Yehowa Odasefoi anitsumɔhe yitso lɛ hiɛ yɛ amɛhe nɔ waa yɛ coronavirus tsɛŋemɔ hela ni eba (ni atsɛɔ lɛ hu akɛ COVID-19) lɛ he. Wɔle akɛ Biblia lɛ egba akɛ tsɛŋemɔ helai baafee naagbee gbii lɛ ahe okadii lɛ eko. (Luka 21:11) Kɛ́ hela ko ba ni ebɔi mɛi tsɛŋemɔ lɛ, nilee yɛ mli akɛ wɔbaafee nɔ ko kɛbu wɔ, kɛ mɛi krokomɛi ahe.​—Abɛi 22:3.

Mɛi komɛi miibibii amɛhe akɛ, ‘te wɔnyɛmimɛi ni yɔɔ hei ni hela lɛ eba yɛ lɛ yɔɔ tɛŋŋ?’ COVID-19 hela lɛ ehã nitsumɔhe niji kɛ asafoi ni yɔɔ Italy, Japan, South Korea, kɛ hei krokomɛi lɛ efee tsakemɔi komɛi. Yɛ hei komɛi lɛ, nitsumɔhe niji lɛ eŋmɛɛɛ gbɛ ni mɛi abashara shi yɛ jɛmɛ, ni amɛhãaa mɛi abasara betel weku lɛ mli bii lɛ hu. Yɛ hei komɛi hu lɛ, akɛni nɔyeli lɛ egu henaabuamɔi hewɔ lɛ, ehe ebahia ni nitsumɔhe niji ni yɔɔ hei nɛɛ afo kpokpaa nɔ kpeei srɔtoi ni ato he gbɛjianɔ lɛ amli. Kɛfata he lɛ, asafoi komɛi hu efee tsakemɔi yɛ gbɛ ni amɛtsɔɔ nɔ amɛtsuɔ amɛshiɛmɔ nitsumɔ lɛ kɛ bɔ ni amɛfeɔ asafoŋ kpeei amɛhãa lɛ mli. Yɛ naagbai nɛɛ ni wɔnyɛmimɛi lɛ kɛkpeɔ lɛ fɛɛ sɛɛ lɛ amɛkaneɔ Biblia lɛ daa ni amɛjwɛŋɔ nɔ, ni amɛmiiwowoo amɛhe hewalɛ hu.​—Yuda 20, 21.

Yɛ shihilɛi nɛɛ amli lɛ, wɔnyɛmimɛi lɛ ena akɛ shishitoo mlai ni nyiɛ sɛɛ nɛɛ yeɔ ebuaa waa. Otii nɛɛ baanyɛ aye abua bo kɛ oweku lɛ koni kɛ́ tsɛŋemɔ hela ko ba he ni nyɛyɔɔ lɛ, nyɛnyɛ nyɛdamɔ naa.

• Otsui Akafã. Eyɛ mli akɛ, kɛ́ tsɛŋemɔ hela ko ba lɛ esa akɛ wɔkwɛ wɔhe nɔ jogbaŋŋ koni eko akamɔ wɔ moŋ, shi esaaa akɛ wɔtsui fãa fe nine.​—Abɛi 14:15; Yesaia 30:15.

• Bó Nɔ Ni Nɔyeli Lɛ Baakɛɛ Lɛ Toi. Bei babaoo lɛ, maŋ onukpai woɔ mlai komɛi koni amɛkɛbu maŋbii lɛ ahe ni hela lɛ eko akamɔ amɛ. Ehi akɛ wɔbaale nɔyeli lɛ gbɛtsɔɔmɔi nɛɛ ni wɔkɛtsu nii.​—Romabii 13:1.

• Hã Ohe Afee Falefale. Esa akɛ okɛ nu kɛ samala afɔ odɛ̃, loo okɛ sanitizer ni alcohol yɔɔ mli akpa odɛŋ be kɛ beiaŋ. Agbɛnɛ hu, esa akɛ wɔkɛ tsofai ni gbeɔ muawai atsumɔ nibii ni afɔɔ he taramɔ yɛ wɔshĩai amli kɛ Maŋtsɛyeli Asa lɛ nɔ lɛ ahe be kɛ beiaŋ. Kɛfata he lɛ, datrɛfoi hu ewie akɛ, yɛ shihilɛi ni tamɔ nɛkɛ amli lɛ, esaaa akɛ wɔtaa mɛi adɛŋ ejaakɛ ebaanyɛ egbɛ hela nɛɛ eshwa. World Health Organization lɛ kɛ ŋaawoi komɛi ni kɔɔ coronavirus lɛ he lɛ ehã.

• Jiemɔ Suɔmɔ Kpo Otsɔɔ Mɛi Krokomɛi. Eyɛ mli akɛ wɔ fɛɛ wɔle akɛ ehe miihia ni wɔya Kristofoi akpeei ni wɔkɛ wɔhe awo shiɛmɔ nitsumɔ lɛ mli moŋ, shi kɛ́ obɛ hewalɛ lɛ, ehi akɛ ohi shĩa ni okɛ hela lɛ eko akayatsɛŋe mɛi krokomɛi. Kɛ́ wɔkɛ ŋaawoo nɛɛ tsu nii lɛ, ebaatsɔɔ akɛ wɔsumɔɔ wɔnyɛmi gbɔmɔ, ni ehãŋ wɔkɛ hela atsɛŋe wɔnyɛmimɛi kɛ wɔkutsoŋbii lɛ.​—Mateo 22:39.

• Okɛ Tsakemɔi Srɔtoi Ni Nyɛsafo Lɛ Efee Lɛ Atsu Nii. Yɛ hei ni tsɛŋemɔ hela nɛɛ eba yɛ lɛ, ehe baahia ni nitsumɔhe nine lɛ afo asafoŋ kpeei, kpokpaa nɔ kpeei kɛ teokrase henaabuamɔi krokomɛi amli. Nɛkɛ ji bɔ ni shihilɛ lɛ eba lɛ amrɔ nɛɛ yɛ hei ni COVID-19 hela lɛ emɔmɔ mɛi waa yɛ lɛ, tamɔ hei komɛi ni yɔɔ Italy, Japan, kɛ South Korea lɛ. Asafoŋ onukpai lɛ baakwɛ shihilɛ ni yɔɔ hei ni amɛyɔɔ lɛ, koni kɛ́ ebaahi lɛ, amɛto gbɛjianɔ koni shiɛlɔi lɛ akwɛ kpeei ni arikɔdi lɛ yɛ amɛshĩai amli. Nyɛmimɛi lɛ baanyɛ amɛtsɔ foŋ, tɛs mɛsej, e-mail, loo lɛtaŋmaa nɔ amɛshiɛ.

Shishitoo mlai komɛi yɛ saji ni nyiɛ sɛɛ nɛɛ amli ni baanyɛ aye abua wɔ ni wɔbu wɔhe kɛje helai ahe.

• “Protect Yourself From Disease” Awake! No. 6 2016, baafa 4-6

• “Ways to Improve Your Health” Awake! June 2015, baafa 2-7

• “You Can Improve Your Health: Key 4​—Protect Your Health” Awake! March 2011, baafa 7