1 Korintobii 15:1-58
15 Agbɛnɛ nyɛmimɛi, miikai nyɛ sane kpakpa ní mijaje mitsɔɔ nyɛ, ní nyɛ hu nyɛkpɛlɛ nɔ, ní nyɛdamɔ shi shiŋŋ yɛ mli hu lɛ.
2 Aatsɔ no nɔ aahere nyɛyiwala hu kɛ́ nyɛhiɛ sane kpakpa ní mijaje mitsɔɔ nyɛ lɛ mli kpɛŋŋ, ja yakatswaa nyɛbatsɔmɔ héyelilɔi lɛ.
3 Ejaakɛ klɛŋklɛŋ nibii ni miŋɔhã nyɛ ni mi hu miná lɛ ateŋ ekomɛi ji, akɛ Kristo gbo yɛ wɔhe eshai ahewɔ taakɛ Ŋmalɛi lɛ tsɔɔ lɛ;
4 ni akɛ afu lɛ, hɛɛ, akɛ atee lɛ shi yɛ gbi ni ji gbi etɛ lɛ nɔ taakɛ Ŋmalɛi lɛ tsɔɔ lɛ;
5 ni akɛ ejie ehe kpo etsɔɔ Kefa,* ni no sɛɛ lɛ Mɛi Nyɔŋma kɛ Enyɔ lɛ.
6 No sɛɛ lɛ, ejie ehe kpo etsɔɔ nyɛmimɛi ni fa fe ohai enumɔ yɛ be kome mli, mɛi ni amɛteŋ mɛi babaoo kɛ wɔ yɔɔ lolo, shi amɛteŋ mɛi komɛi ewɔ yɛ gbele mli lɛ.
7 Enɛ sɛɛ lɛ, ejie ehe kpo etsɔɔ Yakobo, ni no sɛɛ lɛ bɔfoi lɛ fɛɛ.
8 Shi amɛ fɛɛ amɛsɛɛ lɛ, ejie ehe kpo etsɔɔ mi hu tamɔ mɔ ni be shɛɛɛ ní afɔ lɛ.
9 Ejaakɛ miji bibioo fe fɛɛ yɛ bɔfoi lɛ ateŋ, ni misaaa mɔ ni atsɛɔ lɛ bɔfo tete, ejaakɛ miwa Nyɔŋmɔ asafo lɛ yi.
10 Shi Nyɔŋmɔ duromɔ naa miji mɔ ni miji nɛɛ. Ni eduromɔ ni eduro mi lɛ efeee yaka, shi moŋ mitsu nii waa fe amɛteŋ mɔ fɛɛ mɔ; kɛ̃lɛ jeee mi, shi Nyɔŋmɔ duromɔ ni kɛ mi yɔɔ lɛ ni.
11 Belɛ, kɛ́ mi ni jio, amɛ ni jio, bɔ ni wɔshiɛɔ nɛ, ni bɔ ni nyɛhe nyɛye nɛ.
12 Agbɛnɛ, kɛ́ aashiɛ akɛ atee Kristo shi kɛjɛ gbohii ateŋ lɛ, te feɔ tɛŋŋ ni nyɛteŋ mɛi komɛi kɛɔ akɛ gbohiiashitee ko bɛ lɛ?
13 Anɔkwa, kɛ́ gbohiiashitee ko bɛ lɛ, belɛ ateko Kristo shi.
14 Shi kɛ́ ateko Kristo shi lɛ, no lɛ ekã shi faŋŋ akɛ wɔshiɛmɔ lɛ efee yaka, ni nyɛhemɔkɛyeli lɛ hu efee yaka.
15 Kɛfata he lɛ, akpa wɔ shi hu akɛ Nyɔŋmɔ he amale odasefoi ji wɔ, ejaakɛ wɔyeɔ odase wɔshiɔ Nyɔŋmɔ ni wɔkɛɔ akɛ etee Kristo lɛ shi, mɔ ni kɛ́ eji anɔkwale akɛ ateee gbohii ashi lɛ, belɛ eteko lɛ shi lɛ.
