1 Timoteo 2:1-15
2 Belɛ, klɛŋklɛŋ kwraa lɛ, miiwo hewalɛ akɛ ahiɛ faikpamɔi ni yɔɔ hiɛdɔɔ, sɔlemɔi, mlidaamɔi, kɛ shidai amli ahã gbɔmɛi srɔtoi fɛɛ,
2 ahã maŋtsɛmɛi kɛ mɛi fɛɛ ni yɔɔ gbɛhei ni nɔ kwɔlɔ,* koni wɔya nɔ wɔkɛ Nyɔŋmɔjamɔ su fɛɛ kɛ mɔdɛŋbɔɔ* fɛɛ hu ahi shi kpoo yɛ toiŋjɔlɛ mli.
3 Enɛ hi ni esa yɛ Nyɔŋmɔ ni ji wɔ-Yiwalaherelɔ lɛ hiɛ,
4 mɔ ni sumɔɔ akɛ ahere gbɔmɛi srɔtoi fɛɛ yiwala ni agbɛnɛ hu amɛná anɔkwale lɛ he nilee krɔŋŋ lɛ.
5 Ejaakɛ Nyɔŋmɔ kome yɔɔ, kɛ Nyɔŋmɔ kɛ gbɔmɛi ateŋdamɔlɔ kome hu, Kristo Yesu, ni ji gbɔmɔ
6 ní ŋɔ ehe ehã akɛ kpɔmɔnɔ ni sa kɛhã mɛi fɛɛ* lɛ—enɛ ji nɔ ni abaaye he odase yɛ ebe ni sa mli lɛ.
7 Odaseyeli nɛɛ hewɔ ahala mi akɛ shiɛlɔ kɛ bɔfo lɛ—miiwie anɔkwale, mimaleee—jeŋmaji atsɔɔlɔ yɛ hemɔkɛyeli kɛ anɔkwale gbɛfaŋ.
8 No hewɔ lɛ, miisumɔ akɛ hii lɛ aya nɔ asɔle yɛ he fɛɛ he ní amɛhole niji ni he tse nɔ, ní mlifu kɛ ŋwanejei akahi mli.
9 Nakai nɔŋŋ yei lɛ hu, amɛkɛ atade ni sa* kɛ hiɛ ni gboɔ nɔ kɛ jwɛŋmɔ ni sa* awula amɛhe, jeee kɛ yigbɔi srɔtoi kɛ shika tsuru loo adiagbai loo atade ni jara wa naakpa,
10 shi moŋ kɛ nitsumɔi kpakpai ni sa yei ni tsɛɔ amɛhe akɛ Nyɔŋmɔ jálɔi lɛ.
11 Yoo afee dioo* kɛkase nii yɛ heshibaa fɛɛ mli.
12 Mihãaa yoo hegbɛ akɛ etsɔɔ nii aloo eye nuu nɔ, shi moŋ eya nɔ efee dioo.*
13 Ejaakɛ Adam klɛŋklɛŋ abɔ, no sɛɛ lɛ, Hawa.
14 Kɛfata he lɛ, jeee Adam alaka lɛ, shi yoo lɛ alaka kwraa lɛ, ni etsɔ mlatɔlɔ.
15 Shi kɛ́ etee nɔ ehi shi* yɛ hemɔkɛyeli kɛ suɔmɔ kɛ hetsemɔ mli ní jwɛŋmɔ ni sa* hu fata he lɛ, abaatsɔ biiafɔmɔ nɔ abaa eyi shweshweeshwe.
Shishigbɛ Niŋmaa
^ Aloo “mɛi fɛɛ ni yɔɔ hegbɛi.”
^ Ni tsɔɔ akɛ, mɔ ni kɛ nibii efeee shwɛmɔ.
^ Aloo “gbɔmɛi srɔtoi fɛɛ.”
^ Aloo “ni bulɛ yɔɔ he.”
^ Aloo “jwɛŋmɔ kpakpa; hiɛshikamɔ.”
^ Aloo “diŋŋ; kpoo.”
^ Aloo “eya nɔ efee kpoo; eya nɔ efee diŋŋ.”
^ Sht. ŋm., “kɛ́ amɛtee nɔ amɛhi shi.”
^ Aloo “jwɛŋmɔ kpakpa; hiɛshikamɔ.”
