1 Timoteo 1:1-20
1 Paulo, Kristo Yesu bɔfo yɛ Nyɔŋmɔ, wɔ-Yiwalaherelɔ lɛ, kɛ Kristo Yesu, wɔhiɛnɔkamɔ lɛ, famɔ naa,
2 kɛyahã Timoteo,* bi krɔŋŋ yɛ hemɔkɛyeli lɛ mli:
Duromɔ kɛ mɔbɔnalɛ kɛ toiŋjɔlɛ ni jɛ Nyɔŋmɔ, ni ji Tsɛ lɛ, kɛ Kristo Yesu, wɔ-Nuŋtsɔ lɛ dɛŋ ahã bo.
3 Tamɔ bɔ ni miwo bo hewalɛ akɛ ohi Efeso be ni mibaya Makedonia lɛ, nakai nɔŋŋ mifeɔ amrɔ nɛɛ, koni ofã mɛi komɛi akɛ amɛkatsɔɔ tsɔɔmɔ kroko,
4 ni asaŋ amɛkɛ amɛjwɛŋmɔ akaya adesãi kɛ wekutɔkpai anɔ. Sɛɛnamɔ ko jɛɛɛ nibii nɛɛ amli kɛbaaa, shi moŋ ehãa akaa yiŋ awieɔ moŋ fe nɔ ni eeehã aná nɔ ko ni jɛ Nyɔŋmɔ ŋɔɔ ni kɛ hemɔkɛyeli yɔɔ tsakpãa.
5 Anɔkwa, yiŋtoo ni yɔɔ gbɛtsɔɔmɔ* nɛɛ sɛɛ ji suɔmɔ ni jɛ tsui ni mli tse kɛ henilee kpakpa kɛ hemɔkɛyeli ní osato bɛ mli lɛ mli.
6 Akɛni mɛi komɛi je nibii nɛɛ asɛɛ hewɔ lɛ, amɛkpale kɛtee wiemɔi ni sɛɛnamɔ bɛ he lɛ ahe.
7 Amɛmiitao ni amɛtsɔmɔ mlatsɔɔlɔi, shi amɛnuuu nibii ni amɛwieɔ loo nibii ni amɛmaa nɔ mi veveeve lɛ ashishi.
8 Agbɛnɛ wɔle akɛ Mla lɛ hi kɛji mɔ kɛtsu nii yɛ gbɛ ni sa nɔ,*
9 ní eyɔse akɛ, jeee jalɔ hewɔ awoɔ mla, shi moŋ awoɔ ahãa mlatɔlɔi kɛ atuatselɔi, mɛi ni ebuuu Nyɔŋmɔ kɛ eshafeelɔi, mɛi ni yeee anɔkwa* kɛ mɛi ni buleɔ krɔŋkrɔŋ nibii, tsɛmɛi kɛ nyɛmɛi agbelɔi, gbɔmɔgbelɔi,
10 mɛi ni kɛ amɛhe woɔ bɔlɛnamɔ jeŋba sha* mli, hii ni kɛ hii náa bɔlɛ,* gbɔmɔjulɔi, amalelɔi, kitãmlikulɔi,* kɛ nibii krokomɛi fɛɛ ni teɔ shi woɔ tsɔɔmɔ ní hãa mɔ náa hewalɛ*
11 yɛ miishɛɛ Nyɔŋmɔ lɛ sane kpakpa ni yɔɔ nyam ní atu awo midɛŋ lɛ naa.
12 Miida wɔ-Nuŋtsɔ Kristo Yesu, mɔ ni hã mi hewalɛ lɛ shi, ejaakɛ ebu mi anɔkwafo, ni eŋɔ sɔɔmɔ ewo midɛŋ,
13 tsɛbelɛ tsutsu lɛ miji musubɔlɔ kɛ yiwalɔ kɛ mɔ ni ebuuu saa. Kɛ̃lɛ, ana mi mɔbɔ ejaakɛ lé ní mileee kɛ hemɔkɛyeli ní mibɛ hewɔ mifee nakai.
14 Shi wɔ-Nuŋtsɔ lɛ duromɔ lɛ fa aahu kɛteke nɔ, ni nɔ ni fata he ji hemɔkɛyeli kɛ suɔmɔ ni yɔɔ Kristo Yesu mli lɛ.
15 Anɔkwa wiemɔ ní sa akɛ akpɛlɛ nɔ kwraa nɛ: Kristo Yesu ba je lɛ mli koni ebahere eshafeelɔi ayiwala. Miji mɛi nɛɛ ateŋ otu.
16 Kɛ̃lɛ, ana mi mɔbɔ, koni Kristo Yesu atsɔ mi ní miji eshafeelɔi ateŋ otu lɛ nɔ ejie etsuishitoo lɛ fɛɛ kpo, ní ekɛ mi afee nɔkwɛmɔnɔ ehã mɛi ni kɛ amɛhemɔkɛyeli lɛ baakpasa lɛ koni amɛná naanɔ wala lɛ.
17 Agbɛnɛ aŋɔ woo kɛ anunyam ahã naanɔi a-Maŋtsɛ, mɔ ni fiteee, ní anaaa lɛ, Nyɔŋmɔ kome lɛ, kɛya naanɔi anaanɔ. Amen.
18 Mibi Timoteo, miitu gbɛtsɔɔmɔ* nɛɛ miiwo odɛŋ, yɛ gbalɛi ni agba yɛ ohe lɛ kɛ gbeekpamɔ naa, koni oya nɔ okɛ nomɛi awu ta kpakpa lɛ,
19 ni ohiɛ hemɔkɛyeli kɛ henilee kpakpa, nɔ ni mɛi komɛi tsi amɛto afã ní amɛkɛ amɛhemɔkɛyeli lɛ yasha shi lɛ.
20 Mɛi nɛɛ ateŋ mɛi komɛi ji Himeneo kɛ Aleksandro, ni miŋɔ amɛ miwo Satan dɛŋ koni atsɔ tsɔsemɔ nɔ atsɔɔ amɛ akɛ esaaa akɛ amɛbɔɔ musu.
Shishigbɛ Niŋmaa
^ Eshishi ji “Mɔ ni Woɔ Nyɔŋmɔ Hiɛ Nyam.”
^ Aloo “kitã; famɔ.”
^ Sht. ŋm., “yɛ mla naa.”
^ Aloo “mɛi ni ejieee suɔmɔ ní tsakeee kpo.”
^ Kwɛmɔ Wiemɔi Titrii Amligbalamɔ lɛ, “Bɔlɛnamɔ jeŋba sha.”
^ Sht. ŋm., “hii ni kɛ hii wɔɔ.”
^ Aloo “amale kitãkalɔi.”
^ Aloo “ní tsaa mɔ; ní sɛɛnamɔ yɔɔ he.”
^ Aloo “kitã; famɔ.”