16 Ejaakɛ kɛ́ ateee gbohii ashi lɛ, belɛ ateko Kristo hu shi.
17 Kɛfata he lɛ, kɛ́ ateko Kristo shi lɛ, no lɛ sɛɛnamɔ bɛ nyɛhemɔkɛyeli lɛ he; nyɛkamɔ nyɛhe eshai lɛ amli lolo.
18 Belɛ mɛi ni ewɔ yɛ gbele mli yɛ Kristo mli lɛ hu ahiɛ ekpãtã.
19 Kɛ́ wala nɛɛ mli kɛkɛ wɔhiɛ kã Kristo nɔ yɛ lɛ, no lɛ wɔnii yɛ mɔbɔ fe mɛi fɛɛ.
20 Shi agbɛnɛ, atee Kristo shi kɛjɛ gbohii ateŋ akɛ mɛi ni ewɔ yɛ gbele mli lɛ ateŋ klɛŋklɛŋ yibii.
21 Akɛni gbele tsɔ gbɔmɔ nɔ kɛba hewɔ lɛ, gbohiiashitee hu baatsɔ gbɔmɔ nɔ kɛba.
22 Ejaakɛ tamɔ bɔ ni Adam mli ni mɛi fɛɛ gboiɔ yɛ lɛ, nakai nɔŋŋ hu Kristo lɛ mli lɛ, abaahã mɛi fɛɛ hiɛ akamɔ.
23 Shi mɔ fɛɛ mɔ yɛ lɛ diɛŋtsɛ egbɛhe ni sa: Kristo ji klɛŋklɛŋ yibii lɛ, no sɛɛ lɛ, mɛi ni ji Kristo lɛ nii lɛ, yɛ be ni eba lɛ mli.
24 No sɛɛ lɛ, naagbee lɛ, be mli ni ebaaŋɔ Maŋtsɛyeli lɛ ehã e-Nyɔŋmɔ kɛ e-Tsɛ lɛ, be ni efo nɔyeli fɛɛ kɛ hegbɛ fɛɛ kɛ hewalɛ fɛɛ sɛɛ lɛ.
25 Ejaakɛ esa akɛ eye maŋtsɛ kɛyashi Nyɔŋmɔ baaŋɔ ehenyɛlɔi lɛ fɛɛ ewo enajiashi.
26 Ni naagbee henyɛlɔ ni abaafo esɛɛ ji gbele.
27 Ejaakɛ Nyɔŋmɔ “ŋɔ nibii fɛɛ ewo enajiashi.” Shi kɛ́ ekɛɛ akɛ ‘aŋɔ nibii fɛɛ awo eshishi’ lɛ, eyɛ faŋŋ akɛ mɔ ni ŋɔ nibii fɛɛ ewo eshishi lɛ fataaa he.
28 Shi kɛ́ aŋɔ nibii fɛɛ awo eshishi lɛ, no sɛɛ lɛ Bi lɛ diɛŋtsɛ hu baaŋɔ ehe ewo mɔ ni ŋɔ nibii fɛɛ ewo eshishi lɛ shishi, koni Nyɔŋmɔ atsɔ nibii fɛɛ ahã mɔ fɛɛ mɔ.
29 Kɛjeee nakai lɛ, mɛni mɛi ni abaptisiɔ amɛ kɛ yiŋtoo akɛ amɛbaagboi lɛ baafee? Kɛ́ ateee gbohii ashi kwraa lɛ, mɛni hewɔ abaptisiɔ amɛ hu kɛ yiŋtoo akɛ amɛbaagboi?
30 Mɛni hewɔ wɔ hu wɔyɔɔ oshara mli ŋmɛlɛtswaa fɛɛ ŋmɛlɛtswaa lɛ?*
31 Daa gbi lɛ, mikɛ gbele kpeɔ hiɛ kɛ hiɛ. Nyɛmimɛi, enɛ ji anɔkwale shiishi, tamɔ shwãa ni mishwãa yɛ nyɛhewɔ yɛ Kristo Yesu, wɔ-Nuŋtsɔ lɛ mli lɛ.
