Israel Saneyelihe Wulu Fe Fɛɛ lɛ kɛ maŋ lɛŋ polisifoi lɛ fi Yehowa Odasefoi lɛ asɛɛ akɛ amɛyɛ mla naa hegbɛ akɛ amɛkpeɔ kutuu kɛhã amɛjamɔŋ nifeemɔi. Nyɛsɛɛ nɛɛ, Saneyelihe nɛɛ fã maŋtiase ni ji Ra’anana lɛ koni eye gbeekpamɔ ni amɛkɛ Yehowa Odasefoi lɛ ba akɛ amɛbaahã amɛfee kpee srɔtoi enyɔ yɛ maŋ lɛ stediɔm (Metro West Sports Center) lɛ nɔ. Akɛni no beiaŋ lɛ, jamɔ kui komɛi miinyɛ maŋtiase lɛ nɔkwɛlɔi lɛ anɔ hewɔ lɛ, be ni eshwɛ ŋmɛlɛtswai 36 ni Odasefoi lɛ baaje klɛŋklɛŋ kpee lɛ shishi lɛ, maŋtiase lɛ nɔkwɛlɔi lɛ fo gbeekpamɔ lɛ mli.

Yehowa Odasefoi lɛ kɛ maŋtiase ni ji Ra’anana lɛ ba gbeekpamɔ akɛ amɛbaahai maŋ lɛ stediɔm kɛfee kpee yɛ April 18 kɛ May 2, 2015. Yɛ April 15 lɛ, onukpa ni kwɛɔ maŋtiase lɛ nɔ lɛ wie akɛ eeshe gbeyei akɛ April 18 kpee lɛ baanyɛ ekɛ oshara aba, ni enɛ ha Odasefoi lɛ yɔse akɛ ewaaa akɛ abaafo amɛnibimɔ lɛ mli. Yɛ naashiwoo ni maŋ polisifoi lɛ kɛhã akɛ amɛbaakwɛ koni basabasa ko akaba lɛ fɛɛ sɛɛ lɛ, maŋtiase lɛ nɔkwɛlɔi lɛ fo gbeekpamɔ lɛ mli enɔ jetsɛremɔ. Adafitswaa nitsumɔhei tsɔɔ akɛ jamɔ kui komɛi amli bii ji mɛi ni nyɛ nɔkwɛlɔi lɛ anɔ ni amɛkpɛ yiŋ nakai, ejaakɛ amɛwo maŋtiase lɛ nɔkwɛlɔi lɛ ahe gbeyei akɛ kɛji amɛŋmɛ Odasefoi lɛ gbɛ ni amɛfee kpee lɛ, amɛfiŋ amɛsɛɛ dɔŋŋ.

Eyɛ mli akɛ Odasefoi lɛ kɛ sane lɛ tee Lod kpokpaa lɛ nɔ saneyelihe lɛ oya nɔŋŋ koni afã maŋtiase lɛ nɔkwɛlɔi lɛ ni amɛŋmɛ Odasefoi lɛ gbɛ koni amɛfee amɛkpee lɛ yɛ stediɔm lɛ moŋ, shi anyɛɛɛ afã amɛ oya, ejaakɛ be ni eshwɛ lɛ faaa. No hewɔ lɛ ehiii Odasefoi lɛ kpee lɛ feemɔ yɛ stediɔm lɛ yɛ April 18 lɛ. Odasefoi lɛ yahai he kroko kɛfee amɛkpee lɛ, shi shika ni amɛwo yɛ no he lɛ fa fe nɔ ni amɛkɛyahai maŋtiase lɛ stediɔm lɛ toi ekpaa sɔŋŋ.

Yɛ April 29 lɛ, Lod kpokpaa lɛ nɔ saneyelihe lɛ fã maŋtiase lɛ nɔkwɛlɔi lɛ ni amɛye gbeekpamɔ ni amɛkɛ Odasefoi lɛ ba lɛ nɔ. Saneyelihe lɛ bua akɛ, “Maŋtiase ni ji Ra’anana lɛ eku hegbɛ ni Yehowa Odasefoi lɛ yɔɔ akɛ amɛkɛ amɛhe woɔ amɛjamɔŋ nifeemɔi amli, amɛkpeɔ kutuu, ní abu amɛ jogbaŋŋ tamɔ abuɔ mɛi krokomɛi lɛ mli.” Oya nɔŋŋ ni maŋtiase nɔkwɛlɔi lɛ yabi koni Saneyelihe Wulu Fee Fɛɛ lɛ atswa sane ni Lod kpokpaa lɛ nɔ saneyelihe lɛ bua lɛ afɔ̃, shi yɛ May 1 lɛ, Saneyelihe Wulu Fe Fɛɛ lɛ bua akɛ amɛfiɔ yiŋ ni Lod kpokpaa lɛ saneyelihe lɛ bua lɛ sɛɛ. Maŋtiase lɛ yabi koni akwɛ sane lɛ mli ekoŋŋ nɔ ni ji shii enyɔ nɔ, shi atswa amɛnibimɔ lɛ afɔ̃.

Bɔ ni Saneyelihe Wulu Fe Fɛɛ lɛ bua sane lɛ hã Yehowa Odasefoi lɛ nyɛ amɛfee amɛkpee yɛ maŋtiase lɛ stediɔm lɛ yɛ May 2. Jamɔi ni yɔɔ maŋtiase lɛ mli lɛ hiɛnyiɛlɔi, ni Yudafoi ajamɔŋ hiɛnyiɛlɔ lɛ, kɛ ɔtodɔks kuu ko ni ale amɛ akɛ amɛhiɛ yɔɔ laŋlaŋ ni amɛfiteɔ nii lɛ, te shi amɛshi yiŋ ni Saneyelihe Wulu Fe Fɛɛ lɛ kpɛ lɛ, ni amɛyabua amɛhenaa ni amɛkwa amɛkɛɛ amɛmiisɔle, enɛ hã amɛná mɛi 1,500 sɔŋŋ. Mɛi nɛɛ bua amɛhenaa yɛ stediɔm lɛ hiɛ be ni Odasefoi 600 lɛ bashɛ shi kɛhã amɛkpee lɛ. Etsɛɛɛ kɛkɛ ni henaabuamɔ ni amɛtsɛ lɛ akɛ sɔlemɔ lɛ batsɔ bolɔmɔi kɛ Odasefoi lɛ woo. Amɛteaŋ mɛi komɛi tutua Odasefoi, ni yei kɛ gbekɛbii fata he lɛ. Amɛsopa Odasefoi lɛ, amɛtsɛ̃tsɛ̃ɛ lajɔ̃ eshwie amɛnɔ, amɛwɔ amɛyi, amɛmamɔ amɛ gɔnti kɛjɛ amɛ, ni amɛfite amɛlɔlei hu. Oya nɔŋŋ kɛkɛ ni polisifoi lɛ ba jɛmɛ koni amɛbaatsĩ mɛi lɛ anaa. Nɔ ni polisifoi lɛ bafee lɛ hã Odasefoi lɛ ná gbɛ amɛfee amɛkpee lɛ amɛgbe naa, ni amɛku amɛsɛɛ amɛtee shĩa shweshweeshwe.

Yehowa Odasefoi ni yɔɔ Israel lɛ ahiɛ esɔ bɔ ni Israel amraloi lɛ fee shiŋŋ kɛkwɛ koni akɛ mla atsu nii ni akakwɛ hiɛiaŋ yɛ jamɔ saji amli lɛ waa. Enɛ hã amɛná gbɛ amɛfee amɛkpee lɛ yɛ toiŋjɔlɛ mli.