1 Petro 1:1-25
1 Petro, ni ji Yesu Kristo bɔfo lɛ, ŋma kɛyahã gbɔi ni egbɛ eshwã Ponto, Galatia, Kapadokia, Asia, kɛ Bitinia lɛ, mɛi ni ahala
2 yɛ le ni Nyɔŋmɔ, ni ji Tsɛ lɛ le eto momo lɛ naa, ní akɛ mumɔ lɛ etsuu amɛhe,* kɛ yiŋtoo akɛ amɛtsɔmɔ toibolɔi, ní akɛ Yesu Kristo lá lɛ eshwã amɛnɔ lɛ:
Duromɔ kɛ toiŋjɔlɛ aya nɔ afa ahã nyɛ.
3 Ajie wɔ-Nuŋtsɔ Yesu Kristo Nyɔŋmɔ kɛ e-Tsɛ lɛ yi, ejaakɛ yɛ emɔbɔnalɛ kpele lɛ naa lɛ, etsɔ shi ni etee Yesu Kristo kɛjɛ gbohii ateŋ lɛ nɔ ehã afɔ wɔ ehee koni wɔná hiɛnɔkamɔ ni hiɛ kã,
4 koni wɔná gboshinii ní fiteee ní abuleko ní kwaaa lɛ. Aŋɔto yɛ ŋwɛi ahã nyɛ,
5 nyɛ mɛi ni aatsɔ hemɔkɛyeli nɔ aabu nyɛhe yɛ Nyɔŋmɔ hewalɛ naa kɛhã yiwalaheremɔ ko ni asaa ato ní abaajie kpo yɛ naagbee be lɛ mli lɛ.
6 Enɛ hewɔ lɛ, nyɛyɛ miishɛɛ babaoo, eyɛ mli moŋ akɛ ehe miihia ni jaramɔ shihilɛi srɔtoi ahã nyɛwerɛ aho nyɛhe be kukuoo ko,
7 bɔ ni afee ni nyɛhemɔkɛyeli ní aka akwɛ yɛ nɛkɛ gbɛ nɔ lɛ, nɔ ni jara wa kwraa fe shika tsuru ní aka yɛ la mli akwɛ* shi fɛɛ sɛɛ lɛ efiteɔ lɛ, ahã nyɛná yijiemɔ kɛ anunyam kɛ woo yɛ Yesu Kristo kpojiemɔ lɛ mli.
8 Eyɛ mli akɛ nyɛnako lɛ pɛŋ moŋ, shi nyɛsumɔɔ lɛ. Eyɛ mli akɛ nyɛnaaa lɛ amrɔ nɛɛ moŋ, shi kɛ̃lɛ nyɛjieɔ hemɔkɛyeli kpo yɛ emli, ni nyɛmii shɛɔ nyɛhe babaoo kɛ miishɛɛ ní yɔɔ nyam ní anyɛɛɛ naa atsɔɔ,
9 be mli ni nyɛnine shɛɔ nyɛhemɔkɛyeli lɛ he oti lɛ, ni ji nyɛyiwalaheremɔ* lɛ nɔ lɛ.
10 Nɛkɛ yiwalaheremɔ nɛɛ, gbalɔi ni gba yɛ duromɔ ni nyɛbaaná lɛ he lɛ tao mli jogbaŋŋ ni amɛpɛi mli fitsofitso.
11 Amɛtee nɔ amɛtao be tuuntu loo be mli ni mumɔ ni yɔɔ amɛmli lɛ tsɔɔ yɛ Kristo he lɛ, ejaakɛ no mli lɛ mumɔ lɛ miiye amanehului ni baaba Kristo nɔ lɛ kɛ anunyam ni baanyiɛ nomɛi asɛɛ lɛ he odase eeto.
12 Ajie kpo atsɔɔ amɛ akɛ jeee amɛ diɛŋtsɛ amɛhe amɛsɔmɔɔ lɛ, shi moŋ, amɛmiisɔmɔ nyɛ, yɛ nɔ ni amrɔ nɛɛ mɛi ni tsɔ mumɔ krɔŋkrɔŋ ni atsu kɛjɛ ŋwɛi lɛ nɔ amɛjaje sane kpakpa lɛ amɛtsɔɔ nyɛ lɛ etswa he adafi etsɔɔ nyɛ lɛ gbɛfaŋ. Nɛkɛ nibii nɛɛ, ŋwɛibɔfoi tete miishwe ni amɛna mli.
13 No hewɔ lɛ, nyɛsaa nyɛjwɛŋmɔi nyɛtoa nitsumɔ;* nyɛhiɛ ahia nyɛhe nɔ jogbaŋŋ kɛmɔa shi; nyɛkɛ nyɛhiɛnɔkamɔ lɛ akpasaa duromɔ ni akɛbaahã nyɛ yɛ Yesu Kristo kpojiemɔ lɛ mli lɛ.