32 Kɛ́ mikɛ kooloi awuiyelɔi wu yɛ Efeso tamɔ mɛi krokomɛi lɛ,* mɛɛ sɛɛnamɔ yɔɔ he kɛhã mi? Kɛ́ ateee gbohii ashi lɛ, no lɛ “nyɛhãa wɔyea nii, ni wɔnua nii, ejaakɛ wɔ́ benɛ wɔgboi.”
33 Nyɛkahãa alakaa nyɛ. Naanyobɔɔ gbonyo fiteɔ sui kpakpai.*
34 Nyɛhɛlea shi yɛ jalɛ gbɛ nɔ, ni nyɛkayaa nɔ nyɛfea esha, ejaakɛ nyɛteŋ mɛi komɛi bɛ Nyɔŋmɔ he nilee. Miiwie enɛ ni mikɛwo nyɛ hiɛgbele.
35 Kɛ̃lɛ mɔ ko baakɛɛ akɛ: “Mɛɛ gbɛ nɔ abaatsɔ atee gbohii ashi? Hɛɛ, mɛɛ gbɔmɔtso amɛkɛbaaba?”
36 Bo ni obɛ jwɛŋmɔ! Nɔ ni oduɔ lɛ, ja klɛŋklɛŋ lɛ egbo, dani ehiɛ baakã.
37 Ni nɔ ni oduɔ lɛ, jeee tso* ni baada lɛ oduɔ lɛ, shi moŋ dumɔwu kuli ko kɛkɛ, ŋmaa jio, dumɔwu kroko jio;
38 shi Nyɔŋmɔ hãa lɛ tso bɔ ni esumɔɔ, ni ehãa dumɔwui lɛ eko fɛɛ eko lɛ diɛŋtsɛ etso.
39 Jeee heloo fɛɛ ji heloo kome, shi moŋ esoro gbɔmɛi aheloo, ni esoro tsinai aheloo, ni esoro loofɔji aheloo, ni esoro nu mli loi aheloo.
40 Ni ŋwɛi gbɔmɔtsei yɛ, ni shikpɔŋ nɔ gbɔmɔtsei hu yɛ; shi esoro ŋwɛi gbɔmɔtsei lɛ anunyam, ni esoro shikpɔŋ nɔ gbɔmɔtsei lɛ hu anunyam.
41 Esoro hulu anunyam, ni esoro nyɔɔŋtsere hu anunyam, esoro ŋulamii anunyam; anɔkwa, esoro ŋulami kome anunyam yɛ ŋulami kroko nɔ he.
42 Nakai nɔŋŋ eji yɛ gbohiiashitee lɛ gbɛfaŋ. Aduɔ gbɔmɔtso lɛ yɛ fitemɔ mli; ateɔ lɛ shi yɛ nɔ ni fiteee mli.
43 Aduɔ gbɔmɔtso lɛ yɛ nɔ ni bɛ nyam mli; ateɔ lɛ shi yɛ anunyam mli. Aduɔ gbɔmɔtso lɛ yɛ gbedemɔ mli; ateɔ lɛ shi yɛ hewalɛ mli.
