1 Korintobii 10:1-33
10 Agbɛnɛ, nyɛmimɛi, miitao nyɛle akɛ wɔtsɛmɛi lɛ fɛɛ hi atatu lɛ shishi ni amɛ fɛɛ amɛtsɔ ŋshɔ lɛ mli
2 ni atsɔ atatu lɛ kɛ ŋshɔ lɛ nɔ abaptisi amɛ fɛɛ awo Mose mli,
3 ni amɛ fɛɛ amɛye mumɔŋ niyenii kome too lɛ nɔŋŋ
4 ni amɛ fɛɛ amɛnu mumɔŋ nu kome too lɛ nɔŋŋ. Ejaakɛ no mli lɛ amɛnuɔ mumɔŋ tɛsaa ni nyiɛ amɛsɛɛ lɛ mli nu, ni nakai mumɔŋ tɛsaa lɛ damɔ shi kɛhã* Kristo lɛ.
5 Kɛ̃lɛ, Nyɔŋmɔ náaa amɛteŋ mɛi pii ahe miishɛɛ, ejaakɛ agbe amɛ yɛ ŋa lɛ nɔ.*
6 Agbɛnɛ, nibii nɛɛ bafee nɔkwɛmɔnii kɛhã wɔ, bɔ ni afee ni wɔkashwe nibii fɔji, tamɔ bɔ ni amɛshwe lɛ.
7 Asaŋ nyɛkatsɔmɔa amagajalɔi tamɔ amɛteŋ mɛi komɛi fee lɛ; tamɔ bɔ ni aŋma lɛ, akɛ: “Mɛi lɛ ho tara shi ni amɛye nii ni amɛnu nii. Kɛkɛ ni amɛte shi ni amɛshwɛ amɛhiɛ jogbaŋŋ.”
8 Asaŋ nyɛkahãa wɔyaa nɔ wɔkɛ wɔhe woɔ bɔlɛnamɔ jeŋba sha mli,* tamɔ bɔ ni amɛteŋ mɛi komɛi kɛ amɛhe wo bɔlɛnamɔ jeŋba sha mli,* ní amɛteŋ mɛi akpei nyɔŋmai-enyɔ-kɛ-etɛ nyɔnyɔi yɛ gbi kome mli lɛ.
9 Asaŋ nyɛkahãa wɔkaa Yehowa,* tamɔ bɔ ni amɛteŋ mɛi komɛi ka lɛ, ní onufui kpãtã amɛhiɛ lɛ.
10 Asaŋ nyɛkawiea huhuuhu, tamɔ bɔ ni amɛteŋ mɛi komɛi wie huhuuhu, ní hiɛkpatalɔ lɛ kpãtã amɛhiɛ lɛ.
11 Agbɛnɛ, nibii nɛɛ ba amɛnɔ akɛ nɔkwɛmɔnii, ni aŋma enɛɛmɛi koni akɛbɔ wɔ mɛi ni shihilɛi agbɛjianɔtoi lɛ anaagbei lɛ enina wɔ lɛ kɔkɔ.
12 No hewɔ lɛ, mɔ ni susuɔ akɛ edamɔ shi lɛ akwɛ jogbaŋŋ koni ekagbee shi.
13 Kaa* ko bako nyɛnɔ ní jeee gbɔmɛi ahe nɔ. Shi anɔkwafo ji Nyɔŋmɔ, ni ehãŋ aka nyɛ fe bɔ ni nyɛbaanyɛ naa nyɛdamɔ, shi moŋ yɛ kaa lɛ mli lɛ, ebaaje gbɛ ni nyɛkɛaaje mli hu ehã nyɛ koni nyɛnyɛ naa nyɛdamɔ.
14 No hewɔ lɛ, mɛi ni misumɔɔ, nyɛjoa amagajamɔ naa foi.
15 Mikɛ nyɛ miiwie tamɔ akɛ mɛi ni kɔɔ sane sɛɛ wieɔ lɛ; nyɛ diɛŋtsɛ nyɛkojoa nɔ ni miwieɔ lɛ nyɛhãa nyɛhe.
16 Jɔɔmɔ kpulu lɛ ní wɔjɔɔ lɛ, ani jeee Kristo lɛ lá lɛ mli gbɛfaŋnɔ wɔnáa lɛ? Aboloo lɛ ní wɔkumɔɔ lɛ, ani jeee Kristo lɛ gbɔmɔtso lɛ mli gbɛfaŋnɔ wɔnáa lɛ?
17 Akɛni aboloo kome yɔɔ hewɔ lɛ, wɔ lɛ, eyɛ mli akɛ wɔyi pii moŋ, shi gbɔmɔtso kome ji wɔ, ejaakɛ wɔ fɛɛ wɔyeɔ nakai aboloo kome lɛ eko.