14 Akɛ bii toibolɔi lɛ, nyɛkahãa nibii ni nyɛshweɔ tsutsu be ni nyɛleee nɔ ko lɛ yaa nɔ eshɔ̃a nyɛ dɔŋŋ,*
15 shi moŋ, tamɔ bɔ ni Mɔ Krɔŋkrɔŋ ni tsɛ nyɛ lɛ yɔɔ lɛ, nyɛ hu nyɛtsɔmɔa mɛi krɔŋkrɔŋi yɛ nyɛjeŋba fɛɛ mli,
16 ejaakɛ aŋma akɛ: “Esa akɛ nyɛfee krɔŋkrɔŋ, ejaakɛ krɔŋkrɔŋ ji mi.”
17 Ni kɛ́ nyɛmiibo nyɛmiitsɛ Tsɛ lɛ, mɔ ni kojoɔ mɔ fɛɛ mɔ yɛ enitsumɔ naa, ní ekwɛɛɛ hiɛiaŋ lɛ, no lɛ nyɛkɛ gbeyeishemɔ abaa nyɛjeŋ yɛ nyɛgbɔtoo be lɛ mli.
18 Ejaakɛ nyɛle akɛ jeee nibii ni fiteɔ, tamɔ jwiɛtɛi loo shika tsuru, akɛhã nyɛye nyɛhe* kɛjɛ nyɛyaka jeŋba ní nyɛná kɛjɛ nyɛtsɛmɛi lɛ aŋɔɔ* lɛ mli.
19 Shi moŋ akɛ Kristo lá ní jara wa lɛ, tamɔ gwantɛŋbi ní kpa ko bɛ ehe ní muji ko hu bɛ ehe lɛ lá.
20 Anɔkwa, ale lɛ ato momo dani ato je lɛ shishi,* shi ajie lɛ kpo yɛ bei lɛ anaagbee mli yɛ nyɛhewɔ.
21 Nyɛtsɔ enɔ nyɛhe Nyɔŋmɔ, mɔ ni tee lɛ shi kɛjɛ gbohii ateŋ, ní ehã lɛ anunyam lɛ nɔ nyɛye, koni nyɛhemɔkɛyeli kɛ nyɛhiɛnɔkamɔ lɛ ahi Nyɔŋmɔ mli.
22 Akɛni nyɛtsɔ anɔkwale lɛ toiboo nɔ nyɛtsuu nyɛhe,* ni no ehã nyɛjieɔ nyɛmimɛi ahedɔɔ ní osato bɛ mli kpo hewɔ lɛ, amrɔ nɛɛ, nyɛjɛa nyɛtsuiŋ nyɛsumɔsumɔa nyɛhe waa.
23 Ejaakɛ atsɔ Nyɔŋmɔ ni hiɛ kã ni hiɔ shi daa lɛ wiemɔ lɛ nɔ afɔ nyɛ ehee, ni jeee dumɔwu ni fiteɔ, shi moŋ dumɔwu ni fiteee* mli ajɛ afɔ nyɛ.
24 Ejaakɛ “heloo fɛɛ* tamɔ jwɛi fɔ, ni enunyam lɛ fɛɛ tamɔ jwɛiiaŋ fɔfɔi; jwɛi fɔ lɛ gbiɔ, ni fɔfɔi lɛ kpalaa,
25 shi Yehowa* wiemɔ lɛ hiɔ shi kɛyaa naanɔ.” Ni “wiemɔ” nɛɛ ji sane kpakpa ní ajaje atsɔɔ nyɛ lɛ.
Shishigbɛ Niŋmaa
^ Aloo “ní akɛ mumɔ lɛ esaa amɛ eto ahã Nyɔŋmɔ.”
^ Aloo “atsuu he.”
^ Aloo “nyɛsusumai ayiwalaheremɔ.”
^ Sht. ŋm., “nyɛfimɔa nyɛjwɛŋmɔ hɛ kɛhã nitsumɔ.”
^ Aloo “nyɛkayaa nɔ nyɛhia shi yɛ nibii ni nyɛshweɔ tsutsu be ni nyɛleee nɔ ko lɛ anaa dɔŋŋ.”
^ Sht. ŋm., “akɛkpɔ̃ nyɛ.”
^ Aloo “kɛjɛ kusum mli.”
^ Sht. ŋm., “dani ashɛ (dumɔwu) afɔ̃ shi,” ni tsɔɔ akɛ, dani Adam kɛ Hawa bɔi amɛbii lɛ ahɔŋɔɔ.
^ Aloo “nyɛsusumai ahe.”
^ Ni tsɔɔ akɛ, dumɔwu ni nyɛɔ ekwɛ̃ɔ, loo ewoɔ yibii.
^ Aloo “gbɔmɛi fɛɛ.”
^ Kwɛmɔ Wiemɔi Titrii Amligbalamɔ lɛ.
