Yehowa Odasefoi ajamɔ gbɛjianɔtoo (yɛ sane nɛɛ mli lɛ, wɔbaatsɛ lɛ “jamɔ gbɛjianɔtoo”) ni yɔɔ jeŋ fɛɛ lɛ yɛ bulɛ kɛhã mɛi, ni ebuɔ mɛi ahe saji ni enine shɛɔ nɔ lɛ ahe. Jamɔ gbɛjianɔtoo lɛ le akɛ esaaa akɛ ejuɔ shi etaoɔ mɛi ahe saji, shi esa akɛ ekɛ mɛi lɛ diɛŋtsɛ awie koni enine ashɛ amɛhe saji ni he hiaa ni etaoɔ lɛ anɔ. Enɛ yeɔ ebuaa jamɔ gbɛjianɔtoo lɛ ni enyɛɔ etsuɔ mɛi ni ji Yehowa Odasefoi lɛ ahiamɔ nii ahe nii, ni enyɛɔ etsuɔ ejamɔ lɛ kɛ nibii srɔtoi ni efeɔ kɛyeɔ ebuaa mɛi lɛ ahe nii, ni agbɛnɛ hu, ebuɔ mɛi ahe saji fɛɛ ni amɛkɛhãa lɛ lɛ ahe jogbaŋŋ koni ekayaje mɛi ni esaaa akɛ amɛnine shɛɔ nɔ lɛ adɛŋ. (Abɛi 15:22; 25:9) Wɔgbɛɛɛ mɛi ahe saji ni wɔnine shɛɔ nɔ lɛ wɔshwãaa.​—Abɛi 20:19.

Maji srɔtoi ewo mlai yɛ bɔ ni esa akɛ abu mɛi ahe saji ahe ahã lɛ he koni mɛi ni bɛ hegbɛ lɛ anine akashɛ saji nɛɛ anɔ. Ale Yehowa Odasefoi ajamɔ gbɛjianɔtoo lɛ kɛjɛ jeeŋmɔ akɛ, be ni awoko nɛkɛ mlai nɛɛ po lɛ, ebuɔ mɛi ahe saji ni enine shɛɔ nɔ lɛ ahe waa, ni ehãaa mɔ fɛɛ mɔ kɛkɛ ale saji nɛɛ. Jamɔ gbɛjianɔtoo lɛ baaya nɔ ebu mɛi ahe saji ni amɛkɛhãa lɛ lɛ ahe, taakɛ efeɔ momo lɛ.

Shishitoo Mlai Ni Wɔkɛtsuɔ Nii Kɛbuɔ Mɛi Ahe Saji Ahe. Yehowa Odasefoi ajamɔ gbɛjianɔtoo lɛ kɛ mɛi ahe saji ni enine shɛɔ nɔ lɛ tsuɔ nii yɛ shishitoo mlai ni nyiɛ sɛɛ nɛɛ anaa:

1. Abaatsu mɛi ahe saji ni nine shɛɔ nɔ lɛ ahe nii jogbaŋŋ bɔ ni kɛ mla kpãa gbee.

2. Abaatsɔ gbɛ ni ja nɔ aná mɛi ahe saji, ni akɛbaatsu Yehowa Odasefoi ajamɔ lɛ kɛ nibii ni efeɔ kɛyeɔ ebuaa mɛi lɛ pɛ ahe nii.

3. Abaakwɛ koni mɛi ahe saji ni nine baashɛ nɔ lɛ afee nɔ ni ja be fɛɛ be. Kɛ́ jamɔ gbɛjianɔtoo lɛ ná le akɛ nɔ ko ejaaa yɛ saji lɛ eko he lɛ, ebaatsu he nii oya nɔŋŋ.

4. Jamɔ gbɛjianɔtoo lɛ kɛ mɛi ahe saji ni enine shɛɔ nɔ lɛ baato, ni ebaahi eŋɔɔ bei abɔ pɛ ni saji nɛɛ ahe baahia koni ekɛtsu eyiŋtoi ni sa jogbaŋŋ lɛ ahe nii.

