1 Korintobii 6:1-20
6 Kɛ́ nyɛteŋ mɔ ko kɛ mɔ kroko ná sane lɛ, te feɔ tɛŋŋ ni eshiɔ etsitsi ni ekɛyaa saneyelihe yɛ mɛi ni ejaaa ahiɛ, shi ekɛyaaa mɛi krɔŋkrɔŋi lɛ moŋ ahiɛ lɛ?
2 Aloo nyɛleee akɛ mɛi krɔŋkrɔŋi lɛ ji mɛi ni baakojo je lɛ? Ni kɛ́ nyɛ nyɛbaakojo je lɛ, ani nyɛjeee mɛi ni sa akɛ nyɛkojoɔ saji bibii?
3 Ani nyɛleee akɛ wɔbaakojo ŋwɛibɔfoi? Belɛ, ani wɔnyɛŋ wɔkojo shihilɛ nɛɛ mli saji?
4 Belɛ, kɛ́ nyɛyɛ shihilɛ nɛɛ mli saji komɛi ni esa akɛ aye lɛ, mɛni hewɔ nyɛhalaa mɛi ni asafo lɛ ebuuu amɛ lɛ akɛ kojolɔi?
5 Miiwie enɛ ni mikɛwo nyɛ hiɛgbele. Ani hiɛshikalɔ kome folo po bɛ nyɛteŋ ni baanyɛ enyɛmimɛi ateŋ ekojo?
6 Moŋ lɛ, nyɛmi kɛ enyɛmi yaa saneyelihe, mɛi ni heee yeee lɛ po ahiɛ!
7 Anɔkwa, kɛ́ nyɛsãmasãmaa nyɛhe yɛ saneyelihe lɛ, no lɛ, aye nyɛnɔ kunim momo. Mɛni hewɔ nyɛhãaa aye nyɛ sane fɔŋ moŋ? Mɛni hewɔ nyɛhãaa ashishiu nyɛ moŋ?
8 Moŋ lɛ, nyɛfeɔ mɛi efɔŋ ni nyɛshishiuɔ amɛ, nyɛnyɛmimɛi lɛ tete!
9 Aloo nyɛleee akɛ mɛi ni ejaaa lɛ anine shɛŋ Nyɔŋmɔ Maŋtsɛyeli lɛ nɔ?* Nyɛkahãa alakaa nyɛ. Mɛi ni kɛ amɛhe woɔ bɔlɛnamɔ jeŋba sha* mli, amagajalɔi, gbalafitelɔi, hii ni hãa hii krokomɛi kɛ amɛ náa bɔlɛ, hii ni kɛ hii krokomɛi náa bɔlɛ,*
10 julɔi, amimyelɔi, dãatɔlɔi, mɛi ajɛlɔi,* kɛ ojotswalɔi anine shɛŋ Nyɔŋmɔ Maŋtsɛyeli lɛ nɔ.
11 Ni kɛ̃lɛ, nɛkɛ nyɛteŋ mɛi komɛi yɔɔ tsutsu. Shi aju nyɛhe ni nyɛhe etse; atsuu nyɛhe;* abu nyɛ jalɔi yɛ Nuŋtsɔ Yesu Kristo gbɛ́i lɛ kɛ wɔ-Nyɔŋmɔ lɛ mumɔ lɛ mli.
12 Mla ŋmɛɔ mi gbɛ akɛ mifeɔ nibii fɛɛ* moŋ, shi jeee nibii fɛɛ ahe yɔɔ sɛɛnamɔ. Mla ŋmɛɔ mi gbɛ akɛ mifeɔ nibii fɛɛ moŋ, shi mihãŋ nɔ ko nɔ ko akudɔ mi.*
13 Niyenii yɛ kɛhã musu, ni musu hu yɛ kɛhã niyenii, shi Nyɔŋmɔ baahã enyɔ lɛ fɛɛ afee yaka. Gbɔmɔtso lɛ bɛ kɛhã bɔlɛnamɔ jeŋba sha,* shi moŋ eyɛ kɛhã Nuŋtsɔ lɛ, ni Nuŋtsɔ lɛ hu yɛ kɛhã gbɔmɔtso lɛ.
14 Shi Nyɔŋmɔ tee Nuŋtsɔ lɛ shi, ni ebaatsɔ ehewalɛ lɛ nɔ etee wɔ hu shi kɛjɛ gbele mli.
15 Ani nyɛleee akɛ nyɛgbɔmɔtsei lɛ ji Kristo henii? Belɛ, ani esa akɛ maŋɔ Kristo henii lɛ kɛya ní mikɛyakpɛtɛ ashawo ko he? Dabida!
16 Ani nyɛleee akɛ mɔ ni kɛ ehe yakpɛtɛɔ ashawo ko he lɛ, ekɛ lɛ feɔ gbɔmɔtso kome? Ejaakɛ, Nyɔŋmɔ kɛɛ, “amɛyi enyɔ lɛ fɛɛ amɛbaatsɔ heloo kome.”
17 Shi mɔ fɛɛ mɔ ni kɛ ehe kpɛtɛɔ Nuŋtsɔ lɛ, ekɛ lɛ feɔ ekome yɛ mumɔ mli.
18 Nyɛjoa bɔlɛnamɔ jeŋba sha* naa foi! Esha kroko fɛɛ esha kroko ni gbɔmɔ baafee lɛ, esaaa egbɔmɔtso lɛ he tɛ̃ɛ, shi mɔ fɛɛ mɔ ni yaa nɔ ekɛ ehe woɔ bɔlɛnamɔ jeŋba sha mli lɛ, eefee esha eeshi lɛ diɛŋtsɛ egbɔmɔtso lɛ.
19 Ani nyɛleee akɛ nyɛgbɔmɔtso lɛ ji mumɔ krɔŋkrɔŋ ni yɔɔ nyɛmli, ní nyɛná kɛjɛ Nyɔŋmɔ ŋɔɔ lɛ sɔlemɔwe? Agbɛnɛ hu, nyɛjeee nyɛ diɛŋtsɛ nyɛnɔ,
20 ejaakɛ ahé nyɛ kɛ jara ni wa. Bɔ fɛɛ bɔ ni fee lɛ, nyɛwoa Nyɔŋmɔ hiɛ nyam yɛ nyɛgbɔmɔtso lɛ mli.
Shishigbɛ Niŋmaa
^ Sht. ŋm., “náŋ Nyɔŋmɔ Maŋtsɛyeli lɛ akɛ gboshinii.”
^ Kwɛmɔ Wiemɔi Titrii Amligbalamɔ lɛ, “Bɔlɛnamɔ jeŋba sha.”
^ Sht. ŋm., “hii ni kɛ hii wɔɔ.”
^ Aloo “mɛi ni sopaa mɛi.”
^ Aloo “asaa nyɛ ato ahã Nyɔŋmɔ.”
^ Aloo “Miyɛ nibii fɛɛ hegbɛ.”
^ Aloo “aye minɔ.”
^ Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
^ Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
