1 Tesalonikabii 1:1-10
1 Paulo, Silvano,* kɛ Timoteo kɛyahã Tesalonikabii asafo ní kɛ Nyɔŋmɔ, ni ji Tsɛ lɛ, kɛ Nuŋtsɔ Yesu Kristo efee ekome lɛ:
Duromɔ kɛ toiŋjɔlɛ ahã nyɛ.
2 Be fɛɛ be ní wɔtsĩɔ nyɛ fɛɛ nyɛtã yɛ wɔsɔlemɔi amli lɛ, wɔdaa Nyɔŋmɔ shi,
3 ejaakɛ wɔyaa nɔ wɔkaiɔ nyɛhemɔkɛyeli nitsumɔ, nyɛsuɔmɔ mli ní nyɛjɛɔ nyɛtsuɔ nii waa, kɛ nyɛshifimɔ yɛ hiɛnɔkamɔ ní nyɛyɔɔ yɛ wɔ-Nuŋtsɔ Yesu Kristo mli lɛ hewɔ lɛ, yɛ wɔ-Nyɔŋmɔ kɛ wɔ-Tsɛ lɛ hiɛ.
4 Ejaakɛ, nyɛmimɛi ní Nyɔŋmɔ sumɔɔ, wɔle halamɔ ní ehala nyɛ lɛ,
5 ejaakɛ sane kpakpa ní wɔshiɛɔ lɛ baaa nyɛŋɔɔ yɛ wiemɔ mli kɛkɛ, shi moŋ yɛ hewalɛ kɛ mumɔ krɔŋkrɔŋ, kɛ nɔmimaa ni mli wa mli, tamɔ bɔ ni nyɛle nɔ gbɔmɛi ní wɔtsɔmɔ yɛ nyɛteŋ yɛ nyɛhewɔ lɛ.
6 Ni nyɛtsɔmɔ mɛi ni kaseɔ wɔ kɛ Nuŋtsɔ lɛ, ejaakɛ nyɛkpɛlɛ wiemɔ lɛ nɔ yɛ amanehulu babaoo mli kɛ miishɛɛ ní jɛɔ mumɔ krɔŋkrɔŋ lɛ dɛŋ,
7 ni no hewɔ lɛ, nyɛtsɔmɔ nɔkwɛmɔnɔ kɛhã héyelilɔi fɛɛ ni yɔɔ Makedonia kɛ Akaia lɛ.
8 Anɔkwa sane ji akɛ, jeee akɛ Yehowa* wiemɔ lɛ jɛ nyɛŋɔɔ ejije yɛ Makedonia kɛ Akaia kɛkɛ, shi moŋ hemɔkɛyeli ní nyɛyɔɔ yɛ Nyɔŋmɔ mli lɛ egbɛ eshwã he fɛɛ he, ni no hewɔ lɛ, ehe ehiaaa ní wɔwie nɔ ko tete.
9 Ejaakɛ amɛ diɛŋtsɛ amɛyaa nɔ amɛgbaa be ni wɔkɛ nyɛ kpe klɛŋklɛŋ lɛ he sane, kɛ bɔ ni nyɛkpale kɛje nyɛmagai lɛ ahe kɛba Nyɔŋmɔ ŋɔɔ koni nyɛbasɔmɔ anɔkwa Nyɔŋmɔ ní hiɛ kã lɛ akɛ nyɔji,
10 ní nyɛmɛ e-Bi lɛ kɛjɛ ŋwɛi, mɔ ni etee lɛ shi kɛjɛ gbohii ateŋ ní jieɔ wɔ kɛjɛɔ mlifu ní baa lɛ mli, ní atsɛɔ lɛ Yesu lɛ.
