1 Korintobii 13:1-13
-
Suɔmɔ
—gbɛ ni nɔ bɛ (1-13)
13 Kɛ́ miwieɔ gbɔmɛi kɛ ŋwɛibɔfoi awiemɔi shi mibɛ suɔmɔ lɛ, no lɛ mitsɔ ŋoŋo ni jijeɔ loo tsɛŋtsɛŋ ni gbɛɔ.
2 Ni kɛ́ miyɛ gbalɛ nikeenii, ni minuɔ teemɔŋ saji krɔŋkrɔŋi lɛ fɛɛ kɛ nilee fɛɛ hu shishi, ni kɛ́ miyɛ hemɔkɛyeli fɛɛ bɔ ni manyɛ gɔji matsirɛ,* shi mibɛ suɔmɔ lɛ, mijeee nɔ ko.*
3 Ni kɛ́ miŋɔ minibii fɛɛ mihã kɛkwɛ mɛi krokomɛi, ni kɛ́ miŋɔ migbɔmɔtso mihã koni mashwã, shi mibɛ suɔmɔ lɛ, mináaa he sɛɛ ko kwraa.
4 Suɔmɔ toɔ etsui shi* ni emli hi. Suɔmɔ yeee awuŋa. Efeee fuu, efeee pupuupu,
5 efeee nii ni bulɛ bɛ he,* etaooo lɛ diɛŋtsɛ enɔ, emli wooo la. Ekɛ efɔŋ* etooo emli.
6 Enáaa miishɛɛ yɛ nii ni ejaaa hewɔ, shi moŋ enáa miishɛɛ yɛ anɔkwale hewɔ.
7 Edamɔɔ nibii fɛɛ naa, eheɔ nibii fɛɛ eyeɔ, ehiɛ kãa nibii fɛɛ nɔ, efiɔ shi yɛ nibii fɛɛ mli.
8 Suɔmɔ sɛɛ efooo kɔkɔɔkɔ.* Shi kɛ́ gbalɛ nikeenii ni lɛ, amɛsɛɛ baafo; kɛ́ wiemɔi srɔtoi* ni lɛ, abaafɔ̃ɔ; kɛ́ nilee ni lɛ, esɛɛ baafo.
9 Ejaakɛ nilee ni wɔyɔɔ lɛ, fã kɛ fã ni, ni wɔgbaa fã kɛ fã,
10 shi kɛ́ nɔ ni eye emuu lɛ ba lɛ, nɔ ni ji fã kɛ fã lɛ sɛɛ baafo.
11 Be ni miji gbekɛ lɛ, miwieɔ tamɔ gbekɛ, mijwɛŋɔ tamɔ gbekɛ, misusuɔ nii ahe tamɔ gbekɛ; shi amrɔ nɛɛ ní mitsɔ onukpa lɛ, mishɛrɛ gbekɛbii asui lɛ mishwie.
12 Ejaakɛ amrɔ nɛɛ, wɔkwɛɔ dade ashwishwɛ mli ni wɔnaa nii tuutuu,* shi yɛ nakai beiaŋ lɛ, ebaafee hiɛ kɛ hiɛ. Amrɔ nɛɛ, mile nii fã kɛ fã, shi nakai beiaŋ lɛ, male nii jogbaŋŋ,* tamɔ bɔ ni ale mi jogbaŋŋ lɛ.
13 Shi agbɛnɛ, nibii etɛ nɛɛ baahi shi: hemɔkɛyeli, hiɛnɔkamɔ, kɛ suɔmɔ; shi suɔmɔ ji amɛteŋ nɔ ni fe fɛɛ.
Shishigbɛ Niŋmaa
^ Aloo “mafãmɔ.”
^ Aloo “mihe bɛ sɛɛnamɔ ko.”
^ Aloo “miɔ ŋɔɔ.”
^ Aloo “nii ni esaaa.”
^ Aloo “tɔmɔi.”
^ Aloo “nine enyɛɛɛ shi kɔkɔɔkɔ.”
^ Ni tsɔɔ akɛ, wiemɔi krokomɛi ní awieɔ yɛ naakpɛɛ gbɛ nɔ.
^ Aloo “wɔnaaa nii jogbaŋŋ.”
^ Aloo “male nii kɛyi shi.”
