MEXICO CITY​—Maŋ onukpai ni yɔɔ Baja California, yɛ Mexico lɛ, hã Yehowa Odasefoi lɛ yijiemɔ wolo kɛtsɔɔ bɔ ni amɛhiɛ esɔ bɔ ni Yehowa Odasefoi lɛ kɛ gboklɛfoi ni yɔɔ Mexico tsuŋwoohei lɛ kaseɔ Biblia lɛ. Mɛi ni kɛ amɛwaonaa gbɛ́i wo wolo nɛɛ shishi ji Daniel De La Rosa Anaya, ni eji woloŋmalɔ kɛhã Baja California nitsumɔhe ni kwɛɔ shweshweeshwefeemɔ nɔ lɛ, kɛ Jesús Héctor Grijalva Tapia, ni eji woloŋmalɔ kɛhã Baja California tsuŋwoohei lɛ.

Sane ni yɔɔ yijiemɔ wolo lɛ nɔ nɛ: “Akɛ amralofoi ni kwɛɔ Baja California kpokpaa lɛ nɔ lɛ, wɔmiitsɔ nitsumɔhe ni kwɛɔ kpokpaa lɛ shweshweeshwefeemɔ nɔ lɛ nɔ wɔmiida nyɛ, Yehowa Odasefoi lɛ ashi yɛ yelikɛbuamɔ kpele ni nyɛkɛhãa wɔ, kɛ bɔ ni nyɛtuu nyɛhe nyɛhã kɛyeɔ nyɛbuaa Baja California kpokpaa lɛ hewɔ; enɛ ehã nyɛye nyɛbua gboklɛfoi, ni no hewɔ lɛ, ewaaa ehãaa amɛ akɛ kɛ́ ajie amɛ lɛ, amɛhe baaba sɛɛnamɔ kɛhã maŋbii lɛ.”

Yehowa Odasefoi fɔɔ gboklɛfoi ni yɔɔ Baja California tsuŋwoohei, ní gboklɛfoi ni yɔɔ Mexicali lɛ hu fata he lɛ asaramɔ waa. Amɛbɔi gboklɛfoi ni yɔɔ Mexicali tsuŋwoohe lɛ asaramɔ yɛ afi 1991, be ni gboklɛfonyo ko kpɛlɛ koni amɛbasara lɛ lɛ. Be ni Yehowa Odasefoi lɛ bibii Jesús Manuel López Moreno, ni eji onukpa yɛ Mexicali nitsumɔhe ko (Social Rehabilitation Center) ni kwɛɔ koni aye abua gboklɛfoi kɛ amɛhenɔi koni amɛtsake lɛ saji lɛ, ewie akɛ: “Biɛ ni nyɛbaa kɛ tsɔsemɔ ni nyɛkɛhãa gboklɛfoi lɛ woɔ wɔ hewalɛ koni wɔye wɔbua amɛ ni amɛná nɔmimaa kɛkɛɛ akɛ: ‘Gbɔmɛi ji wɔ. Wɔhe yɛ sɛɛnamɔ, ejaakɛ be baashɛ ni abaajie wɔ koni wɔyafata maŋbii lɛ ahe, no hewɔ lɛ esa wɔtsake wɔtsɔmɔ mɛi ni abaaná amɛhe sɛɛ.’ . . . Anɔkwa, mihiɛ esɔ nyɛyelikɛbuamɔ lɛ waa.”

Gamaliel Camarillo, ni eji Yehowa Odasefoi ni yɔɔ Mexico lɛ anaawielɔ lɛ, kɛɛ akɛ: “Yehowa Odasefoi anitsumɔ titri ji ní amɛye amɛbua mɛi, ní gboklɛfoi hu fata he lɛ, koni amɛnu Biblia tsɔɔmɔi lɛ ashishi jogbaŋŋ. Yehowa Odasefoi asafo ko ni yɔɔ Mexicali lɛ tsɔɔ akɛ, kɛhooo kwraa lɛ, abaptisi gboklɛfoi kpaanyɔ akɛ Yehowa Odasefoi, be ni amɛyɔɔ tsuŋwoohe lolo yɛ Mexicali lɛ. Wɔheɔ wɔyeɔ akɛ, ekɔɔɔ he eko shihilɛ mli ni mɛi yɔɔ lɛ, esa akɛ ahã amɛ hegbɛ koni amɛná Biblia mli tsɔsemɔ he sɛɛ.”

Adafitswalɔi Baanyɛ Atswa Wɔnɔmbɛs Nɛɛ:

International: J. R. Brown, Office of Public Information, tel. +1 718 560 5000

Mexico: Gamaliel Camarillo, tel. +52 555 133 3048