lɛ he. Bi lɛ saji tamɔ, Mɛni okase kɛjɛ nɔ ni ba lɛ mli? Be kroko kɛ́ okɛ shihilɛ ni tamɔ nɛkɛ kpe lɛ mɛni obaafee? Sanebimɔi ni tamɔ nɛkɛ lɛ baaye abua obi lɛ ni ele bɔ ni asusuɔ nii ahe dani akpɛɔ yiŋ ni nilee yɔɔ mli.

   Biblia mli shishitoo mla: “Jajemɔ mɛi, kã hiɛ, wiemɔ otsɔɔ, yɛ tsuishitoo kɛ nitsɔɔmɔ he ŋaa fɛɛ mli.”​—2 Timoteo 4:2.

•   Ye obua obi lɛ ni ena akɛ nɔ ni ebaadu lɛ no nɔŋŋ ebaakpa. Enɛ baaye abua obi lɛ ni ekase nii kɛjɛ etɔmɔ lɛ mli. Akɛ nɔkwɛmɔnɔ, kɛ́ obi lɛ booo gbɛtsɔɔmɔ ni okɛhã lɛ yɛ bɔ ni esa akɛ ekudɔ okar ehã lɛ toi lɛ, obaanyɛ ohã ekpa hiɛmɔ bei fioo.

   Biblia mli shishitoo mla: “Nɔ fɛɛ nɔ ni gbɔmɔ duɔ lɛ, no nɔŋŋ ebaakpa hu.”​—Galatiabii 6:7.

•   Okɛ ojwɛŋmɔ ama nɔ ni obaafee ni ohe lɛ oye ekoŋŋ lɛ nɔ. Eji anɔkwale akɛ, enɛ baahe be. Kɛ̃lɛ, esa akɛ ohã obi lɛ ale akɛ obaahe lɛ oye ekoŋŋ shi be baashwie mli. Hã ena akɛ bɔ fɛɛ bɔ ni fee lɛ obaahe lɛ oye ekoŋŋ. Kɛ́ obi lɛ na akɛ oheŋ lɛ oyeŋ dɔŋŋ lɛ, enijiaŋ baaje wui.

   Biblia mli shishitoo mla: “Nyɛkawoa nyɛbii amli la, koni amɛtsui akakumɔ.”​—Kolosebii 3:21.