44 Aduɔ gbɔmɔtso lɛ akɛ heloŋ gbɔmɔtso; ateɔ lɛ shi akɛ mumɔŋ gbɔmɔtso. Kɛ́ heloŋ gbɔmɔtso yɛ lɛ, mumɔŋ gbɔmɔtso hu yɛ.
45 Nakai aŋma akɛ: “Klɛŋklɛŋ gbɔmɔ ni ji Adam lɛ tsɔ gbɔmɔ* ni hiɛ kã.” Naagbee Adam lɛ tsɔ mumɔ ni hãa wala.
46 Kɛ̃lɛ, jeee mumɔŋ nɔ lɛ ji klɛŋklɛŋ nɔ. Heloo nɔ lɛ ji klɛŋklɛŋ nɔ, ni no sɛɛ lɛ, mumɔŋ nɔ lɛ.
47 Klɛŋklɛŋ gbɔmɔ lɛ jɛ shikpɔŋ lɛ nɔ, ni sũ akɛfee lɛ; gbɔmɔ ni ji enyɔ lɛ jɛ ŋwɛi.
48 Bɔ ni mɔ ni akɛ sũ fee lɛ lɛ yɔɔ lɛ, nakai nɔŋŋ mɛi ni akɛ sũ fee amɛ lɛ hu yɔɔ; ni bɔ ni mɔ ni jɛ ŋwɛi lɛ yɔɔ lɛ, nakai nɔŋŋ mɛi ni jɛ ŋwɛi lɛ hu yɔɔ.
49 Ni bɔ ni wɔji mɔ ni akɛ sũ fee lɛ lɛ henɔ lɛ, nakai nɔŋŋ wɔbaatsɔmɔ mɔ ni jɛ ŋwɛi lɛ hu henɔ.
50 Shi nyɛmimɛi, nɔ ni mikɛɔ nyɛ ji akɛ, heloo kɛ lá nine nyɛŋ ashɛ Nyɔŋmɔ Maŋtsɛyeli lɛ nɔ, ni asaŋ fitemɔ hu nine nyɛŋ ashɛ nɔ ni fiteee nɔ.
51 Naa! Miikɛɛ nyɛ teemɔŋ sane ko: Jeee wɔ fɛɛ wɔbaawɔ yɛ gbele mli, shi abaatsake wɔ fɛɛ,
52 amrɔ nɔŋŋ, yɛ hiŋmɛitswaa kome mli, be mli ni akpãa naagbee tɛtɛrɛmantɛrɛ lɛ. Ejaakɛ tɛtɛrɛmantɛrɛ lɛ baagbɛɛ, ni abaatee gbohii lɛ ashi akɛ mɛi ni fiteee, ni abaatsake wɔ.
53 Ejaakɛ esa akɛ nɔ ni fiteɔ nɛɛ awo nɔ ni fiteee, ni esa akɛ nɔ ni gboɔ nɛɛ awo nɔ ni gbooo.
54 Shi kɛ́ nɔ ni fiteɔ nɛɛ wo nɔ ni fiteee, ni nɔ ni gboɔ nɛɛ wo nɔ ni gbooo lɛ, no lɛ wiemɔ ni aŋma lɛ baaba mli akɛ: “Ami gbele kɛtee naanɔ.”
55 “Gbele, nɛgbɛ okunimyeli lɛ yɔɔ? Gbele, nɛgbɛ nɔ ni okɛtsɛ̃ɔ mɔ lɛ yɔɔ?”
56 Tsɛ̃mɔ ni kɛ gbele baa ji esha, ni esha hewalɛ ji Mla lɛ.*
57 Shi shidaa ahã Nyɔŋmɔ, ejaakɛ lɛ etsɔɔ wɔ-Nuŋtsɔ Yesu Kristo nɔ ehãa wɔyeɔ kunim lɛ!
58 No hewɔ lɛ, minyɛmimɛi ni misumɔɔ, nyɛfia shi shiŋŋ, nyɛkagbugbaa, ni be fɛɛ be lɛ, nyɛtsua babaoo yɛ Nuŋtsɔ lɛ nitsumɔ lɛ mli, ejaakɛ nyɛle akɛ nitsumɔ ni nyɛtsuɔ waa yɛ Nuŋtsɔ lɛ mli lɛ efeŋ yaka.
Shishigbɛ Niŋmaa
^ Atsɛɔ lɛ Petro hu.
^ Aloo “be fɛɛ be lɛ?”
^ Aloo eeenyɛ efee akɛ, “yɛ gbɔmɛi asusumɔ naa lɛ.”
^ Aloo “fiteɔ jeŋba kpakpai.”
^ Sht. ŋm., “gbɔmɔtso.”
^ Aloo “susuma.”
^ Aloo “esha náa hewalɛ kɛjɛɔ Mla lɛ dɛŋ.”
