1 Korintobii 8:1-13
8 Agbɛnɛ, yɛ niyenii ni aŋɔhã amagai lɛ gbɛfaŋ lɛ: Wɔle akɛ wɔ fɛɛ wɔyɛ nilee. Nilee wóɔ ehe nɔ, shi suɔmɔ tswaa mɔ emaa shi.
2 Kɛ́ mɔ ko susuɔ akɛ ele nɔ ko lɛ, enáko ele nɔ lɛ jogbaŋŋ bɔ ni sa akɛ ele.
3 Shi kɛ́ mɔ ko sumɔɔ Nyɔŋmɔ lɛ, mɔ nɛ ji mɔ ni ele lɛ.
4 Agbɛnɛ, yɛ niyenii ni aŋɔhã amagai ni mɔ aaaye lɛ gbɛfaŋ lɛ, wɔle akɛ amaga jeee nɔ ko yɛ je lɛ mli, ni akɛ, Nyɔŋmɔ ko bɛ akɛ ja mɔ kome lɛ kɛkɛ.
5 Ejaakɛ eyɛ mli akɛ ayɛ mɛi ni atsɛɔ amɛ nyɔŋmɔi, kɛji yɛ ŋwɛi jio, yɛ shikpɔŋ lɛ nɔ jio, tamɔ bɔ ni “nyɔŋmɔi” babaoo kɛ “nuŋtsɔmɛi” babaoo yɔɔ lɛ moŋ,
6 shi wɔ lɛ, wɔle yɛ anɔkwale mli akɛ, Nyɔŋmɔ kome pɛ yɔɔ, Tsɛ lɛ, mɔ mli ni nibii fɛɛ jɛ kɛba, ni wɔyɔɔ wɔhã lɛ lɛ; ni Nuŋtsɔ kome pɛ yɔɔ, Yesu Kristo, mɔ nɔ ni nibii fɛɛ tsɔ kɛba, ni wɔ hu wɔtsɔ enɔ kɛba lɛ.
7 Shi jeee mɛi fɛɛ yɔɔ nilee nɛɛ. Shi mɛi komɛi lɛ, akɛni be ko ni eho lɛ, amɛjá amagai hewɔ lɛ, kɛ́ amɛmiiye nii lɛ, amɛbuɔ niyenii lɛ akɛ afɔle ni aŋɔhã amagai, ni no buleɔ amɛhenilee ni egbede lɛ.
8 Shi niyenii hãaa wɔbɛŋkɛ Nyɔŋmɔ jogbaŋŋ fe tsutsu lɛ; kɛ́ wɔyeee nii lɛ, no hãaa wɔtɛ nɔ atse, ni kɛ́ wɔye nii hu, no hãaa wɔhi fe tsutsu lɛ.
9 Shi nyɛhiɛ ahia nyɛhe nɔ be fɛɛ be, koni hegbɛ ni nyɛyɔɔ akɛ nyɛhalaa nɔ ni nyɛsumɔɔ lɛ akatsɔ nanetɔ̃tɔmɔnɔ yɛ gbɛ ko nɔ kɛhã gbedelɔi lɛ.
10 Ejaakɛ kɛ́ mɔ ko na bo ni oyɔɔ nilee lɛ akɛ ota amagai atsũ mli ooye nii lɛ, ani no ewajeŋ mɔ ni egbede lɛ henilee lɛ aahu kɛyashi ebaaye niyenii ni aŋɔhã amagai?
11 No hewɔ lɛ, onilee lɛ hewɔ lɛ, mɔ ni egbede lɛ, onyɛmi ni Kristo gbo yɛ ehewɔ lɛ, hiɛ miikpãtã.
12 Kɛ́ nyɛfee esha nyɛshi nyɛnyɛmimɛi lɛ yɛ nɛkɛ gbɛ nɔ, ni nyɛye amɛhenilee ni egbede lɛ awui lɛ, nyɛmiifee esha nyɛmiishi Kristo.
13 No hewɔ ni kɛ́ niyenii baahã minyɛmi nane atɔ̃tɔ lɛ, miyeŋ loo ko kwraa dɔŋŋ, koni mikahã minyɛmi nane miitɔ̃tɔ lɛ.