18 Nyɛkwɛa heloonaa Israel: Mɛi ni yeɔ afɔlei lɛ, ani jeee gbɛfaŋnɔ amɛkɛ afɔleshaa latɛ lɛ náa lɛ?
19 Belɛ mɛni miwieɔ lɛ mɔ? Akɛ, ani afɔle ni aŋɔhã amaga ji nɔ ko, aloo akɛ, amaga ji nɔ ko?
20 Dabi; shi miikɛɛ akɛ nɔ ni jeŋmaji lɛ ŋɔhãa akɛ afɔle lɛ, daimonioi amɛŋɔhãa shi jeee Nyɔŋmɔ; ni misumɔɔɔ akɛ nyɛkɛ daimonioi lɛ náa nɔ ko mli gbɛfaŋnɔ.
21 Nyɛnyɛŋ Yehowa* kpulu lɛ kɛ daimonioi akpulu lɛ fɛɛ nyɛnu; nyɛnyɛŋ “Yehowa* okpɔlɔ lɛ” kɛ daimonioi akpɔlɔ lɛ fɛɛ nɔ nii nyɛye.
22 Aloo ‘wɔmiifee ní Yehowa* aye awuŋa’? Wɔhe waaa fe lɛ, aloo jeee nakai?
23 Mla ŋmɛɔ nibii fɛɛ gbɛ,* shi jeee nibii fɛɛ he yɔɔ sɛɛnamɔ. Mla ŋmɛɔ nibii fɛɛ gbɛ, shi jeee nibii fɛɛ tswaa mɔ maa shi.
24 Mɔ ko mɔ ko akaya nɔ etao nɔ ni lɛ diɛŋtsɛ ebaaná he sɛɛ, shi moŋ nɔ ni mɔ kroko baaná he sɛɛ.
25 Nyɛyea nɔ fɛɛ nɔ ni ahɔ̃ɔ yɛ loo jara nɔ, ni nyɛkabia mli yɛ nyɛhenilee hewɔ,
26 ejaakɛ “shikpɔŋ lɛ kɛ emli nii lɛ fɛɛ lɛ, Yehowa* nɔ ni.”
27 Kɛ́ mɔ ko ni heee yeee fɔ̃ nyɛ nine ni nyɛmiisumɔ ni nyɛya lɛ, nyɛyea nɔ fɛɛ nɔ ni akɛbaama nyɛhiɛ lɛ, ni nyɛkabia mli yɛ nyɛhenilee lɛ hewɔ.
28 Shi kɛ́ mɔ ko kɛɛ nyɛ akɛ, “Enɛ ji nɔ ko ni aŋɔhã akɛ afɔleshaa nii” lɛ, nyɛkayea yɛ mɔ ni hã nyɛle enɛ lɛ hewɔ, kɛ agbɛnɛ hu, yɛ henilee hewɔ.
29 Jeee nyɛ diɛŋtsɛ nyɛhenilee he miwieɔ lɛ, shi moŋ mɔ kroko lɛ nɔ lɛ. Ejaakɛ mɛni hewɔ esa akɛ mɔ kroko henilee akojo hegbɛ ni miyɔɔ lɛ?
30 Kɛ́ shidaa mikɛyeɔ lɛ, mɛni hewɔ esa akɛ awie mihe efɔŋ yɛ nii ni midaa shi yɛ he lɛ hewɔ?
31 No hewɔ lɛ, kɛ́ nii nyɛyeɔ jio, nii nyɛnuɔ jio, aloo nɔ kroko nyɛfeɔ jio, nyɛfea nibii fɛɛ kɛwoa Nyɔŋmɔ hiɛ nyam.
32 Nyɛkwɛa ni nyɛkatsɔmɔa nanetɔ̃tɔmɔnii nyɛhãa Yudafoi lɛ kɛ Helabii lɛ kɛ Nyɔŋmɔ asafo lɛ,
33 tamɔ bɔ nɔŋŋ ni miibɔ mɔdɛŋ akɛ masa mɛi fɛɛ hiɛ yɛ nii fɛɛ mli, ní mitaooo nɔ ni mi diɛŋtsɛ maná he sɛɛ, shi moŋ nɔ ni mɛi babaoo baaná he sɛɛ, koni ahere amɛyiwala lɛ.
Shishigbɛ Niŋmaa
^ Aloo “ji.”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Ni ji, efɔŋ he kaa.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Aloo “Wɔyɛ nibii fɛɛ hegbɛ.”
^ Kwɛmɔ Wiemɔi Titrii Amligbalamɔ lɛ.
