1 Petro 2:1-25
2 No hewɔ lɛ, nyɛjiea nibii gbohii kɛ lakamɔ kɛ osatofeemɔ kɛ mɔnɔklɔmɔ fɛɛ, kɛ agbɛnɛ hu mɔfitemɔ fɛɛ yɛ nyɛhe nyɛshɛrɛa nyɛshwiea.
2 Akɛ abifabii ni afɔ amɛ ehee lɛ, nyɛhãa wiemɔ lɛ mli fufɔ ni afutuko mli* lɛ abaa nyɛtsine, koni nyɛtsɔ no nɔ nyɛdara kɛná yiwalaheremɔ,
3 kɛji nyɛsa nyɛnaa* ni nyɛna akɛ Nuŋtsɔ lɛ mli hi.
4 Be mli ni nyɛbaa eŋɔɔ, akɛ tɛ ni hiɛ kã ní gbɔmɛi ekpoo, shi Nyɔŋmɔ ehala lɛ, ni ejara wa yɛ ehiɛ lɛ,
5 nyɛ hu, akɛ tɛi ni hiɛ kamɔ lɛ, aatswa nyɛ aama shi akɛ mumɔŋ tsũ koni nyɛtsɔmɔ osɔfoi aweku krɔŋkrɔŋ, bɔ ni afee ni nyɛtsɔ Yesu Kristo nɔ nyɛŋɔ mumɔŋ afɔlei ní Nyɔŋmɔ kpɛlɛɔ nɔ nyɛhã.
6 Ejaakɛ eyɛ Ŋmalɛ lɛ mli akɛ: “Naa! Mikɛ tɛ ní ahala, faneshi koŋtɛ ni jara wa, miiŋmɛ shi yɛ Zion, ni mɔ fɛɛ mɔ ni jieɔ hemɔkɛyeli kpo yɛ emli lɛ nine enyɛŋ shi* kɔkɔɔkɔ.”
7 No hewɔ lɛ, akɛni nyɛji héyelilɔi hewɔ lɛ, ejara wa hã nyɛ; shi mɛi ni heee yeee lɛ, “tɛ lɛ ni tsũtswalɔi lɛ kpoo lɛ, no nɔŋŋ ebatsɔ koŋtɛ titri* lɛ”
8 kɛ “tɛmɔ tɛ ko kɛ nanetɔ̃tɔmɔ tɛsaa ko lɛ.” Amɛnane miitɔ̃tɔ, ejaakɛ amɛbooo wiemɔ lɛ toi. Enɛ nɔŋŋ ato amɛ ahã.
9 Shi nyɛ lɛ, nyɛji “weku ni ahala, osɔfoi ni ji maŋtsɛmɛi, jeŋmaŋ krɔŋkrɔŋ, mɛi ni eŋɔfee enɔ, koni nyɛjaje” mɔ ni tsɛ nyɛ kɛjɛ duŋ mli kɛba lɛ diɛŋtsɛ enaakpɛɛ la lɛ he lɛ “agbojei* lɛ nyɛtsɔɔ yɛ he fɛɛ he.”
10 Ejaakɛ be ko ni eho lɛ, nyɛjeee Nyɔŋmɔ webii, shi amrɔ nɛɛ, nyɛji Nyɔŋmɔ webii; be ko ni eho lɛ, anaaa nyɛ mɔbɔ, shi amrɔ nɛɛ ana nyɛ mɔbɔ.
11 Mɛi ni asumɔɔ, akɛ maŋsɛɛbii kɛ gbɔi lɛ, miiwo nyɛ hewalɛ koni nyɛya nɔ nyɛtsi nyɛhe kɛje nibii ni heloo lɛ shweɔ ni wuɔ ta shiɔ nyɛ lɛ* ahe.
12 Nyɛyaa nɔ nyɛbaa nyɛjeŋ jogbaŋŋ yɛ jeŋmajiaŋbii lɛ ateŋ, koni be mli ni amɛkɛ sane fɔ̃ɔ nyɛnɔ akɛ nyɛji efɔŋfeelɔi lɛ, amɛ diɛŋtsɛ amɛna nyɛnitsumɔi kpakpai lɛ, ní no ahã amɛwo Nyɔŋmɔ hiɛ nyam yɛ gbi ni ebaaba ebakwɛ bɔ ni nibii yɔɔ hã lɛ nɔ.
13 Nuŋtsɔ lɛ hewɔ lɛ, nyɛŋɔa nyɛhe nyɛwoa nibii fɛɛ ni gbɔmɛi fee* lɛ shishi, kɛ́ eji maŋtsɛ ní nɔ kwɔ fe nyɛ jio,
14 amralofoi ní etsu amɛ koni amɛyagbala efɔŋfeelɔi atoi, shi mɛi ni feɔ ekpakpa lɛ, amɛjie amɛyi lɛ jio.
