Yɛ March afi 2020 lɛ, afo kpokpaa wulu nɔ kpeei ni afeɔ lɛ hiɛ kɛ hiɛ mli fioo yɛ COVID-19 tsɛŋemɔ hela lɛ hewɔ. Afi nɛɛ abaafee ‘Too Otsui Shi’! Kpokpaa Wulu Nɔ Kpeei 6,000 kɛ sɛɛ yɛ je lɛŋ hei srɔtoi yɛ wiemɔ 500 kɛ sɛɛ amli. Afee afi nɛɛ kpokpaa wulu nɔ kpeei ni akpe hiɛ kɛ hiɛ kɛfee lɛ klɛŋklɛŋ nɔ lɛ yɛ May 12 kɛyashi 14, 2023.

Nyɛmiyoo Khrystine Torres fata mɛi 1,800 kɛ sɛɛ ni tee kpee ni afee yɛ Yehowa Odasefoi Akpee Asa ni yɔɔ Newburgh, yɛ New York, yɛ U.S.A. lɛ, ahe. Ewie akɛ: “Be ni sɛinɔtalɔ lɛ wie akɛ: ‘Wɔmiihere nyɛ atuu’ lɛ, mɔ fɛɛ mɔ ni yɔɔ kpee asa nɔ lɛ bɔi edɛ̃tswaa. Mɔ fɛɛ mɔ kwraa mii shɛ ehe akɛ, wɔ fɛɛ wɔnaa ebakpe shi ekoŋŋ.” Nyɛminuu Duane Smith, ni lɛ hu etee kpee lɛ eko lɛ wie akɛ: “Onaa akɛ mɔ fɛɛ mɔ mii eshɛ ehe waa naakpa, eyɛ miishɛɛ pam. Nyɛmimɛi lɛ amii shɛ amɛhe waa akɛ wɔbakpe kutuu ekoŋŋ.”

Abaptisi Nyɛmiyoo Jessica Dolcemascolo yɛ COVID-19 be lɛ mli, ni eyako kpokpaa wulu nɔ kpee ni afeɔ lɛ hiɛ kɛ hiɛ eko pɛŋ. Ewie bɔ ni enu he ehã be ni etee kpokpaa wulu nɔ kpee ni afee lɛ hiɛ kɛ hiɛ lɛ he akɛ: “Be ni mitee kpee lɛ, mimii shɛ mihe waa, minu ahe akɛ asumɔɔ mi, ookɛɛ mikɛ minaanyo ko ni misumɔɔ esane waa shi mina lɛ etsɛ lɛ, ekpe ekoŋŋ yɛ afii babaoo sɛɛ.” Nyɛmiyoo Noemi Tinajero ni eye afii 18, ni abaptisi lɛ mra mli yɛ afi nɛɛ mli lɛ kɛɛ akɛ: “Onaa wekui ni yɔɔ miishɛɛ, nanemɛi ni amɛmii eshɛ amɛhe. . . . Etamɔ nɔ ni wɔbote jeŋ hee lɛ mli.”

Mɛi pii tsɔɔ akɛ, amɛhiɛ esɔ kpee lɛ saneyitso waa. Nyɛminuu Sam Huh wie akɛ: “Wɔteŋ mɛi pii lɛ, ewa waa kɛhã wɔ akɛ wɔbaato wɔtsui shi. No hewɔ lɛ, eji kaimɔ ni ba yɛ ebe naa, ni no hã wɔna akɛ esa akɛ wɔkase bɔ ni Yehowa etee nɔ eto etsui shi lɛ, ejaakɛ eji nɔkwɛmɔnɔ ni nɔ bɛ.” Nyɛmiyoo Frenchie Smith wie akɛ: “Kpee nɛɛ hã mina bɔ ni tsuishitoo saa mishihilɛ mli nɔ fɛɛ nɔ he ehãa. Kpee lɛ mli nifeemɔi lɛ fɛɛ he yɛ sɛɛnamɔ waa.”

Mɛi fɛɛ ni tee kpee nɛɛ klɛŋklɛŋ nɔ ni afee yɛ Newburgh, yɛ New York lɛ nu he akɛ awo amɛ hewalɛ diɛŋtsɛ! Wɔ, kɛ mɛi akpekpei abɔ ni yɔɔ je lɛŋ hei srɔtoi lɛ miikpa gbɛ waa akɛ, yɛ nyɔji ni jwere wɔhiɛ nɛɛ amli lɛ, wɔ hu wɔbaaná mumɔŋ niyenii kpakpai ni asaa ato wɔ nɛɛ mli gbɛfaŋnɔ.​—Lala 122:1.