5. Abaakwɛ jogbaŋŋ ni akafee nɔ ko ni tsɔɔ akɛ abɛ bulɛ kɛhã hegbɛi ni mɛi ni kɛ amɛhe saji hãa lɛ yɔɔ lɛ.

6. Abaakwɛ ni afee nibii ni sa koni mɛi ni bɛ hegbɛ lɛ anine akashɛ mɛi ahe saji anɔ loo akagbɛ saji nɛɛ ashwã bɔ ni kɛ mla kpãaa gbee. Akɛ paswɛd srɔtoi ewo kɔmpiutai fɛɛ ni akɛ mɛi ahe saji ni nine shɛɔ nɔ lɛ woɔ nɔ lɛ anɔ, ni mɛi ni yɔɔ hegbɛ akɛ amɛnine shɛɔ saji nɛɛ anɔ lɛ pɛ ni le nakai paswɛd srɔtoi lɛ. Kɛ́ akpa nitsumɔ lɛ, aŋmɛlɛɔ ɔfis srɔtoi lɛ amli, ni mɛi ni ahã amɛ hegbɛ akɛ amɛbaanyɛ amɛbote jɛmɛ lɛ pɛ nyɛɔ amɛyaa jɛmɛ.

7. Kɛ́ Yehowa Odasefoi anitsumɔhe nine ko nine shɛ mɔ ko he sane nɔ lɛ, ekɛmajeŋ Yehowa Odasefoi anitsumɔhe nine kroko, ja ehe miihia ni afee nakai koni anyɛ atsu Yehowa Odasefoi ajamɔ lɛ kɛ nibii ni efeɔ kɛyeɔ ebuaa mɛi lɛ ahe nii. Mɛi fɛɛ ni ejɛ amɛsuɔmɔ mli amɛbatsɔmɔ Yehowa Odasefoi, ní amɛmiisumɔ ni ale amɛ nakai lɛ kɛ no feemɔ tsɔɔ akɛ amɛkpɛlɛɔ enɛ nɔ.

Shishitoo mlai nɛɛ ni wɔkɛtsuɔ nii kɛbuɔ mɛi ahe saji ahe lɛ ji nɔ ni kudɔɔ bɔ ni wɔkɛ mɛi ahe saji tsuɔ nii wɔhãa taakɛ atsɔɔ mli yɛ Ato Wɔhe Gbɛjianɔ Koni Wɔfee Yehowa Suɔmɔnaa Nii wolo lɛ mli lɛ, ni kɛ́ mɔ ko batsɔ shiɛlɔ yɛ Yehowa Odasefoi ajamɔ gbɛjianɔtoo lɛ mli nɔŋŋ lɛ, ahãa lɛ wolo nɛɛ eko. Kɛ́ ootao enɛ he saji krokomɛi lɛ, kwɛmɔ Ato Wɔhe Gbɛjianɔ Koni Wɔfee Yehowa Suɔmɔnaa Nii wolo lɛ mli.

Eji mɔ fɛɛ mɔ fɛɛ hegbɛ akɛ abu ehe saji ni ekɛhã ni esumɔɔɔ ni mɛi ni bɛ hegbɛ lɛ anine shɛɔ nɔ lɛ he, ni eyɛ hegbɛ akɛ ehãa afeɔ tsakemɔi yɛ ehe saji lɛ amli loo ehãa adilitiɔ eko, ni abaanyɛ atsu enɛ he nii yɛ bɔ ni Yehowa Odasefoi ajamɔ gbɛjianɔtoo lɛ kɛ mɛi ahe saji tsuɔ nii ehãa lɛ kɛ gbeekpamɔ naa, taakɛ atsɔɔ mli yɛ saneyitso ni ji Hegbɛi Ni Oyɔɔ, ni yɔɔ Bɔ Ni Wɔkɛ Mɛi Ahe Saji Tsuɔ Nii Wɔhãa Yɛ Jeŋ Fɛɛ lɛ shishi lɛ.

Sane nɛɛ, ni ji Bɔ Ni Yehowa Odasefoi Feɔ Amɛbuɔ Mɛi Ahe Saji Ni Amɛhiɛ Lɛ Ahe Yɛ Jeŋ Fɛɛ lɛ tsɔɔ bɔ ni Yehowa Odasefoi kɛ mɛi ahe asaji ni amɛhiɛ lɛ tsuɔ nii amɛhãa yɛ jeŋ fɛɛ.