15 Ejaakɛ eji Nyɔŋmɔ suɔmɔnaa nii akɛ nyɛtsɔ ekpakpa ní nyɛfeɔ lɛ nɔ nyɛhã gbɔmɛi ni bɛ jwɛŋmɔ ní wieɔ kwashiai awiemɔ lɛ afee dioo.*
16 Nyɛfea nyɛnii akɛ odehei, ní nyɛkɛ nyɛheyeli lɛ atsu nii, jeee akɛ nɔhaanɔ* kɛhã efɔŋfeemɔ, shi moŋ akɛ Nyɔŋmɔ nyɔji.
17 Nyɛwoa gbɔmɛi srɔtoi fɛɛ, nyɛsumɔa nyɛmimɛi asafo muu lɛ fɛɛ,* nyɛshea Nyɔŋmɔ gbeyei, nyɛwoa maŋtsɛ lɛ.
18 Tsuji lɛ, amɛŋɔ amɛhe amɛwo amɛnuŋtsɔmɛi ashishi kɛ gbeyeishemɔ ni sa fɛɛ, jeee nuŋtsɔmɛi ni hi ni nuɔ nii ashishi lɛ kɛkɛ, shi moŋ mɛi ni ewa akɛ abaasa amɛhiɛ lɛ hu.
19 Ejaakɛ kɛ́ henilee yɛ Nyɔŋmɔ hiɛ hewɔ lɛ, mɔ ko miifi shi yɛ shihilɛ ni mli wa mli* ni eena nɔ bɔ ni ejaaa gbɛ lɛ, enɛ sa jogbaŋŋ yɛ Nyɔŋmɔ hiɛ.
20 Ejaakɛ kɛ́ nyɛfee esha ni ayi nyɛ ni nyɛfi shi yɛ mli lɛ, mɛɛ sɛɛnamɔ yɔɔ he? Shi kɛ́ ekpakpa ní nyɛfeɔ lɛ hewɔ nyɛnaa nɔ, ni nyɛfiɔ shi yɛ mli lɛ, enɛ sa jogbaŋŋ yɛ Nyɔŋmɔ hiɛ.
21 Anɔkwa, gbɛ nɛɛ nɔŋŋ hewɔ atsɛ nyɛ, ejaakɛ Kristo po na nɔ yɛ nyɛhewɔ, ni efee nɔkwɛmɔnɔ efɔ̃ shi ehã nyɛ koni nyɛnyiɛ enanemaahei lɛ asɛɛ kpaakpa.
22 Efeee esha ko, asaŋ anaaa lakamɔ ko yɛ edaaŋ.
23 Be ni ajɛɔ* lɛ lɛ, ejɛɛɛ* mɔ ko etooo najiaŋ. Be ni enaa nɔ lɛ, ewieee akɛ ebaafee mɔ ko nɔ ko, shi moŋ etu ehe ewo mɔ ni kojoɔ yɛ jalɛ naa lɛ dɛŋ.
24 Lɛ nɔŋŋ etere wɔhe eshai lɛ yɛ lɛ diɛŋtsɛ egbɔmɔtso lɛ mli yɛ tso jaŋŋ lɛ nɔ, koni wɔgboi wɔhã eshai* ní wɔhi shi wɔhã jalɛ. Ni “atsɔ epilamɔi lɛ anɔ atsa nyɛ.”
25 Ejaakɛ kulɛ nyɛtamɔ gwantɛŋi ni edu gbɛ, shi amrɔ nɛɛ, nyɛku nyɛsɛɛ kɛba tookwɛlɔ kɛ nɔkwɛlɔ ni kwɛɔ nyɛsusumai anɔ* lɛ ŋɔɔ.
Shishigbɛ Niŋmaa
^ Aloo “fufɔ krɔŋŋ.”
^ Aloo “nyɛkpa shi.”
^ Sht. ŋm., “hiɛ eshwieŋ shi.”
^ Sht. ŋm., “koŋ lɛ yitso.”
^ Sht. ŋm., “jeŋbai lɛ,” ni tsɔɔ akɛ, esui kɛ enifeemɔi ni sa yijiemɔ.
^ Aloo “susuma lɛ.”
^ Aloo “gbɔmɛi agbɛjianɔtoo fɛɛ gbɛjianɔtoo.”
^ Sht. ŋm., “nyɛwo” gbɔmɛi ni bɛ jwɛŋmɔ ní wieɔ kwashiai awiemɔ lɛ “anaabu kotoku.”
^ Aloo “naajiemɔ.”
^ Sht. ŋm., “nyɛmifeemɔ lɛ.”
^ Aloo “yɛ awerɛhoyeli mli; yɛ piŋmɔ mli.”
^ Aloo “asopaa.”
^ Aloo “esopaaa.”
^ Aloo “wɔkɛ eshai afo tako mli.”
^ Aloo “nyɛwala nɔ.”
